Curacao Baseball Week
Hensley Meulens ta gradisí tur ku a aportá i ta elogiá e nivel di coachnan presente den Curacao Baseball Week
WILLEMSTAD – Deporte Kòrsou a kombersá ku Hensley "Bam Bam" Meulens, e motor tras di e proyekto eksitoso Curaçao Baseball Week, kual a start for di aña 2013. Hensley ta sumamente kontentu ku e forma kon e siman a transkurí i a pone énfasis riba e "crème de la crème" ku tabata presente pa loke ta trata e coaching. Hensley a menshoná ku na sierto momentu e tabata un poko desapuntá ku e presensia di e coachnan lokal pa loke ta e parti di e klínikanan pa coach. Segun Meulens, e tabata un oportunidat úniko pa siña di e grandinan den e industria manera Ryan Sienko, Catching Coordinator di Detroit Tigers. Su trabou prinsipal ta entrená e catchernan di e organisashon, tantu den Grandes Ligas komo den Minor Leagues. Charley Greene Jr., Bullpen Coach di e ekipo mayor di Milwaukee Brewers. Greene jr. ta enkargá pa prepará e pichernan di relevo den e bullpen durante e wega. Pete Caliendo, presidente di Caliendo Baseball i International Baseball Guru. Ela bishitá mas di 40 pais i a bini Kòrsou hopi biaha kaba pa duna seminario riba métodonan moderno. John Vodelich, Assistant Pitching Coach di Milwaukee Brewers.
Marvin Benard ku a hunga 9 aña den Grandes Ligas ku San Francisco Giants. Desi Relaford, Veterano di 11 aña den MLB, hungando pa vários ekipo, entre nan Philadelphia Phillies. E legendario picher zurdo meksikano, Oliver Pérez, kende a hunga mas ku 20 temporada den Grandes Ligas. Pérez a bishitá nos isla huntu ku un grupo di 8 persona, inkluyendo su kasá, yu i suegranan.
Tur nos streanan lokal tabata presente pa duna un man. Kenley Jansen tabata un poko drùk ku asuntunan personal, e no por a yega. Didi Gregorius tabat’ei i Andrelton Simmons tambe a kompartí un par di dia promé ku ela biaha pa Merka, pero mandando su representante di su fundashon. Hensley a duna un gradisimentu spesial na su dòkternan di New York ku semper a kuid’é i ku a fungi komo spònser. Entre nan Dr. Thomas Cervone a bini ku 6 otro persona. Tambe a bini Dickerson for di Columbus, Ohio, ku un grupo di 8 persona. Un otro bishitante spesial tabata Dan Walkin, doño di un negoshi eksitoso di "Memorabilia", kende a bini huntu ku su kasá Sabrina.
Jonathan Schoop, Hainely Statia, Kevin Josephina, Sheryvien Newton i Ozzie Albies djamars na Tio Daou Ballpark.
E Big Leaguer i èks-profnan a duna un aporte inmenso. Ozzie Albies, Jonathan Schoop, Shairon Martis i Coco Balentien. For di Aruba, nos tabatin e promé Big Leaguer di e isla, Eugene Kingsale i e picher Calvin Maduro. Otro coach- i hungadónan ku a duna un man tabata Shakir Albert, Kevin Josephina, Dudley Leonora, Johnny Balentina, Terrence Goeloe, Jayden Estanista i ruman di Hensley, Randall Meulens. For di Hulanda, Harvey Gumbs tambe a bini pa duna su aporte.
Hensley Meulens ta gradisí tur e muchanan ku a partisipá i a komportá nan mes ekselente. Tambe un pabien na e mayornan pa nan sostén. "Un danki di kurason pa e gran éksito aki," Meulens a finalisá.
