FEBEKO TA AGREGA UN ‘COMMERCIAL MANAGER’ NA SU TIM
Willemstad, 20 di yanüari 2021 - Despues di a konkluí un aña fruktífero FEBEKO ta sigui fiha su bista riba e meta grandi ku e tin ku ta partisipá na World Baseball Classic 2023. Pa logra esaki FEBEKO a traha henter un plan ku lo tin hopi efekto positivo riba nos beisbòl lokal, pero tambe na nivel internashonal ku nos selekshonnan.
Pa por yega na i generá fondo FEBEKO a sera un akuerdo ku sr. Paddy Roomer, kende sigur no ta deskonosí pa e mundu di beisbòl aki na Kòrsou i Hulanda. Sr. Roomer ta organisadó di e torneo WPT i tin diferente kontakto rònt mundu riba tereno ekonómiko i deportivo. Segun e akuerdo firmá, sr. Roomer, komo ‘Commercial manager’ lo ta enkargá pa drenta den kontakto i sera akuerdo ku kompanianan grandi internashonal pa nan spònser FEBEKO i nos selekshonnan. FEBEKO por informá ku ya kaba sr. Roomer tin algun kompania i persona den tapara ku a mustra basta interes.
Segun presidente di FEBEKO, sr. Jedrek Magdalena, ‘Hopi biaha nos ta traha plan bunita sin kòrda ku mester generá entrada pa por kumpli ku e plannan aki. Anto esaki ta un fout ku nos sigur no ta bai hasi.’
FEBEKO ta kere firmemente ku trahando huntu nos por logra mas i ta demostra esaki un bia mas dor di uni forsa.
Keda pendiente pa mas informashon riba nos medio nan sosial.
