Sòftbòl i Beisbòl - Final di Liga di Nos Tur djabièrnè i djasabra resultado Liga 60 i entrega di premio Liga Amstel

Final di Liga di Nos Tur djabièrnè i djasabra resultado Liga 60 i entrega di premio Liga Amstel

WILLEMSTAD- Awe, djabièrnè 8 di sèptèmber 2023 e gran final di Liga di Nos Tur ta start den Frank Curiel Ballpark. Wega number 2 ta djasabra i si ta nesesario wega number 3 djarason 13 di sèptèmber. Ekipo Sin Stres a eliminá Un Kara den semi-final i pasa pa final kontra Shining Stars den Liga di Nos Tur.

Un públiko grandi tabata presente pa mira nos veteranonan femenino den akshon na Frank Curiel Ballpark. Djabièrnè siman pasá Un Kara a gana di Sin Stres ku skor di 11 pa 9 i djasabra Sin Stres a dal Un kara 7 pa 3. E kampionato 2023 di Liga di Nos Tur ta dediká na Marie Windster i Dalilah Martina. Dalilah Martina ta hunga den Shining Stars, ke men e hungadónan na ken a kampionato ta dediká lo topa otro den final.

Entrega di premio i resultado di Liga Amstel

WILLEMSTAD- Djasabra último Liga Amstel a sigi ku e di dos siman di kampionato 2023. Riba e fecha menshoná tabatin entrega di premio di kampionato 2022. Resultadonan di Liga di siman pasa ta lo sigiente. Thrillers a dal Terrepower 18-10. X-treme a zona Sugar 17-12, Gamers a derotá Terremoto Giants 9 pa 6.

PREMIONAN
Thrillers kampion Liga Amstel;
Cicoza supkampion;
Gamers di 3 lugá;
Cicoza number 1 kampionato regular;
MVP play-off final Jermain Esprit;
Kampion Bate, Geriyon Jacob average .757;
Kampion Picher, Argenis Daal i Raylison Gijsbertha a keda empatá;
Lider di homerun tambe tabatin empate entre 3 hungadó. Calten Daal, Raylison Gijsbertha i Raychelon Michel.

MVP play-off final Jermain Esprit ta tuma premio.

Kampion bate Geriyon Jacob average .757 ta tuma su premio.

Nos Tambe Por ta gana di Jaws den Liga 60

WILLEMSTAD- Nos Tambe Por a gana Jaws ku skor di 7 pa 4 djadumingu den kontinuashon di Liga 60 na Frank Curiel Ballpark. Den e promé buelta Jaws a gana di Nos Tambe Por i despues di e wega ei Nos Tambe Por no a pèrdè niun wega mas i pasa pa okupá promé lugá den Sòftbòl Liga 60. Pa loke ta e otro weganan Nos Power a gana Sluggers 4 pa 1 i Lions a sorprendé Los Amigos 5-3.

Nos Tambe Por a pasa pa promé lugá ku viktoria di 7 pa 4 riba Jaws den Liga 60.

RESULTADONAN
Nos Power 4, Sluggers 1
Nos Power tabatin 6 hit i nan a hunga sin eror. Isaac Francees a gana i Elvis Balentina a bai di 1-1. Oswalt Dalnoot ku Isaac Francees, ámbos a bai di 2-1. Sherwin Martinus a bai di 2-2. Sluggers a dal 7 hit i hasi 4 eror. John Klooster a pèrdè. James Jackson ku Marlon Privania, ámbos a bai di 1-1. Raymond Lieuw, Irwin Leito, Efraim Marselia, Benigno Imperator i Siegfried Polonius, tur a bati di 2-1.

Jaws a kai vensi i a pasa pa di dos lugá.

Lions 5, Los Amigos 3
Lions a dal 7 hit i kometé 1 eror. Darsy Martinus tabata ganadó. Kenneth Obispo, Manuel Valdez ku Rudsel Rijne, tur a bai di 2-1. Gensley Balborda i Ronchel Daal, ámbos di 2-2. Pa Los Amigos 8 hit ku 2 eror. Norman Provence a resultá pèrdèdó. Sendly Reina, Donald Barbolina ku Marciano Schoop, tur a bai di 2-1. Marlon Winklaar i Candido Adamus, ámbos di 3-2.

Pitufos number 3 den Liga 60 ku rèkòrt di 5-2.

‍

Nos Tambe Por 7, Jaws 4
Nos Tambe Por tabatin 6 hit ku 2 eror. Richenel Rafaela a bai ku e viktoria. Renato Anasagasti i Emile Haswell, ámbos di 1-1. Percey Schoop, Willem Felicia, Rudsel Baromeo ku Jeromin William, tur a bai di 2-1. Jaws a dal 4 hit i hasi 1 eror. Anthony Pieter a karga ku e derota. Fransje Lambertina a bai di 1-1. Fitszgerald Pieter ku Marlon Römer, ámbos di 2-1.

