Torneo Win Felicia ta sigi e wikènt na Frank Curiel Ballpark
WILLEMSTAD – Dia di Bandera, 2 di yüli torneo 50 aña Wim Felcia a start den Frank Curiel Ballpark i tabatin 3 wega di 60+. E weganan lo sigi te djadumingu i nos tin e skema i e resultadonan. Resultadonan di weganan di ayera ta Jaws 8, Nos Tambe Por 0. Despues a sigi Lions vs Pitufos, Lions a gana Pitufos 6-3 . E último wega ABC Stars a gana di Nos Tambe Por 4-1.
Torneo 50 Aña Wim Felicia
Djaweps 3 di yüli
Ban Serio 11, Nos Tambe Por 1
Treasure 20, Nos Goso 1
Djabièrnè 4 di yüli
Jaws 50+ 9, vs Boneiru 50+ (The Brothers) 0
Nos Tambe Por 5 vs Boneiru 60+ 9 (Bonaire Stars).
Rising Phoenix ta gana wega desisivo i bira kampion Diamond Stars League
WILLEMSTAD – Rising Phoenix a bira kampion di Diamond Stars League pa di dos aña sigí djabièrnè 27 di yüni den Sam Bunting Ballpark. Rising Phoenix a derotá ekipo Treasure ku skor di 9 pa 3 den wega number 3 di e seri final. Hopi fanátiko presente pa mira e wega desisivo djabièrnè último na Sam Bunting Ballpark. Despues di wega tabatin entrega di premio.
Kampion: Rising Phoenix.
Supkampion: Treasure.
Di tres lugá: Nos Goso.
Numeritonan
Rising Phoenix 9, Treasure 3
Rising Phoenix a dal 15 hit i hasi 4 eror. Monica Noor tabata e picher ganadó. Josmaye Chirino, Yurienne Gonzales, Ashantely Giterson a bati di 3-2. Treasure a konektá 8 hit i hasi 1 eror. Suyenne Otto- Apostel tabata e picher pèrdèdó. Susmaline Rifaela a bait di 2-2. Jenny Kinburn i Dorany Javier Valerio a bati di 3-2.
Diamond Stars League a yega final di su temporada 2025. Nos ta gradisí e Ser Supremo pa ku esaki…
Danki Señor. Un kampionato ku a start 14 di mart i terminá djasabra 27 di yüni.
GRADISIMENTU
Direktiva di Diamond Stars League a manda un komunikado despues di e wega finalisimo. E komunikado ta lo sigiente: “Un Pabien ta bai pa Rising Phoenix ku a titulá kampion i tambe na Treasure New Era komo Sup Kampion. Un danki grandi ta bai na tur e 5 ekipo nan ku ta forma parti di TDSL (The Diamond Stars League). Treasure New Era, Nos Goso,The Fighters, Mas Goso i Rising Phoenix. Ta boso ta hasi e liga. Mas danki ta bai na: Sra. Marlen Obispo i famia, DJ Pacheco, Frances Soerka ku su kuerpo di empayer. JK Flavors Julise Koffi i Shahairy Ustasia (Director kampionato.) Skorernan famia Reina, komishon di protesta, Mau Maria i Alexander Makaya. E Danki di mas grandi ta bai pé fanatikonan i e públiko ku tambe a yuda karga e kampionato ku nan presensia. Bendishon dja’riba na boso tur i nos lo topa bèk otro aña ku Dios Su Poder ora ku Diamond Stars League kumpli 5 aña.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikènt. Hopi moveshon den wikènt pa loke ta trata Sòftbòl i Beisbòl. Siman pasá Selekshon di Puerto Rico a bira kampion di e kampionato di Karibe di Senior League ganando e ekipo Kòrsou (Pabou) ku skor di 1-0 den final. Bon públiko pa mira e final, pero si tabata Kòrsou Pabou kontra Kòrsou Pariba lo tabatin mas fanátiko probablemente. E selekshon di Puerto Rico a start hopi slow den e kampionato di Karibe i dado momentu tabatin rèkòrt di 1 ganá i 3 pèrdí. Nan a gana e último 3 weganan i ‘overall’ Puerto Rico ta terminá ku rèkòrt di solamente 4-3 pero bira kampion. Puerto Rico a pèrdè e promé wega ku skor di 11-0 kontra di selekshon di Pariba.
