‘XX Juegos Bolivarianos Ayacucho-Lima 2025’
*Glenka Antonia ta konkistá medaya di plata na Perú*
LIMA – Djárason 03 di desèmber a marka kontinuashon di e ‘XX Juegos Bolivarianos Ayacucho-Lima’ I den atletismo tabata nos atleta Glenka Antonia ku un biaha mas ta saka kara di Kòrsou. Tabata durante e kompetensia di bulamentu haltu ku Glenka Antonia ta logra konkistá medaya di plata na Perú. E atleta kolombiano Helen Tenorio (1.89 meter) a logra e medaya di oro. Durante e kompetensia aki Glenka su mihó salto tabata di 1.86 meter, despues ku na tres okashon el a faya di superá e altura di 1.89. Ku e resultado aki e ta keda na di 2 lugá den bulamentu haltu pa atletanan femenino, den ‘XX Juegos Bolivarianos ‘’, ku ta tumando lugá na Ayacucho I Lima, Perú.
XX Juegos Bolivarianos Ayacucho-Lima 2025’
*Kòrsou su selekshon di vòlibòl ta keda kòrtiku*
LIMA – Riba djamars 02 di desèmber, pa 4’or di atardi ora di Kòrsou, e selekshon maskulino U21 di vòlibòl di Kòrsou a enfrentá e selekshon anfitrion Perú pa e medaya di bròns.
Den e promé enkuentro kontra Perú (dia 28 di novèmber último), bálido pa e buèlta preliminar, nos a kai vensí ku skor di 0-3. Na e okashon aki e resultado tabata idéntiko.
Apesar ku e selekshon di Kòrsou a lucha ku alma I kurpa, nan ta pèrdè finalmente ku parsial nan 25-12, 25-11 I 25-08 I di e forma aki tambe e selekshon di Perú ta keda ku e medaya di bròns.
