Fanátikonan di Extra Inning, bon dia i felis siman. Aktividatnan di Beisbòl i di deporte en general ta kabando. Wikènt pasá ta solamente Beisbòl Veterano tabatin ku weganan final na Vi Jansen Ballpark. Jandoret Raiders a gana e promé wega pa nòkout den 5 inning ku skor di 12 pa 1. Orsendo Clemencia tabata den gran forma pa Jandoret Raiders tumando apénas dos hit na e ofensiva di Quality Stars. By the way, nos a kaba di haña informashon ku e wega number 2 a wòrdu kanselá pa mal estado di tereno. E wega menshoná lo sigi djasabra 5 di desèmber na Vi Jansen Ballpark.

* * * * *

Awe nos tin algun informashon di Beisbòl lokal tambe. E coach/manager di e ekipo Klase A di Groot Kwartier ku ta Andy Martina, a tuma retiro i parse ku e ta den direkshon di un otro ekipo den Beisbòl Dòbel A. Andy Martina tin un trayekto basta largu den Beisbòl lokal, espeshalmente den Klase A for di tempu di Bonnam Bears, despues Santa Rosa Indians den klase A pa bastante aña i e último dos añanan den e organisashon Groot Kwartier Stars. Tin indikashon ku kosnan no a bai muchu bon entre Andy Martina ku ta un gran trahadó i e dirigentenan di Groot Kwartier. Varios moveshon mas den Beisbòl Dòbel A.

* * * * *

Tur aktividat di Little League pa loke ta trata 2020 a keda kanselá. Ta pendiente pa wak kiko ta bai pasa den 2021. Tur komienso di aña, den luna di yanüari tin torneo organisá pa Fundashon Akademia di Beisbòl Brievengat (FABB). Na komienso tabata kategoría Little League so, pero último añanan ta kategoría Minor i Little. RBC Royal Bank spònser number 1 di Little League ya pa 20 aña, e aña aki a firma kontrakt pa spònser torneonan tambe. Tabata e intenshon pa spònser Torneonan Creme de La Creme di Little/Minor League,  Torneo Shon Ki Nicasia ku ta Junior/ Senior i Torneo Vernon Isabella ku ta Little/Minor League.  Tur e torneonan aki a keda kanselá, debi na e pandemia Covid-19.

* * * * *

Nos ta bai un ratu pa Beisbòl di Hulanda, kaminda tin basta kambio pa temporada 2021 ku tin basta Yu di Kòrsou den e traspasonan. Roger Bernadina èks Big Leaguer yu di Wilson Obispo, lo bai hunga den Curacao Neptunes.  Roger Bernadina di 36 aña a debutá ku 24 aña na 2008 ku ekipo Washington Nationals den Major League Baseball. Ela aparesé último na 2014 ku ekipo Los Angeles Dodgers den MLB. Nos èks Big Leaguer a hunga ku Washington Nationals, Philadelphia Philles, Cincinnati Reds i Los Angeles Dodgers den MLB. Tambe ela hunga último tempu den Kia Tigers na Sur Korea  (2017 – 2018) i Rakuten (Lamigo) Monkeys (2019).  Na 2020 Roger Bernadina a hunga den Quick Amersfoort i na 2021 e lo ta den Neptunus.

* * * * *

Mas hungadó di Kòrsou i Dutch Caribbean (Aruba tambe) ku lo kambia di klup ta Jair Bogaerts, pia di ohochi di Big Leaguer Xander Bogaerts di Boston. Jair Bogaerts lo bai Hoofddorp Pioniers. Nòmbernan konosí di Aruba ta Ryan Huntinton ku tambe a bai Pioniers. Tom Stuifbergen veterano picher derecho di selekshon Hulanda lo bai DSS Kinheim.  Stuifbergen di 32 aña a firma ku Minnesota Twins, pero no a yega Big League. Stuifbergen tabata den e selekshon di Hulanda di 2011 ku a bira kampion Mundial na Panama. Mas hungadó konosí ku ta menshoná ta Darren Winklaar ku a bai Silicon Storks. Ta trata di yu di Rensley Winklaar ku a move bon den Groot Kwartier Hubenil i Dòbel A.
* * * * *

Mas kambio na Hulanda pa Silicon Storks, ekipo ku tin komo manager Eugene Henson, èks profeshonal, èks sòftbòlista Yu di Kòrsou i ku ainda ta move den Beisbòl. Eugene Hensen ta un dje lidernan di e ekipo Curacao Legends, ekipo 40+ ku ta move pa Kòrsou i Aruba den Weganan di Reino di 40+. En todo kaso, mas hungadó konosí ku a bai Silicon Stroks ta Yerson Rosalina, Yurdion Merite, Joran Boekhoudt (Aruba), Gedeon Ocalia, Tarich Campagnard i Renaigel Martis. Nòmbernan konosí ku a bai biba na Hulanda pa traha òf studia. Ku basta informashon di Hulanda nos ta keda te aki pa awe.

‍

‍