Lesadónan di Deporte Kòrsou Beisbòl bon dia i felis wikènt. Nos tei atrobe ku informashon di Beisbòl lokal. Play-off Dòbel A a start djarason ku wega entre Royal Scorpions i Santa Rosa Indians. Royal Scorpions a dal Santa Rosa durísimo ku skor di 13-1. Royal Scorpions a mustra hopi sóildo tantu den picheo, komo defensa i bateo. Tres di e partinan mas importante di e wega. Semper nos a kere den picheo promé, despues defensa sigí pa bateo. Hopi ta pensa otro, pero esei ta nos pensamentu pa bo tin éksito den wega. Den play-off ta power pitching tin, ké mèn e mihónan pichernan bo ta topa i aki ta bo picheo i defensa mester funshoná na promé lugá pa despues e bateo respaldá. Bo por gana un wega pèrtá di play-off riba wega chiki, pero si bo picheo i defensa ta malu, ta bira muchu mas difísil.
* * * * *
Royal Scorpions tin un profundidat formal den nan picheo. Picher habridó manera entre otro Ruderly Manuel, Cerilio Soleana, Shurandy Valeriano, Ramses Jamanika i Orsen Josephina. Tur e pichernan aki ta tremendo habridó i tin Gavanee Virgini komo relevista, Carol Servania, Frank Moron ku por habri i relevá. Cerilio Soleana ku ta Boneriano slengu, por habri i relevá. Picheo kolektivo (ERA) di Royal Scorpions ta 3.01 ku ta tremendísimo, nan defensa tambe ta tremendo .953 i bateo kolektivo di 3.04. Royal Scorpions ta gran faborito pa yega final relatívamente fásil. Royal Scorpions apesar ta di number 1 a buska Johnny Balentina, un dje mihó entrenadónan di Kòrsou pa bai sigur pa e título. Santa Rosa tin un bateo kolektivo di .282, picheo (ERA) di 5.02, fildeo .947.
* * * * *
Laga nos bai un ratu pa e seri entre Santa Maria Pirates i Wild Cats. Seri kayente mes mes ruman. Awèl lástima ku no por tin fanátiko den e play-off aki. Despues di hopi tempu nos a mira tantu fanátiko na Beisbòl. E Yunan di Kòrsou profeshonal ku ta hungando den eksterior ta hasi un diferensia grandi den e kantidat di fanátiko. Ban pa sifranan di Santa Maria i Wild Cats. E ekipo Santa Maria a terminá na di 2 lugá ku rekòrt di 9 ganá i 3 pèrdí. Santa Maria a sweep Wild Cats na komienso di temporada. Tabata e promé dos weganan di kampionato dianan 18 i 19 di yüli, ku tabata djasabra i djadumingu dilanti un públiko grandisimo den Stadion Johnny Vrutaal. Santa Maria a gana e dos weganan 7 pa 5 djasabra i 16-10 djadumingu.
* * * * *
Santa Maria Pirates ta e ekipo ku mihó averahe den bateo kolektivo ku .317. E picheo ta regular ku un ERA di 4.74 i fildeo .921. E fildeo ta esun di mas abou pa loke ta ekiponan ku a klasifiká pa play-off. Wild Cats tin un average di bateo di .308, picheo (ERA) haltisimo di 6.01 (no bon) i bon defensa di 9.66. E mihó defensa den sifra entre e promé ekiponan, pero e picheo ku un ERA mas haltu entre e 4 ekiponan ku a klasifiká pa play-off. Pa loke ta bateo Santa Maria tin grandinan manera Sherman Lacrus i Juremi Profar ku a sali entre e miho 5-nan den bateo den e buelta regular. Johannes Gregorius ta lider den kareda empuhá ku 20 RBI empatá ku Shakir Albert di Santa Rosa Indians. Den picheo, pichernan di Santa Maria no ta figurá entre e grandinan.
* * * * *
Alexander Rodriguez ku semper ta riba .400 a bati solamente .318 e aña aki, pero den pay-off e por lòs. Johannes Gregorius Jr, un dje pilánan pa hopi aña den Santa Maria, a kaba ku averahe di .406 i dos homerun. Tilsaimi Melfor i Urlich Snijders a dal 3 homerun, na di dos lugá i entre e lidernan. Denzell Gregg i Darren Seferina a bati di .385 ku Seferina komo regular i Denzell Gregg mirando basta akshon. EE kolumna aki tabata trahá promé ku e wega di djaweps, e promé entre Wild Cats i Santa Maria pa loke ta trata play-off semifinal. Santa Maria a gana ku skro di 5 pa 3manera nos a relatá den e artikulo anterior.
* * * * *
Wild Cats tambe tin su resio batiadónan manera e profeshonal Calten Daal ku a bati .316, ku a demonstrá un poder formal saliendo lider di homerun ku 4. Calten ta tremendo den defensa tambe pa ekipo Wild Cats. Hendrick Clementina konosí pa hopi poder a bini den parti final di kampionato i a hunga solamente 4 wega i bati .357. Daytan Biegel a sali kampion bate ku averahe di 4.64. Risandro Pastro ta e utility ku a bati pa averahe haltu atrobe. 389. Nos ta keda te aki.
