Glenka Antonia ta logra úniko medaya pa Kòrsou na Salvador i Sòftbòl ta terminá number 6
Kòrsou a ser’é bunita !
ATLETISMO
Riba djabièrnè dia 7 yüli 2023, ku tabata e último fecha di kompetensia di Weganan Sentro Amerikano i di Karibe 2023 na El Salvador, Kòrsou ta logra su promé i úniko medaya di e evento. Esaki tabata den oranan di atardi, den stadion 'El Magico' Gonzalez, pa loke ta e deporte di atletismo.
Tabata den e disiplina di bulamentu haltu, unda ku Glenka Antonia ta logra bula 1.84 meter i keda na di 2 puesto, pa logra medaya di plata.
Glenka ku tabata e último atleta di Kòrsou pa kompetí, den e 6 diferente ramonan deportivo ku nos atletanan tabata parti di dje, i ta logra pa Kòrsou no regresá kas man bashí for di El Salvador. E atleta YDK a lucha balentemente i finalmente mester a konformá, kedando tras di e atleta dominikana M. Senyu, kende a bula 1.86 meter, pa logra medaya di oro.
%20copy.jpg)
SOFTBOL
Miéntras tantu selekshon di sòftbòl femenino a despedí di El Salvador ku un derota, den oranan di trai mèrdia. Tabata den wega pa determiná puesto 5 i 6, ora nan ta enfrentá e ekipo di Repúblika Dominikana i ta sufri derota.
Kòrsou tabatin bentaha di 4-0 te den bòm di 5, unda e ekipo kontrali ta hasi e wega 4-3 i ta bin kai vensí ku skor di 5-4, ora Repúblika Dominikana, anotá na 2 okashon den bòm di 7, pa gana e wega.
Kòrsou a konektá 7 hit, unda J'dah Girigorie bai e ruta kompletu, pèrmitiendo 6 hit i a tira 10 ponche, sufriendo e derota, na momentu ku Kòrsou a keda den tereno.
Karin Tuk, Deidra Da Costa Gomez i Tanysha Gill kada unu a konektá 2 hit i e otro tabata di Thaima Maximiliana.
Ku e resultado aki, Kòrsou ta keda na di 6 puesto, den evento ku a konta ku partisipashon di 8 ekipo.
KLOUSURA
Finalmente djasabra dia 7 yüli 2023, lo tin e parti ofisial di klousura di e gran evento, unda Kòrsou su delegashon lo sali pa Miami djadumingu dia 9 yüli 2023 i ta regresá Kòrsou, djaluna dia 10 yüli próksimo.
