General Manager di ekipo The Champs rabiá ku mester reforsá den Dòbel A
WILLEMSTAD- General manager i fundadó di ekipo The Champs ta rabiá ku su ekipo mester reforsá ku kasi 2/3 (dos tersera parti) pa hunga den Beisbòl Dòbel A den 2021. E general manager sr. Glenn Pieternella a yama nos furioso pa splika ku nan no ta bai tuma e loke ku FEBEKO a trese dilanti.
Glenn: “Mi ta hopi rabiá, mi no sa nada di e regla ku mester reforsá na momentu ku e ekipo di Klase A subi pa Dòbel A. Mi no tabata na e reunión ei. Nos no ta bai tuma e kos ei i mi ta bai all the way. The Champs mester hunga ku su mes hungadónan den Dòbel A den 2021. “
Deporte Kòrsou a bai bèk den diferente kombersashon ku Jedrek Magdalena presidente di FEBEKO riba e akuerdo ku tin ku ekiponan ku a vota den reunión. Glenn Pieternella fundadó The Champs a bisa ku e no sa nada di e kos ei. Manera ta konosí ekipo The Champs a gana ekipo Royal Magic den e seri di promoshon pa Dòbel A. Despues ku nan a kaba ku e seri, Deporte Kòrsou mes a anunsiá ku e ekipo The Champs mester reforsá segun akuerdonan den Reunión General di FEBEKO. E kaso ta mustra interesante i kayente. Den kurso di dianan nos ta bai mas en detaye i lo papia ku Jedrek Magdalena, presidente di FEBEKO.
Teksto pa potret:
Glenn Pieternella, general manager i fundadó di The Champs ku a promové pa Dòbel A den Beisbòl local.
Ekipo The Champs durante seri di promoshon di ekiponan di Beisbòl Klase A pa subi Dòbel A.
Jedrek Magdalena, presidente di FEBEKO i su direktiva.
