Final Latino Intermediate djasabra 2 di yüli 4’or pm entre Pariba i Pabou
WILLEMSTAD- Awe, Dia di Bandera 2 di yüli 2022 tin e gran final di e kampionato Latino Intermediate den Stadion Post 6. E gran final ta entre selekshon Pariba i selekshon Pabou lo ta 4’or di atardi. Wega balido pa di 3 i di 4 luga entre Meksiko i Aruba ta 1’or di mèrdia.
Pariba ta nòkout Meksiko ku no hit no run di Ayden Calmes
Selekshon Pariba a kasifiká pa final di e kampionato Intermediate Latino ku un viktoria di 10-0 riba Meksiko. E picher estelar di Pariba Ayden Calmes a tira un no hit no run ponchando 14 batiadó di e 15 outnan ku e mester a saka. E uniko batiadó ku e no a saka out pa medio do ponche tabata e batiadó di Meksiko Leonel Busto ku a konektá un rolling pa tersera i sali out di tersera pa primera. E terser bate di Meksiko a embasá pa medio di base por bola den di 4 inning. Wega final di djasabra, 2 di yüli ta 4’or pm i wega bálido pa di 3 i 4 luga lo ta 1’or pm.
NUMERITONAN
Pariba a nota 10 kareda, bati 8 hit i hunga sin eror. Ayden Calmes tabata e picher ganadó. E la tira u no hit no run. Ayden Calmes mes a bati dii 3-3.
Meksiko no a bati hit i a hasi 3 eror. Guillermo Hernandez tabata e picher pèrdèdó.
Kòrsou Pabou ta dal Aruba 15-0 i klasifiká pa final di Intemediate
WILLEMSTAD - Kòrsou Pabou ku un ofensiva sólido di 18 hit den 4 inning ta dal Aruba 15-0 i klasifiká pa final. E final entre Pariba i Pabou lo ta 4’or di atardi den Stadion Post 6. E picher Isaac Acosta e picha 4 inning kompletu tuma solamente 3 hit pa bai ku e viktoria. Sherrintley da Costa Gomez bati homerun i Estevan Nieves Mack a bati homerun den tereno.
NUMERITONAN
Pabou a nota 15 kareda, dal 18 hit i hunga sin eror. Isaaca Acosta tabata e picher ganadó i e mes a bati di 2-2. D’Shwan Martina Casimiri i Sherrtiney de Costa Gomez a bati di 4-3. Zazil schoop a bati di 1-1.
Aruba a bati 3 hit i hunga sin eror. Dylan de Leca a resultá e picher pèrdèdó. Noah Hewitt i Xyron Jacobs a bati di 1-1.
Fanátikonan di Little League, bon dia i felis wikènt un biaha mas. Nos tei riba e último fecha di e kolumna di Intermediate. Danki pa e reakshonnan ku nos a risibí di esnan ku ta sigi Little League hopi djaserka. Extra digital a lusi atrobe ku su crew profeshonal, tantu di narashon komo e parti tékniko i e personal tras di kamara. Keda pendiente pa mas di transmishonnan den futuro. Pa otro aña segun nos tin kampionato di Latino òf di Karibe atrobe na Kòrsou. By the way, Felis Dia di Bandera pa tur Yu di Kòrsou tantu esnan bibá na Kòrsou komo esnan den eksterior. Dia di Bandera a kai riba djasabra ke mèn no tin dia liber pa trahadónan.
* * * * *
Ayera Aruba a gana Colombia 13 pa 10 i keda komo number 4. Pariba a nòkout Meksiko 10 -0. Pabou a blackout Aruba 15-0. Interesante pa sa si maneho tékniko di nos selekshonnan ta opta pa laga nan picher number 1 pa final of ta manda nan mihó picher pa semi-final. Hopi manager ta bisa ku nan ta bai pa gana e weganan unu pa unu, espeshalmente ora ta trata di weganan eliminatorio esta dal saka, ke men play-off. Interesante loke ta trato maneho den Little League ku no ta niun tiki fasil.
* * * * *
Selekshonnan di Kòrsou lo sali djadumingu pa 7.20’or pa Punta Cana. Selekshonnan di Pabou i Pariba lo move ku gran kantidat di fanátiko pa República Dominicana. Nan lo keda den Impressive Hotel i dos bus lo transportá nan di e aeropuerto di Punta Cana. Dos delegashon masha grandi kargá ku fanátiko lo move pa Punta Cana ku avion charter. Lo ta un eksperensia úniko pa e hungadó- i fanátikonan. Little League World Series lo ta di 9 pa 15 di ougùstùs na Williamsport.
* * * * *
Pa Loke ta Aruba ta selekshon di Center League a gana den Intermediate i ta nan ta na Kòrsou. Colombia a manda selekshon di Cartagena di Falcon Little League. Meksiko ta representá pa selekshon Oriente. Selekshon di Nuevo Laredo ta presentá na Kòrsou. Bon trabou di e komishon organisadó enkabesá pa presidente Norval Faneyte, sekretario Bryano Goilo, direktor di kampionato, Roland Chirino, Umpire en hefe, Sandley Martina i Neldreick Lourens enkargá ku instalashonnan na Post 6 i tereno di wega, Unry Nahr ta komisario general i Marelva Clementina ta enkargá ku hospitalidat. E kampionato ta un éksito kompletu apesar ku mester a ahustá formal na momentu ku Siklon Tropikal Bonnie tabata riba kaminda. 4 kuerpo di transmishon, via e plataformanan i tambe Extra Digital riba diferente plataforma tabata Facebook, You Tube i Extra.cw. Nos ta keda te aki pa awe. Nos lo topa 1’or den Post 6 pa wega balido pa di 3 i di 4 luga i despues e wega final 4’or entre Pariba i Pabou.