* * * * *
E sigiente wega Puerto Rico a gana República Dominicana 18 pa 6 i despues pèrdè kontra Aruba 12-3. Puerto Rico a pèrdè kontra tur e ekiponan ku a klasifiká i a gana solamente di República Dominicana i Boneiru den e buelta regular. Na momentu di bèrdat, na rant di keda eliminá for di e buelta regular nan a gana di Boneiru 13-3 pa klasifiká na di 4 lugá. Segidamente a gana Pariba 6-5 den semi-final. Kòrsou Pariba tabata ganá ku skor di 4-0 te den último inning. Kosnan a bòltu formal den bòm di e di 6 inning kaminda Puerto Rico a nota 5 kareda pa bai ariba i despues Kòrsou Pariba a empatá den kabes di e di 7 inning riba homerun deskomunal di R’Jeau Valks pa empatá e wega na 5 kareda. Den e último inning Puerto Rico a pone preshon i gana riba eror di segunda base, sin ku Kòrsou logra saka un out. Ku e viktoria ei Puerto Rico a pasa pa final.
* * * * *
Pabou a gana di Aruba 8-5 den un wega bon bringa pa bin topa ku Puerto Rico. Dave Jay Rijke tabata tremendo pa Pabou, pichando 6 inning i riba 95 bala, tuma 4 hit i poncha 9 batiadó. Di otro banda e picher habridó di Puerto Rico tabata tremendo, ela tuma 2 hit so. Tira 4 base por bola i poncha 3 batiadó. E picher Estrada mes a kontribuí ku su ekipo batiendo di 3-3. Tabata e batiadó Fabian Rodriguez ku a hunga leftfield i tabatin bon defensa den left ku a empuhá e kareda ganadó ku doblete den di 3 inning. Den e kampionato aki e ekipo Kòrsou Pariba a lusi formal i sólido den e e buelta regular ku rèkòrt di 5 ganá i 0 pèrdí. Pariba a pèrdè solamente un wega i esei tabata e Thriller di semi-final kontra Puerto Rico.
* * * * *
E komishon organisadó por mira atras riba un kampionato di Karibe eksitoso. Preparashonnan ta sigi e siman aki pa bai topa Kampionato di Karibe di Little League ku ta start dia 6 di yüli i terminá dia 13 di yüli. E kampionato lo tuma lugá den Stadion Post 6 i delegashonnan lo keda den Mancamp. Segun informashon ku nos tin, 8 ekipo di 7 pais lo ta presente na Kòrsou pa e kampionato di Karibe aki. Ku apoyo di nos fanátikonan Kòrsou lo tin bon chèns di bai Williamsport atrobe, sea Pariba òf Pabou.
* * * * *
Miéntras tantu Diamond Stars League a hunga e wega finalísimo na Sam Bunting Ballpark i tabata ekipo Rising Phoenix ku a bira kampion. Rising Phoenix a derotá Treasure relatívamente fásil ku skor di 9-3 pa bira kampion. Despues di wega mesora tabatin entrega di premio i nos tin mas detaye den e artíkulo. Aworaki ta pendiente pa apertura i kampionato di Liga Di Nos Tur ku ta hunga tur djabièrnè i djasabra den Frank Curiel Ballpark.
* * * * *
Weganan di Liga 50 di Sòftbòl Maskulino a keda suspendé djasabra último. A para e promé wega i despues a para tur wega di djasabra último. Intenshon tabata pa kuminsá ku play-off den e di dos siman di sèptèmber pa loke ta trata Liga 50. Tin indikashon ku e kampionato lo terminá den fin di òktober òf na komienso di novèmber. Djasabra Yesterday ku tremendo picheo kombiná di Dave Kirindongo i Andley Simmons a derotá Santa Rosa Memories 2-1 den un wega pèrtá. Bon wega pero tabatin 7 eror total, 5 pa banda di Santa Rosa Memories i 2 banda di Yesterday. Den otro wega Otrabanda a sorprendé Quaity Stars ganando 7 pa 2. Nos ta keda te aki pa awe i te mayan ku Poder di Dios.
