Lesadónan di Deporte Kòrsou Slowpitch/Beisbòl bon dia. Moveshon pisá e wikènt pasá den Sòftbòl Slowpitch i Beisbòl Veterano. Awe ta djadumingu siman a kuminsa, pero ta kandela tabatin djabièrnè i ayera. Den Sòftbòl Slowpich ta Flamboyan Tigers a dal Ban Serio 11-8. Sluggers a sorprendé Marlins ganando 7-5. Artemisia a gana Pitufos 5-4 i Jaws a derotá Baranka 3-1. Awe pa 1’or na Vi Jansen Ballpark ta ekipo Jandoret Raiders vs Isla Crackers. 1’or. E promé seis ekiponan lo klasifiká pa hunga un Round Robbin di 5 wega. E otro ekiponan lo hunga un buelta di konsolashon.
* * * * *
Beisbòl 50+ lo start dia 30 di ougùstùs ku wega entre Sigi Hunga ku Yesterday. Djarason último tabatin último reunión na Restorant Chines na Jandoret. Ekiponan ku a partisipá ta Jandoret Raiders, Yesterday, Sigi Hunga i Vosama. Jandoret tabata representá pa Jeffrey Martina, Yesterday pa Francis Petronilia, Sigi Hunga pa Moises Zimmerman i Julien Iganacio. Vosama tabata representá pa Irving ‘Pawiri’ Evers. Gibi Denisia a representá BEVEKO i lo ta direktor di kampionato. Vosama a partisipá na reunion, pero lo no partisipá na e kampionato ku lo bai 3 buelta i hunga 6 wega. Pa otro aña ta spera masha ekipo di Liga 50. Tin vershon ku ekiponan lo bira 5 òf 6. Vosama a sigurá ku nan lo tei na 2021. Blue Hawks di añanan 80 lo tei. Santa Maria tambe lo tei i un ekipo di Venesolano (Latinonan 50+).
* * * * *
50-nan a ripará ku Beisbòl Veterano a bira hopi kompetitivo i hopi hungadó net riba 40 ta yegando i ku hopi spit. Den Sòftbòl tambe tabatin e desaroyo ku a lanta 40, despues a bini 50 i awor tin 60+. Den 60+ si nos no ta kere ku lo tin Beisbòl. En todo kaso tin espasio pa e 50+ bira grandi i por ta den futuru wak nan mes tereno pa hunga riba djadumingu. Weganan di 50+ Beisbòl lo ta djadumingu mainta ku chèns di hunga 2 ora manera esnan di 40+. Aworaki Liga 50 di Beisbòl lo hunga 1 ora i mei. Keda pendiente pa skèdjel di e promé dos bueltanan ku ta klá. Tin vershon ku tin un ekipo ku lo a keda di join ainda, pero nan mester hasi hopi purá, debí ku skèdjel ta klá kaba pa 3 ekipo. Gibi Denisia a bisa ku e skèdjel por keda adaptá na 4 ekipo, pero mester poné na altura pa e siman aki.
Algun wega pa awe, Skèdjel Liga 60: Djadumingu 16 di ougùstùs na Frank Curiel Ballpark: 11.00’or Curacao Super Stars – Sluggers; 13.00’or Jaws – Nos Power i 15.00’or Marlins – Los Amigos. Skèdjel Beisbòl Veterano. Djadumingu 16 di ougùstùs na Vi Jansen Ballpark: 10.30’or Veteranos Otrabanda – Quality Stars; 13.00’or Isla Crackers – Jandoret Raiders i 15.30’or Marlins – Sta. Maria Pirates.
* * * * *
Liga Amstel den gran forma huntu ku Liga 50. Hopi hende mes tur djasabra na Van Engelen Ballpark pa mira 50 hunga huntu ku Liga Amstel. Parse ku bar ta drei feros i e kombinashon aki lo bira un kombinashon serio pa loke ta trata fanátiko. Liga Van Engelen a wanta, debí na interes di ekiponan. Liga 40 ta den problema serio pa sigi drei. Nos ta keda te aki pa awe.
