Gran final di Futbòl FFK 2021 entre Inter Willemstad i Jong Holland djadumingu 19 di desèmber
WILLEMSTAD – Djadumingu 19 di desèmber 2021, pa 6or pm tin e gran final entre Inter Willemstad i Jong Holland den Stadion FFK na Brievengat, Stadion Jean Francisca. Despues ku e kampionato a drei ku 10 ekipo, sigi pa Kaya 6, despues kaya 4 nos ta bai pa e final. Djarason último ekipo Inter Willemstad a klasifiká pa final riba su propio forsa ganando Scherpenheuvel ku skor di 1-0. Jong Holland a klasifiká fásil pa final ganando di Victory Boys 6 pa 1.
E wega lo bira basta pareu. Inter Willemstad tin bon delantero i ta bon riba tur area i tin hopi hoben. Jong Holland tin eksperensia den final. Nos ta topa djadumingu 6’or pm na Stadion Jean Francisca na Brievengat.
KOMUNIKADO FFK
Despues ku Liga MCB Terser Divishon a konosé su ekipo kampion i supkampion, awor ta toka turno na Liga MCB Promé Divishon pa saka e ganadónan máksimo di e kampionato aki.
Djaráson último e 2 finalistanan a bira konosí i djadumingu awor, 19 di dezèmber pa 6’or di atardi na tereno di FFK, Jong Holland i Inter Willemstad lo topa otro durante e tremendo partido final aki.
Liga MCB Promé Divishon 2020-2021 a keda dediká na Sr. Jose ‘Jossy’ Bibiana (èks hungadó), Sr. Ludwig ‘Luty’ Alberto (èks dirigente), Sr. Remolder Diaoen (èks hungadó),
Sr. Erick ‘Eki’ Oleana (èks hungadó), Sr. Jozef ‘Papito’ Nivillac (èks hungadó), Sr. Wilfrido De Lima (èks dirigente) i Sr. Marcial Marcera (èks rèfri) ku ta baluartenan ku a hasi hopi pa e deporte di futbòl.
Tabla di posishon Liga MCB Promé Divishon buèlta di 4:
E aña aki Inter Willemstad lo partisipá pa promé biaha den un final di Liga MCB Promé Divishon miéntras Jong Holland tambe lo duna tur ku tin pa bolbe bai ku e título di kampion despues ku nan logra esaki pa último biaha na aña 2018.
Pues djadumingu, 19 di dezèmber 2021, ta un tabla lo bula na tereno di FFK durante e gran final di Liga MCB Promé Divishon!
Entrada pa e partido final di Liga MCB Promé Divishon ta fl.10 adelantá pa adulto miéntras mucha di 6 te ku 12 aña i 60+ ta paga fl. 5,-. Riba djadumingu dia di wega e preisnan ta
fl. 12.50 pa adulto i tur mucha ku 60+ ta keda mesun fl.5,-.
Karchinan adelantá ta optenibel na FFK riba djasabra na bali na FFK di 12’or di mèrdia pa 6’or di atardi i djadumingu karchinan ta optenibel na e lokèt di FFK for di 12or di mèrdia te ora di wega tanten tin na stòk. Kòrda ku e karchinan ta limitá!
Tur fanátikonan por presensiá e partido final aki basta presentá ku un ID bálido (no di forma digital) i un QR Code pa por drenta stadion. Esaki nan ta obligatorio pa tur persona di 12 aña bai ariba.
Un yamada ta bai na hinter e pueblo di Kòrsou pa asistí na e Gran Final di Liga MCB Promé Divishon. Bin presensiá si Jong Holland lo bolbe títula kampion un biaha mas òf si ta Inter Willemstad pa promé biaha lo ta kampion di Liga MCB Promé Divishon.
Bin pasa un ratu ameno den kompania di bo famia i disfrutá di bo deporte preferí, e deporte rei, futbòl!
Porta ta habri 5’or di atardi, MCB i FFK ta wardabo!
