Lesadónan di Kolumna Slowpitch, bon dia i felis wikènt. Nos ta drentando un wikènt kaminda kandela ta bai tin na Tio Daou Ballpark den Beisbòl Veterano. Ekipo Quality lo topa ku Isla Crackers den un wega kandela. Manera ta konosí, Quality Stars tin sigur 7 hungadó nobo ku ta hungando regular. Dayron Puriel, Rodney Michel, Rydell Isabella, Merieldo Trinidad, Senny Petronella, Emile Haswell i Clifford Domatilia. Isla tin e kètcher Dave Janga i nan ta pendiente di Jermain Esprit i Stanford Landburg. Isla ta mustra sóildo den 2020 i a gana dos grandi kaba, Santa Rosa Memories i Santa Maria.
* * * * *
Den Liga 50 tambe tin algun wega fèrfelu djasabra 8 di ougùstùs na Van Engelen Ballpark. Mainta 10’or, na momentu ku Pitufos topa ku Flamboyan, ta klèsh formal tin. Pitufos tin 2-1 segun nos i Flamboyan tin rekòrt di 2-2. E standing no ta up to date, debí ku resultadonan di promé siman no ta up to date. Nos falta por ehèmpel wega di 4 di yüli entre Pitufos i Jaws. 12’or tin Lions vs Catpower. Ekipo Catpower tin dos siman sin subi tereno. 2’or ta Jaws vs Artemisia i despues ta Baranka/Sharks ku unifòrm nobo nobo vs Marlins ku ta den bon racha. Marlins a pèrdè nan promé wega kontra Catpower dia 11 di yüli. Marlins a protestá i despues a gana 3 wega sigí.
* * * * *
Liga Amstel tambe tin kandela ku Bombers bèk den e liga i ganando dos wega sigí riba un fásil. Djasabra (080820) Bombers ta liber i tin e asina yamá veldwacht. Mester bisa si ku grandinan manera Thrillers/Cicoza i Bombers no a topa otro ainda. Ta tres ekipo grandi ku sigur lo klasifiká den Liga Amstel. Tin lugá pa un ekipo mas i ekipo X-Treme ta mustra fuerte. 9 ekipo tin den Liga Amstel. Liga di Nos Tur tambe ta den e fase final di buelta regular. Falta dos wega ku a keda suspendé pa motibu di awaseru. Promé ku e wega di ayera e standing tabata lo sigiente. Un Kara 5-0, Chilling 2-1, Sin Stress 2-3, Join Me 1-3, Shining Stars 0-3. By the way, ayera (djabièrnè 070820) Chilling a dal Shining Stars 10-5 i Sin Stress a dal Join Me 7-4. Ke men Sin Stress a bai 3-3, Join Me 1-4. Chilling 3-1 i Shining Stars 0-4. Shining Stars un tempu super kampion no masha bon e aña aki. Ta ‘Bara di Hak’ nan a tira último añanan den awa di Shining Stars. Te otro siman ku Poder di Dios.
