Hopi interes pa agente liber Dennis Gustina di Royal Scorpions
WILLEMSTAD- Dennis Gustina, centerfielder estelar di Royal Scorpions ta agente liber i tin varios ekipo tras di e talentoso outfielder ku ta tira i bati ku man robes. Ekiponan Wild Cats, Santa Maria i Royal Scorpions naturalmente tin interes den e tremendo centerfielder defensivo aki. Dennis Gustina ku a kuminsá su karera den Dòbel A ku Santa Maria a bai Royal Scorpions na aña 2019 serka su manager Raymond van Gurp.
Dennis tabata komo estelar centerfielder di Santa Maria te ku 2018, te na momentu ku Mompy a bai Royal Scorpions. Dennis tin apénas 26 aña i ta wòrdu konsiderá un dje mihó centerfieldernan defensivo di Beisbòl Dòbel A. Ta un dje varios hungadónan ku a bai kampionato Mundial di Little League Williamsport na dos okashon. Dennis a bai Williamsport na 2007 i 2008. Ela subi ku Santa Maria na 2016 i a keda 3 aña ku e ekipo i bira kampion ku Santa Maria na 2018. Nos ta kòrda ku na 2018 Dennis a hunga tremendo ku selekshon di Kòrsou na Hulanda i por poko a keda Hulanda i hunga Beisbòl aya.
Dennis a hunga ku selekshon di Hubenil (U-23) di Hulanda na Chekoslowakia i tambe U-21 ku Hulanda na Taiwan. Ku U-23 na Chekoslowakia Dennis a bira kampion i ainda nos tin e pòtrèt. En todo kaso un tremendo hungadó ku a bati .279 na 2020, .276 na 2021 i .289 na 2019. Tremendo averahe pa e defensa i e tin spit na base.
Darren Seferina pa Wild Cats i Levi Carolus pa Santa Maria Pirates
WILLEMSTAD- Moveshonnan ta sigi den Beisbòl Dòbel A. Deporte Kòrsou a risibí algún informashon kayente den dianan ku a pasa. Darren Seferina ku a hunga e último dos aña ku Santa Maria Pirates, lo pasa pa Wild Cats, miéntras Levi Carolus lo move di Royal Scorpions pa Santa Maria Pirates. E kambionan aki lo tuma lugá den e dianan benidero, debí ku negosashonnan no a terminá ainda.
Santa Rosa Indians no a logra firma Ildion Martina ainda i Royal Scorpions ta moviendo duru den silensio riba e kècher aki, esta Ildion Martina. Di dos kècher di Royal Scorpions di temporada 2021 ku ta Terrence Goeloe ta práktikamente klá ku Santa Rosa i Royal Scorpions lo no drumi i keda sin firma Ildion Martina.
Darren Seferina no ta liber ainda i mester wak kon e asuntu di bai Wild Cats lo bira. Curtney ‘Curtje’ Doran di Royal Scorpions lo ta rumbo Santa Maria pa asina djòin su tata Richard ‘Chado’ Obispo.
Deporte Kòrsou ta sigiendo moveshonnan den Beisbòl Dòbel A djaserka. Apesar ku nos ta den di dos ‘time out’, negosashonnan ta sigi. Por lo pronto ekiponan no por train den grupo konforme reglanan stipulá pa Gobièrnu.
