FEDERASHON TENIS DI MESA KÒRSOU TA RANKA SALI KU TORNEONAN KOMPETITIVO
WILLEMSTAD - Manera ya ta konosí hopi deporte di sala tabata pa basta tempu paralisá dor di e situashon di COVID. Awor ku situashon ta stabilasando na Kòrsou i medidanan a wòrdu suavisá, (Federashon Tenis di Mesa Kòrsou (FTMK) a traha un programa hopi kompetitivo pa e próksimo lunanan aki.
Pa e simannan benidero o tin kompetensia den tur kategoria: femenino, maskulino, Masters 60+ i tambe dòlbel maskulino i femenino.
Promé torneo Kopa Irene Moreno tabata 14 di yüni.
For di djaluna 14 di yüni a ranka sali ku e promé torneo di aña. E torneo aki lo ta na honor di Irene Moreno kende pa hopi aña tabata intensivamente enbolbí den e deporte di tènis di mesa. Manera ta konosi e torneo aki ta habri pa tur e damanan pingponista ku kier konkista e promé kopa di aña 2021. Ta bon pa menshoná ku e delaster kampoonatonan di Irene Moreno a wòrdu gana dor di Mary-Ann Mc Leod, pero tin algun hoben na kaminda ku a reservá un lugá na kas kaba pa pone e kopa Irene Moreno. Algun di e hobennan manera Marie-Antoinette Keli i Ronelly Vos ta full den kondishon pa konkista e titulo aki.
Kopa Harry Walters; ken ta bai kibra e hegemonia di Dimitri Leon?
E di dos torneo lo ta na honor di Harry Walters ku pa hopi aña tabata Presidente di Curaçaose Tafeltennis Bond. Esaki ta un torneo habri pa maskulinonan den tur klase. Ya pa algun aña Dimitri Leon ta bayendo kas ku e kopa Harry Walters, pero pa e aña aki Dimitri lo haña kompetensia serio, paso Ravi Rajwani , Henny Metry i Raymond Begina tin ideañan serio pa kibra e hegemonia di Dimitri Leon.
Torneo Master 60+ Maskulino i femenino: ken ta kibra racha di Raymond Begina?
Den e añanan tras di lomba, no tabatin duda ku Raymond Begina a poderá di e torneo Master 60+ maskulino. Tur kos ta mustra ku e aña aki tin algun kaiman grandi ta lur na boka di riw. Algun pingponista 60+ manera Jacinto Zimmerman, Peter Wong, Lucien Alberg, Erwin Sofia, Eric Adamus, Raymond Cathalina i diferente mas ta trein diaramente i inkansabel pa pone un paro na e racha di Raymond Begina.
Por último, FTMK lo manda tur resultado den prensa pa asina tur fanatikonan por keda na altura di e kampeonatonan di tenis di mesa. Tambe tin e posibilidat pa wak tur e weganan via Facebook di FTMO: Curaçao Tabel Tennis Federation. Pues, bo por sinta na bo kas trankil i gosa di tur e torneonan ku ta na kaminda den henter luna di Yüni.
