Golden Athlete Caribbean Championship organisá pa Pitufos di 8 pa 12 mei i final Torneo Lions djadumingu 5 di mei
WILLEMSTAD- Di 8 pa 12 di mei ekipo di Sòftbòl Pitufos ta organisá e tradishonal Torneo ‘Golden Athlete Caribbean Championship’ den Stadion Post 6. Djaweps dirigentenan di ekipo Pitufos tabatin un Konferensia di Prensa na Greenhouse na Mambo Beach Boulevard pa anunsiá detayenan di e torneo, ku ta un torneo internashonal di Sòftbòl Slowpitch.
E torneo a keda fundá pa Rafael Mota di República Dominicana i Lionel Sambo di Kòrsou na 2022. Na 2022 e torneo a tuma lugá na Aruba, 2023 na Punta Cana i 2024 lo ta na Kòrsou. Representante di Kòrsou di e torneo ta Edgar Zimmernan di Pitufos di Aruba ta Albertico ‘Tico’ Loopstok. Normalmente ekiponan di Kòrsou ta partisipá na Kopanan ABC&S na Aruba, Boneiru, Kòrsou i Sint Maarten i meta di e torneo aki ta pa ekiponan move pa otro islanan den Karibe, Sur i Nort Amerika.
Ekiponan ku ta partisipá den e torneo ta den 60+, Pitufos i Nos Power di Kòrsou, Los Prados di República Dominicana i Florsheim di Aruba. Den 50 ekiponan ta repartí den dos pul, Bambinos di Aruba, Bario Obrero di Puerto Rico, Ban Sentral di República Dominicana. Den Pul B tin ekiponan Jaws, Pitufos i Sluggers di Kòrsou. Skema ya ta riba merkado i ta spera ekiponan di eksterior den dianan benidero.
Torneo Lions ta terminá djadumingu 5 di mei ku final entre Nos Tambe Por i Jaws
WILLEMSTAD- Tur wega di djasabra 4 di mei a keda suspendé pa motibu di hopi awaseru den oranan di mainta. Organisadónan (Lions) a opta pa para e weganan i sigi ku e wega final i weganan bálido pa di 2 i 3 lugá riba djadumingu. Ku tur ekipo faltando un wega di e buelta regular a para e weganan. E standing di dos siman pasá i bira e standing final di buelta regular i ekiponan Nos Tambe Por i Jaws lo topa den final pa 3’or pm. Pa 11’or tin Sluggers vs Mangusa, 1’or pm Pitufos vs Los Amigos i pa 3’or ta final.
BEISBÒL VETERANO
Weganan di Beisbòl Veterano di wikènt 4 i 5 a keda suspendé pa direktiva di BEVEKO. Weganan lo sigi dia 18 di mei na Vi Jansen Ballpark.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonochi dia i felis fin di siman. Otro torneo eksitoso di Hope kaminda riba e último fechanan tabata lata lata. Djarason, Dia di Obrero riba e fecha final tabata yen yen na Van Engelen Ballpark. Oriri tabata den gran forma entre 6 pa 9’or i despues a sigi entrega di premio. Kasi tur e weganan final tabata emoshonante i pèrtá.
* * * * *
Den e promé wega ekipo Polis 40+ a gana di Flow ku skor di 7 pa 5. Flow tabatin kareda di empate ku dos out na home plate, pero Lionel Privania a pèrta brasa i saka Erling Gosepa di Flow pa out number 3. Hopi Polis i Rishèrshi na wega pa animá nan ekipo. Polis a terminá invikto den e katgoria 40+ ku 5 ganá i 0 pèrdí. Lionel Privania a resultá MVP di e wega final tirando 7 inning kompletu i tuma 5 kareda kontra e fuerte ekipo di Flow ku tin hungadónan manera Dave Kirindongo, Jair Josepha, Emile Haswell i Erling Gosepa. Den e di dos wega tabata e ekipo Fire Team ku a sa di gana Chonchis den COED Open ku skor di 8 pa 6 den otro final emoshonante. Den e parti final di e wega Chonchis a trata na bini bèk, pero keda kòrtiku.
* * * * *
Otro wega kandela tabata Onderwijs/GSH/HICC kontra MCB den kategoría COED. E wega a terminá 3 pa 2. Wega fèrfelu kaminda MCB komo ekipo di kas a nota un kareda yega serka, pero outnan 2 i 3 a kai i asina MCB keda kòrtiku. MCB naturalmente ku gran kantidat di fanátiko na Van Engelen Ballpark i ekipo di Onderwijs ku tabatin masha hopi fanátiko. Den otro kategoría The Living Legends a dal Among Us 8 pa 6. Hopi importante tabata homerun di Farrel Steen, ku base yen di habrida di e di 7 inning ku a pone Living Legends bai dilanti 8-2, pa finalmente bin gana 8-6 despues ku Among Us a menasá formal den último inning komo ekipo di kas, pero no a logra.
* * * * *
Brandweer a bira kampion invikto ganando di Aqualectra pèrtá atrobe ku skor di 7-6. Den e torneo anterior tambe e ekiponan aki a topa den final i e wega a terminá pa diferensia di un kareda. Brandweer tabata ekipo di kas i a wanta un ventaha for di den bòm di e di 5 inning pa finalmente logra e viktoria. Den di 5 inning e wega tabata empatá i Sophia ku a hunga left pa Brandweer a bati di 3-3 i bira MVP di e wega final. Hemsley Martha a bolbe gana pa Brandweer. Risandro Pastor a bati di 4-3 ku homerun pa Aqualectra. Den e último wega tabata ekipo ADC/CMC/Brandweer a gana relatívamente fásil di SBAB. Nos no a risibí e skor ofishal.
* * * * *
E wikènt aki Torneo Lions ta terminá djadumingu na Frank Curiel Ballpark ku final 3’or entre Nos Tambe Por i Jaws. Djabièrnè anochi Pabou a gana Pariba 3-1 den play-off Minor League pa klasifiká pa e kampionato Latino Americano na Mayaguez di 26 di yüli pa 4 di ougùstùs.
%20copy.jpg)
* * * * *
Liga 50 a start na Van Engelen Ballpark. Weganan di Liga 50 tabata Artemisia 11 - Ban Serio 7. Sluggers 7, Catpower 9. Marlins 4, Pitufos 5. Lions 0, Baranka 13. Jaws tin barwacht i Flamboyan/Tigers ta liber. Artemisia a zona un kampanaso riba Ban Serio. Nos ta keda te aki pa awe.
