Sòftbòl Slowpitch - Historia Jandoret Raiders 25 aña di eksistensia

Historia Jandoret Raiders 25 aña di eksistensia

WILLEMSTAD – Siman pasá djabièrnè Jandoret Raiders a selebrá 25 aña di eksistensia. Jandoret a keda fundá dia 15 di yanüari 1996 . Djabièrnè último, hungadó, dirigente i fanátikonan a bini huntu pa un selebrashon di un Santu Sakrifisio di Misa na Misa di Jandoret, pa después keda un ratu huntu den kura di Misa di Jandoret. A honra varios hungadó pionero, spònser i fanátkonan. Jandoret a bira mas popular ainda después ku e ekipo a logra 5 título di Beisbòl Veterano sigí di 2014 pa 2018 i un titulo di Reino di Beisbòl Veterano. Manera primintí awe nos lo sigi ku e historia di Jandoret Raiders.

KAMPION

Jandoret Raiders a sali kampion na tres okashon den Slowpitch. Na 1996 partisipando pa promé biaha na un liga, e ekipo di Jandoret a bira kampion Liga Trai Seru 1996, derotando Happy Time 2 pa 1 den un serie di tres wega. Tabata un final emoshonante, un Cirilo Chirino Ballpark kargá ku fanátiko. Por bisa kasi Jandoret kompletu tabata na Cirilo Chirino Ballpark, pa wak nan akipo bira kampion. Despues di e título a sigi un selebrashon formal den Jandoret ku òptògt i brindis na sede di Jandoret Raiders, ku ta Kaya Jùfrou Polita Dirksz 16 na Jandoret.

Ekipo kampion di Beisbòl Veterano na 2018 i fanátikonan.

Despues na komienso di aña 1997 tabatin un asina yamá warm-up. E promé torneo warm-up ku tabata paga bon plaka kèsh. Ta trata di e Torneo Mr. Bug, organisá pa Danger. Jandoret ketu bai ku un ekipo nòrmal a titulá kampion di e torneo, ganando di e super ekipo Dalpega den final, pa asina risibí un total di 1500 florin kèsh for di man di e organisadónan.

25 aña den Slowptich ta un kos serio den e tempu aki

Despues di 1997 a dura te ku 2001 den luna di desèmber, pa Jandoret Raiders den nan promé biahe pa eksterior sali kampion di un torneo organisá pa Amstel na Boneiru, ku partisipashon di ekiponan fuerte di Boneiru. Tabata reina un ambiente tur afó i sigur esnan ku a hasi e biahe ku ta mas o ménos 30 persona, di kual 18 ta hungadó, no por lubidá esaki hamas. Mester hasi menshon tambe di e super trato ku Jandoret Raiders a haña di Pim Fangman, gerensia di Amstel na Boneiru.

LIGA TRAI SERU

Liga Trai Seru ta e liga ku Jandoret a kuminsá den dje. Jandoret ta for di 1996 den e liga. Jandoret a hunga den final 3 biaha i sali kampion na un okashon.

Pa nos resumí:

1996 Jandoret Raiders kampion;

1997 Jandoret no a klasifiká, debí na e sistema di pul. Jandoret tabatin rekòrt di 14-12 i ekiponan ku rekòrt di 10-16 i hasta 5 –17 ku tabata den un pul no fuerte a klasifiká;

1998 Jandoret ta klasifiká den e 6 nan, despues den e 4 nan, pero nan ta keda eliminá den un final dramátiko den tres wega pa Fria Bombers. Jandoret ta keda na di 4 lugá;

1999 Jandoret ta pèrdè den final kontra di Catpower i sali supkampion;

2000 Jandoret ta klasifiká den e 4 nan, pero ta pèrdè den dos wega pèrtá kontra Carpatula i mester a konformá su mes ku e di tres lugá;

2001 Raiders ta klasifiká pa final i ta pèrdè kontra Run Runners den final, pa asina bira supkampion; Akinan mester bisa ku e mihó picher di Jandoret te na e momentu ei ta keda deskualifiká, lokual ta perhudiká e ekipo enormemente.

2002 te ku fin di aprel Jandoret ta bon ku rekòrt di 3-0. Jandoret ta logra gana e ekipo di Run Runners kampion aña 2001 den nan promé partido;