Gilmar Velder a tuma retiro for di Marchena Braves
WILLEMSTAD – Deporte Kòrsou a risibí informashon ku Gilmar Velder a tuma retiro for di Marchena Braves. Djamars 9 di yanüari Gilmar a bisa nos ku ela entregá karta di retiro komo miembro di Marchena Braves.
For di aña 2014 Gilmar ta ku e ekipo komo hungadó i despues yüni 2021 komo playing manager i último añanan komo manager. Velder: “Na 2018 mi a bini bèk despues di dos aña afó, mi a bini bèk komo coach i e aña ei nos a klasifiká number 4.” Nos ta sita e karta.“Miembronan, direktiva di Marchena Braves bontardi. Hasiendo uso di e oportunidat pa deseá kada un di boso un bes mas un bon aña 2024 kargá ku kos bon, mi ke pone boso na altura ku mi ta tuma retiro komo manager di Marchena Braves AA. Mi tin kosnan personal i retonan nobo pa mi bai p’é i logra i pa e motibu spesífiko aki e desishon ariba menshoná.
Tabatin momentunan agradabel i di lucha, tambe di kosnan pa mi siña afó i yuda mi forma den mi bida. Lo mi ta agradesido semper na organisashon Marchena Braves, kada un hungadó i fanátiko. Tambe mi ta alkansabel semper pa kualke konseho i/o yudansa ku ta na mi alkanse”, Gilmar Velder a pone den su karta.
Dos tim nobo den Beisbòl Veterano pa 2024
WILLEMSTAD- 2024 lo tin dos tim nobo den Beisbòl Veterano. Ekipo ‘The Friends’ ta un ekipo nobo ku tin idea di manda karta pa direktiva di Beisbòl Veterano pa hunga den 2024. Ta trata di un kombinashon mas o ménos di Marchena Stars i ekipo Vosama. Den The Friends tin entre otro Cedrix Valies (èks Vosama) i Aldrin Crispina (èks Marchena).
Jair Josepha ku den 2023 a forma parti di ekipo Isla Crackers komo utility player i picher, lo pasa pa forma parti di The Friends. Tin un ekipo nobo mas ku parse ku lo yama Flamingos, kua ekipo lo tin algun hungadó di Marchena i vários hungadó di Swift, entre otro Dimitri Leon ku lo ta shortstop estelar. Tin indikashon ku mener Pedro Hernandez, èks dirigente di Marchena lo ta klave den e tim aki huntu ku rumannan Leon. Keda pendiente pa mas detaye di Beisbòl Veterano pa 2024.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bon dia. Nos tei atrobe ku hopi informashon di Sòftbòl i Beisbòl. RBC Royal Bank, Gobièrnu di Kòrsou i Kenley Jansen a regalá gran kantidat di material na organisashonnan di Little League. Hopi material mes i materialnan di tempu moderno manera entre otro L-Screen. Un screen ku fasilmente bo ta desarmá i ku no mester keda na tereno p'asina malechornan por bai kuné fásilmente. Tabata un anochi ameno kaminda tur spònser i dirigente a keda huntu i kombersá di Little League. Sharier Dorand di RBC tabata hopi aktivo yudando ekiponan pa hiba e materialnan pa nan outo. Den gran forma Sharier!
Djamars último nos a anunsiá ku Gilmar Velder lo stòp ku direkshon di Marchena Braves i lo dediká na Little League. Mesun dia nos a risibí e karta ku Gilmar a manda pa direktiva di Marchena Braves. E ekipo aki a pèrdè un gran coach i un hóben hopi dediká na ekipo Marchena Braves for di dia e ekipo a keda fundá algun aña pasá. E General Manager ku ta Quincy Virginia a lamentá ku Gilmar a bai, pero nan lo sigi lucha ku e tim ku ta kargá ku hóben i ku ta un ekipo ku a klasifiká number 5 aña pasá i hunga wild card.
Alrededor di dia 20 di yanüari 2024 vários hóben di nos lo firma un kontrakt pa bira hungadó di beisbòl profeshonal ku e meta pa yega Major League Baseball. Grandes Ligas ta masha masha difísil pa yega, establesé aya na USA i hasi karera. E porsentahe di hungadónan ku ta firma i yega Big League ta masha abou mes. Bo mester ta prospekto, bon, suerte, salú ets pa bo yega MLB. Mester hinka den e hóbennan su kabes ku Little League tei pa forma nan, miéntras komportashon i enseñansa ta promé i despues hinka den kabes pa ta un profeshonal di Beisbòl.
Ora bo ta un bon ingeniero, dòkter, accountant, mekániko, mètsla, èlektrishèn, mener di skol, ta un profeshonal bo ta den bo ramo. Si bo tin e super talento den Beisbòl sí no lagé bai pèrdí, bai duru pa yega sea via skol òf firmamentu dirèkt. Ku otro palabra si bo tin e talento pa hunga Beisbòl profeshonal bai pé. Si bo no yega Major League Beisbòl bo por hasi hopi kos despues. Ta gewon bo a purba un trabou hopi kotisá ku no a resultá den yega MLB. E eksperensia ku bo a kue por ehèmpel na República Dominicana i drecha bo Spaño, na USA drecha bo Ingles i papié mas mihó ets. Ultimo tempunan aki e hóbennan ta firma i den e kontrakt tin un suma ku ta destiná pa skol dado kaso e hóben haña su ‘release’. En todo kaso nos ta pro firmamentu di prospektonan, gewon nan ta purba e trabou di un hungadó di Beisbòl profeshonal ku ta un trabou.
Representante di Minister di Deporte, sr. Errol Bishop a anunsiá ku pronto lo drecha e fasilidatnan di Cirilio Chirino Ballpark pa hunga Beisbòl Little League i pone lus bèk na e parke. Mas parke ku lus i mas parke di Little League pa nos hóbennan por desaroyá deporte. Tambe adultunan manera di Sóftból di rekreashon por hasi uso di e parke. Nan tambe tin mas parke ku nan por move ariba. Resientemente a inougurá e parke na Salina den kurá di Amador Nita i e parke ta pa Liga Willemstad trein su timnan i hunga komo home team riba e parke ei.
%20copy.jpg)
Masha tempu no tin un liga Kampion de Los Kampiones. Ya mester bisa tambe ta dos liga di e hóbennan so a sobra i último tempunan ta liganan 50 i 60 a bira mas popular ku liga di e hóbennan i tambe Beisbòl Veterano a bira popular. Un tempu Johnny Isabella tabata organisá Kampion di Los Kampiones i despues Pim Fangman a organisá Super Cup. Tabatin kampion di Liga Trai Seru, Van Engelen, Liga Amistad, Liga Un i Tur, Liga Banana, Liga Koktel. Ya, pero aworaki ta solamente dos liga tin i ta difísil pa Kampion de Los Kampiones bini bèk. Na 2005 Cicoza ku awor ta organisá Amstel Bright Premier Cup a sali kampion riba Bombers ganando 12-11 na Muizenberg Ballpark. Nos ta keda te aki pa awe.
