Final Liga 50 entre Baranka i Ban Serio djasabra i djadumingu awor
Baranka i Ban Serio a klasifiká pa final di Liga 50
WILLEMSTAD- Baranka a derotá Marlins i Ban Serio a nòkout Jaws den e di dos wega di playoff semi-final Liga 50. Den e promé wega di djasabra último Ban Serio a dal Jaws duru ku skor di 15 pa 2 i despues den e di dos wega Baranka a dal Marlins 16 pa 9.
Bon públiko pa mira e weganan semi-final ku a tuma lugá na Van Engelen Ballpark. Final ta start djasabra awor na Van Engelen Ballpark. Pa 12’or lo tin e promé wega di final i e di dos wega lo tuma lugá djadumingu 1'or pm. Djasabra lo tin weganan di Liga Amstel i djadumingu final di Liga van Engelen.
RESULTADONAN
Djasabra 14 di òktober
Ban Serio 15, Jaws 2
Ban Serio tabatin 14 hit i nan a hunga sin eror. Michelangelo Boekhoud a gana i Luigi Yanez a bai di 1-1. Geronimo Daflaar a bai di 2-1. Miro Daal, Reinaldo Casimiri ku Charlton Van Thijs, tur a bai di 2-2. Albert Pieternella, Jair Josepha i Eldred Estanista, tur a bai di 3-2. Luigi Yanez, Geronimo Daflaar, Reinaldo Casimiri i Eldred Estanista, tur a konektá 1 homerun i Miro Daal a konektá 2. Jaws a dal 7 hit i hasi 2 eror. Ralph Hermans a pèrdè i Desmond Brathwaite a bai di 1-1. Deron Clara, Sigbert Juliana, Fernando Rosario ku Victor Caldera, tur a bai di 2-1 i Xaviero Avastia a bai di 2-2.
Baranka 16, Marlins 9
Baranka a dal 17 hit i nan a hunga sin eror. Curtly Valeriaan tabata picher ganadó. Emmeric Agata i Edmar Cornelia a bai di 2-1, Myron Wijman di 3-1 i Gregory Reina di 4-1. Dennis D’Arnault di 2-2, Sedeney Lourens, Fisel Pereira i Jozeph Everon di 3-2 i Robertico Ramazan a bai di 3-3. Emmeric Agata, Gensley La Croes, Sedeney Lourens, Gregory Reina i Myron Wijman, tur a konektá 1 homerun. Marlins tabatin 12 hit i nan a hunga sin eror. Hubert Gomez a resultá pèrdèdó i Jeffrey Martina a bai di 1-1. Jurgen Susanna, Ian Leito, Anthony Pieters i Bryan Esclodina, tur a bai di 2-1. Eugene Antonio di 3-1, Mairon Martinus di 4-1. Randolf Balentina ku Roderick Postina, ámbos a bai di 3-2. Eugene Antonio, Randolf Balentina, Ian Leito ku Mairon Martinus, tur a konektá 1 homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia i felis wikènt. Siman ku ta pasando aki ta medio òktober i ta luna di play-off den diferente liga i naturalmente MLB tambe. Ayera tabatin wega number 4 di e seri entre Texas Rangers i Houston Astros i awe Philadelphia Phillies tambe lo hunga. Texas Rangers vs Houston lo ta 16.37 i Arizona kontra Philadelphia lo ta anochi 8’or. Kandela lo tin e dianan benidero i ta trata di dos seri mihó di 7. Seri entre Texas i Houston ta empatá na 2 i Philadelphia ta dilanti 2-1. Analistanan tin Houston Astros i Philadelphia Phillies pa yega World Series, pero tene kuenta ku ekipo i hungadónan sa kai den slump net na e momentunan krusial. Play-off ta keda un wega di momentum. Major League Baseball a bira difísil pa logra un dinastía. Ekipo Yankees tabata un dinastia di 1996 pa 2000 kaminda nan a logra 4 título, di kual 3 tabata sigi 1998, 1999 i 2000. For di 2000 niun ekipo no a logra ripití un titulo di World Series.
* * * * *
Den dianan benidero nos lo tin mas komentario di playoff di Major League Baseball, esta American League Championship Series i National League Championship Series. Den e serian aki si lo bai saka MVP kontrali na division series i Wild Card no ta saka hungadó mas balioso. Den World Series tambe lo saka hungadó mas balosio. Timnan popular na Kòrsou manera Atlanta Braves i Los Angeles Dodgers a kai for di seri di divishon. Otronan super popular manera New York Yankees, Boston Red Sox, Cincinnati Reds ets ta afó masha dia, promé ku Wild Card a start.
* * * * *
Ban pa Liga 50 kaminda ekipo Ban Serio i Baranka a klasifiká pa final manera antisipá. Tur dos ekipo a swip nan kontrinkante i pasa pa final. Ban Serio tin dos aña sin pasa pa final, miéntras Baranka a bai final na 2021 i 2022 i bira kampion. Ban Serio tabata kampion na 2019, 2020 no tabatin kampionato. Ekiponan ku Baranka a topa den final di Liga 50 ta Pitufos na 2021 i Jaws na 2022. E gran final entre Ban Serio i Baranka lo bira kandela ruman. Picher Gino Valeriaan a bira kabai di heru pa Baranka den e semi-final i último weganan. Parse ku Keny Hellement ta leshoná i tabata den plan pa rekuperá i regresá den final. Gino Valeriaan a habri i gana tur dos wega pa Baranka den semi-final. Den wega number 2 di e seri djasabra último Gino Valeriaan a sali leshoná for di wega.
* * * * *
Nos lo tin e numeritonan i mas den kurso di siman kon ekiponan Baranka i Ban serio a move kontra otro. Baranka a bari e seri durante kampionato regular kontra Ban Serio ganando ku skornan di 12-11 i 20 pa 8. Ban Serio tabatin varios hungadó poderoso e temporada aki, manera entre otro Kelvin Winklaar, Jair Josepha i Eldred Estanista. Michelangelo Boekhoudt, Norman de Roon i Winston Kirindongo a bini bèk ekipo Ban Serio. Baranka a haña Myron Wijman for di Ban Serio, Dennis D’Arnault for di ekipo Lions. Joseph Everon ku a bini for di Aruba. Gino Valeriaan a bini fuerte bèk den picheo den 2023, huntu ku Kenny Hellement ku tin mas ku 2 luna sin picha. Gino Valeriaan a karga e ekipo den play-off durante ousensia di Kenny Hellement.
* * * * *
Ban pa Beisbòl Veterano ku a tuma lugá djasabra i djadumingu na Vi Jansen Ballpark. Jandoret Raiders a gana ekipo The Brothers pèrtá 7-4 den e duelo entre number 5 i 6 di Beisbòl Veterano. Manera ta konosí ekiponan 5 i 6 lo klasifiká i hunga un wega di Wild Card sigi pa e ganadó kontra e number 4. Den e wega di djasabra mainta ekipo Isla a nòkout Marlins ku skor di 20 pa 3. Den otro wega di djasabra Santa Rosa tabata ganá ku skor di 3-2. Wega a keda suspendé te otro aviso debí ku un hungadó a bira malu riba tereno. Wega entre Jandoret Raiders i Yesterday den 50+ a keda suspendé debí ku Yesterday tabatin wega di Liga 40 kontra Quality Stars mesun djadumingu. 50+ femenino ta den training pendiente di weganan di selekshon 50+ na Sint Maarten den luna di novèmber. Nos ta keda te aki pa awe i te djarason ku Poder di Dios.
