FEBEKO ta yega na akuerdo ku TeleCuracao pa transmiti weganan di Playoff
Partido nan di playoff lo wordu transmití via planta nashonal Telecuracao i Cariflix.
WILLEMSTAD, - FEBEKO ta sumamente orguyoso di por anunsiá ku nos a yega na un akuerdo ku Telecuracao nos planta nashonal pa transmishon di partido nan di Playoff pa nos liga lokal di beisbòl AA - Liga Amstel Bright.
Nos kier a gradesi Vigilante i Kontentu Agency ku for di aña pasá a bin ta aportá i proveé nos ku e plataforma i produkshon pa por brinda fanatikonan ku pa un of otro motibu no por a asistí den stadion, e oportunidat di disfrutá di e weganan via di live stream.
Siguiendo nos plan pa modernisá i profeshonalisá nos federashon, sigui hisa e nivel i popularidat i na mes momentu amplia e akseso na weganan di nos liga máksimo di beisbòl lokal, awor danki na nos akuerdo ku Telecuracao nos weganan lo ta disponibel na nos planta nashonal i tambe via Cariflix un plataforma internashonal. Keda pendiente pa mas informashon i sigui nos paginanan social riba Facebook i Instagram pa mas informashon.