‍

INFORMASHON DI SÒFTBÒL I BEISBÒL

Fanátikonan di Deporte Kòrsou bonochi. Nos tei awe atrobe ku hopi informashon di Sòftbòl i Beisbòl.. E gran final di Beisbòl Dòbel A a start djaweps den Tio Daou Ballpark entre Santa Rosa Indians i Royal Scorpions. Royal Scorpions a gana relativamente fasil ku skor di 12-4. Santa Rosa Indians a terminá number 1 den e buelta regular di kampionato 2023, miéntras ekipo Royal Scorpions a kaba number 3. Santa Rosa Indians a gana e seri semi-final kontra ekipo number 4 ku ta Santa Maria 3-1 i Royal Scorpions di un manera sorprendente e swip e ekipo Wild Cats ganando 3 wega stret. Hopi tin Royal Scorpions komo faborito leve pa bira kampion a base di nan aktuashon tremendo den semi-final. Nos ta kere faborito hopi leve debí ku Santa Rosa Indians tin un tremendo tim ku hopi union.

* * * * *

Mas lat den e kolumna aki nos tin detaye kon e ekiponan menshoná a hunga kontra otro den e kampionato regular. Na Aruba ekipo Decos a gana di Stingers ku skor di 14 pa 8 i bira kampion di 50+ di Sòftbol riba nos hermana isla. Bon públiko i transmishon bibu pa mira e wega final. E gran Johannes ‘Pooy’ Flanegin ku asta den Kopa ABC di e hóbennan ta gana wega ainda, tabata e picher ganadó. Eugene de Cuba a bati di 4-3. Gransino Wester di 2-2. Gregory Paulina tabata e picher pèrdèdó pa Stingers i Anthony Thompson a bati di 3-3 i Antonio Hassel di 2-2. Decos a bati 16 hit i hasi 1 eror. Stingers a dal 16 hit tambe pero kometé 3 eror. Den e wega bálido pa di 3 lugá Banbino a gana Surprise ku skor feros di 16-3.

* * * * *

Sòftbòl Femenino riba nivel Dòbel A ta moviendo den gran forma ku Pichingolo dominando
relatívamente fásil. Te ku den e siman aki Pichingolo tabatin rèkòrt di 7-0 i ta solamente un wega a terminá pèrtá ku ta e wega kontra di Fighting Team. Standing te ku djabièrnè 8 di sèptèmber ta Pichingolo 6-0, Fenix 6-2, The Fighting Team 3-4, Santa Rosa Angels 2-6, Souax 1-7. Souax tabata den final di temporada 2022 i ta sinti falta sigur di e estelarísimo J’Dah Girigorie ku den luna ougùstùs a move pa College na USA. Djamars Pichingolo i Fenix, number 1 kontra number 2 di e kampionato i Pihcingolo a gana fásil 7pa 2.

* * * * *

Pa loke ta trata Liga 60, ekipo Nos Tambe Por a superá Jaws den un bon partido ku skor di 7 pa 4. Richenel ‘VKC’ Rafaela a gana e wega i Anthony Pieter tabata e picher pèrdèdó pa Jaws. Siegfried Lopez a relevá pa Nos Tambe Por i Riley Toppenberg pa ekipo Jaws. Ekipo Jaws tin hungadónan nobo manera entre otro Tyron de Palm i Remick Bernadina, miéntras Nos Tambe Por tin Hendrick Gabriel i Winston Kirindongo den nan fila e aña aki. Despues ku Nos Tambe Por a bira kampion pa 3 aña sigí, 2019, 2020 i 2021, tabata ekipo Jaws ku a bira kampion na 2022. Den e otro weganan Nos Power a gana Sluggers 4 pa 1 i Lions a sorprendé Los Amigos 5-3. Standing up to date den Liga 60 ta Nos Tambe Por 5-1, Jaws 5-2, Pitufos 5-2, Los Amigos 3-4, Nos Power 3-2, Lions 2-4, Sluggers 2-5 i Curaçao Super Stars 0-6. Angel Ramirez na edat di 88 ainda ta riba tereno i lo retirá despues ku e temporada aki terminá. Ramirez a partisipá den dos wega e aña aki ku su ekipo Curacao Super Stars.

Los Amigos luchando pa keda number 4 den Liga 60.

* * * * *

Ban bèk pa Beisból Dòbel A. Santa Rosa a terminá kampionato regular na promé lugá ku rekòrt di 14-6 i Royal Scorpions na di 3 lugá ku 11-9. Santa Rosa a gana 3 di e 4 weganan di kampionato regular kontra di Royal Scorpions. Santa Rosa a gana Royal Scorpions 4-3, 2-1 i 5-0 den e promé 3 bueltanan di kampionato di Beisból Dòbel A. Den e último wega entre e ekiponan aki den buelta regular ekipo Royal Scorpions a gana 5 pa 1. Durante temporada regular Royal Scorpions a bati .273 ku 23 homerun i 138 kareda empuhá. Royal Scorpions su ERA di picheo ta 5.76. i defensa ta .957. Santa Rosa den buelta regular a bati .286 kolektivo, dal 18 homerun i empuhá 136 kareda. Santa Rosa su picheo kolektivo (ERA) ta 4.26 i averahe defensivo ta .949. Nos ta keda te aki pa awe.