Fanátikonan di Deporte Kòrsou bon dia. Nos tei atrobe kargá ku informashon di Beisbòl lokal i algu internashonal. Den Beisbòl lokal e kampionato di Beisbòl Veterano ta terminando. Jandoret Raiders a gana wega number 1 ku skor di 12-1 di Quality Stars i wega number 2 a keda suspendé pa motibu di mal estado di tereno. E wega lo sigi djasabra 2’or na Vi Jansen Ballpark. Wega number 3 si ta nesesario lo ta djadumingu na mesun orario. Ainda ta pendiente pa finalisá e kategoría di Liga 50. Ekiponan Yesterday i Sigi Hunga tabata pendiente pa hunga semi-final pa despues e ganadó bai topa Jandoret Raiders den e gran final 50+ di Beisbòl.
* * * * *
Djasabra último BEVEKO a duna homenahe na Renato Anasagasti, un dje grandinan di tur tempu den Beisbòl, pa hopi sigur entre e mihó 5-nan di tur tempu. Pa loke ta trata hit batí den Beisbòl Dòbel A, práktikamente tur hungadó ta keda hopi leu for di Renato Anasagasti, debí ku ela hunga kasi 33 aña den Beisbòl Dòbel A. Ainda Nato ta aktivo den Beisbòl Veterano 40+ komo kuarto bate i atrobe Renato a bati pa un average haltísimo riba 500 punto.
* * * * *
Saludo pa Raymond Soerka, picher estelar di ekipo Marchena Stars den Beisbòl Veterano. Apesar di su edat rumbo pa 57 aña, hopi ekipo tin interes den Ray Soerka ku ainda ta picha riba nivel haltu. Soerka tin un bate respetá i por kècha tambe ora tin mester. Ray Soerka a gana 4 wega i pèrdè 3 den kampionato di Beisbòl Veterano. Ray Soerka ta di dos den inning pichá ku 36.1 inning tras di Raymond Martes di Santa Rosa Indians. Ray Soerka por defendé tur posishon den kuadro ainda. By the way, nos a risibí e sifranan di Beisbòl Veterano pa loke ta trata e kampionato regular. Na momentu ku tin un kampion e wikènt aki, lo tin entrega di premio na ekiponan i na ganadónan individual. Danki na e trabou di Shendy Cras, BEVEKO por disponé di e sifranan pa por entregá premio e wikènt aki.
* * * * *
Segun sifranan ku nos ta disponé di dje, Michelangelo ‘ Lo’ Celestina di Isla Crackers tin e averahe mas haltu den Beisbòl Veterano den 2020. Lo Celestina a bati 11 hit den 16 turno i tabatin 23 aparishon na plato den 12 wega ku su ekipo a partisipá. Basta hungadó ku average haltísimo den Beisbòl Veterano den 2020. Ménos wega mas chèns di mantené bo average haltu. Dennis D’Arnault di Isla Crackers tambe tabatin un average haltu di .625. Ramiro Balentina di Santa Maria a bati .593 i ta lider apsoluto den homerun ku 5. Merieldo Trinidad a keda na di dos lugá ku 3 homerun. Orsendo Clemencia ku a gana 5 wega i no a pèrdè un, tin un ERA di 0.48.
* * * * *
Saludo pa nos amigunan di ekipo Flamboyan ku a kumpli 20 aña djamars 1 di desèmber. Ekipo dirigí pa Rudy Brunken ku ta fokus riba ambiente i despues ta bini ganamentu. E ekipo a djoin ku Crazy Tigers i por spera ku un ora pa otro e ekipo menshoná lo por bira kampion. E hungadónan di Flamboyan (50+) a pasa pa Curacao Super Stars den Liga 60+. Flamboyan tabata rumbo pa play-off den Liga 50 i faborito pa yega final entre ekiponan Ban Serio, Marlins, Pitufos, Jaws ets. Kampionato a keda suspendé i probablemente lo no hunga e kampionato ei mas i den 2021 lo mester kuminsá di nobo. Flamboyan a sali supkampion di Liga 50 na sigur 3 okashon. Un biaha mas pabien na Rudy Brunken i su ekipo Flamboyan Tigers.
* * * * *
Isla Crackers tabata un dje ekiponan ku bateo kolektivo mas haltu durante kampionato regular i a terminá number 1 ku 11 ganá i 1 pèrdí. Den play-off Round Robbin, Isla a klasifiká ku rekòrt di 2-3 i a terminá na di 3 lugá, pa despues pèrdè pèrtá kontra Jandoret Raiders. Moveshonan ta sigi den Beisbòl Veterano i den Dòbel A tambe. Santa Rosa Indians ta reforsando formal, Santa Maria tin dos outfielder i un picher na kaminda pa temporada 2021. Marchena Stars ta tirando bara di hak den un di e ekiponan sotanero ku a hunga buelta pèrdèdó. Parse ku tin un ekipo di Latino na kaminda tambe. Tin hende ta pensa ku ta net bon pa hunga un buelta, despues den pul i finalmente laga 6 ekipo klasifiká. Tur ekipo lo hunga 19 wega di kampionato regular. Nos ta keda te aki pa awe.
