Lesadónan di Deporte Kòrsou, felis anochi, nos tin informashon di Beisbòl Veterano i Sòftbòl Slowpitch. Debi na COVID aktividatnan di Slowpitch ta paralisá. Tin solamente Beisbòl Veterano ku tabatin un públiko regular tantu djasabra komo djadumingu na Vi Jansen Ballpark pa mira weganan di Beisbòl Veterano. Liga 50 a start i ekipo Yesterday a zona un kampanaso riba Sigi Hunga ganando ku skor di 4-0 ku tremendo picheo di Francis Petronilia pa Yesterday. Sigi Hunga tabata kargá ku hungadónan estrea manera Hensley Josephina, Sor Moesquit, Skippy Sambo, Fabiani Orcadio i otronan. Liga 50 ta sigi djadumingu awor ku Jandoret Raiders kontra di Yesterday.
* * * * *
Tur djadumingu weganan di Liga 50 + lo sigi mainta entre 3 ekipo di Beisbol 50+. Pa temporada 2021 ta spera mas ekipo di Beisbòl Veterano. Johannes ‘Didi Tata’ Gregorius a debutá ku ekipo Santa Maria Pirates djadumingu 30 di ougùstùs i tabata hermétiko kontra di Azucar. Ultimo biaha ku Didi a picha den Beisbòl Veterano tabata na aña 2017 kontra di Jandoret Raiders den final. Ekipo Santa Maria tabata sólido djadumingu ku dos homerun pa rightfield di Ramiro Balentina. Ku refuerso di Didi Gregorius, Santa Maria ta bira un kos serio. Santa Maria despues di a pèrdè nan promé 3 weganan a gana 4 wega sigí.
* * * * *
Djadumingu Marlins ku tin 0 ganá i 8 pèrdí a sali bon kontra di Jandoret Raiders. Nan a bai ariba 3-0 den promé inning komo ekipo di bishita. Den bòm di e di promé inning ei, Jandoret Raiders a bai ariba 5-3. Marlins ta bolbe empatá na 5 kareda den di dos inning, pa despues Jandoret hinka masha hopi kareda pa e wega terminá pa blackout den di 3 inning. Marlins ta kargá ku Dominikano i Venesolano den nan alineashon. Tabatin un ekipo di Latino ku tabata pendiente pa djoin Beisbòl Veterano, pero un ke otro no a kristalisá.
* * * * *
Liga di Nos Tur, Liga 50 i Liga Amstel ta wantá. Liga di Nos Tur ku ta e úniko Liga Femenino Veterano di 2020 a keda wantá for di dos siman pasá i tin dos wikènt wantá debí na COVID-19. Miéntras tantu kasonan di COVID ta sigi subi i por spera mas akshon di direktiva di e liganan menshoná. Hopi ta pensa ku liganan por keda suspendé pa 2020 i ban spera ku asuntunan lo drecha pa nos i liganan lo por sigi. Den Beisbòl Veterano tin kandela e wikènt aki. Jandoret Raiders lo topa ku Vosama djasabra 10.30’or, djadumingu pa 1’or Santa Maria Pirates lo topa ku Santa Rosa Memories i despues The Brothers kontra Bulldogs. By the way djarason anochi nos a tende ku Liga 50 di Sòftbòl lo sigi djasabra awor na Van Engelen Ballpark.
* * * * *
Den di dos buelta lo tin Round Robbin entre e promé 6-nan, pa despues pasa pa semi-final i final. Ainda tin weganan grandi pendiente den sèptèmber, manera Santa Rosa vs Quality Stars, Jandoret vs Santa Rosa, Santa Rosa vs Marchena, Bulldogs vs Jandoret i Jandoret kontra Quality ku a keda suspendé pa motibu di awaseru. Wikènt pasá nos tabatin standing di e liganan. E situashon ta realmente pèrtá.
* * * * *
Vosama a duna Qualty Stars dolo di kabes djadumingu atardi i e wega a terminá empatá. Vosama tabatin bon chèns di gana e wega, pero a keda te einanan ku rèli den último inning. Tur fanátiko a keda sintá i òf pará na nan station pa wak e último wega di atardi. Despues di e promé buelta lo tin hopi wega pendiente ku no a terminá i algún wega ku mester hunga kompletamente di nobo. Weganan ku mester a tuma lugá djadumingu 26 di yüli i ku a keda suspendé pa motibu di palu di awa ku a kai e wikènt ei. E weganan ei tabata Santa Rosa vs Vosama, Jandoret/Quality i Santa Maria/Marchena. Nos ta keda te aki pa awe. Keda pendiente pa mas detaye di Slowpitch i Beisbòl Veterano.
