Fanátikonan di Deporte Kòrsou, bondia i felis siman. Play-off final di Beisbòl Dòbel A entre ekiponan Santa Rosa Indians i Wild Cats a sigi djadumingu atardi bai kue anochi na Tio Daou Ballpark. Nos a risibí un grabashon kaminda algún músiko den Santa Rosa Indians a pone un show promé ku wega start den dugout. Fanátikonan no tei pa pone amiente i hungadónan mes ta poniendo ambiente durante wega. Fanátikonan tin masha gana di bini wega, pero mester keda kas i sigi wega via medionan di komunikashon.
Hungadonan (musiko) di Santa Rosa animando pisá promé ku wega start
* * * * *
Siman pasá nos a bai bèk den tempu riba e ekiponan kampion di Wild Cats i Santa Rosa den pasado. Nos a hasi menshon di Santa Rosa di 1986, 1987 i 1988. Na 2003 Santa Rosa a bira kampion despues di a warda 15 aña. Tabata riba un djasabra 18 di òktober 2003 Santa Rosa Indians Nevada a titulá kampion di Beisbòl Dòbel A ganando Santa Maria Pirates 8-3. E wega final a tuma lugá den Stadion Johnny Vrutaal. Nos ta kòrda Eithel Mari tabata manager i Juvenal Leonora tabata e MVP.
* * * * *
Wild Cats a keda di bini ku algún kambio den alineashon pa e wega di djadumingu. Djasabra e wega number 2 di e seri final a keda suspendé pa motibu di mal estado di tereno di Stadion Johnny Vrutaal. Hopi a puntra dikon no a bai ku e wega Tio Daou Ballpark for di djasabra, pero mester bisa ku tin algún detaye logístiko i di gastu ku mester tene kuenta kuné. Stadion Tio Daou tin su gastunan kuné i Stadion Johnny Vrutaal ta den man di FEBEKO.
* * * * *
Algun hungadó a sali bon den e seri final entre Wild Cats i Santa Rosa Indians, entre otro Ildion Martina i Riordan Windster di Santa Rosa. Ildion Martina i Riordan Windster ku a dal 2 hit den 4 turno. E otro hit di Santa Rosa Indians tabata di Aldair Daal. Aldair ku ta ruman di Calten Daal a bati di 4-1 den e promé wega di e play-off. Swindley Lint a bati di 4-0, pero tabatin 3 Quality at Bat. By the way, koredónan ta kue ventaha grandi riba Jair Jurrjens i a roba 3 base relatívamente fásil.
* * * * *
Di parti di Wild Cats tabata Rojean Cleofa ku a bati nobeno bate i bati di 2-2. Calten Daal, Randy Kirindongo, Yurendell de Caster i Terrence Josephina a bati di 4-1. Santa Rosa ta keda riba nan wega chiki di hit and run, mièntras Wild Cats ta buska e bataso grandi. Parse ku Wild Cats tabatin intenshon di bini ku Reangelo ‘Bob’ Beaumont komo kètcher i Risandro Pastor komo picher. E kombinashon ei lo bai para e robamentu di base di Santa Rosa Indians. Maneho di Wild Cats a opta pa laga Hendrik Clementina kecha. By the way, Jair tabata baha 90 mia djaweps kontra di Santa Rosa.
* * * * *
Awe nos lo dediká un tiki tambe na e Beisbòl Veterano ku ta tumando lugá na Vi Jansen Ballpark. Tin indikashon ku direktiva lo legumai e asuntu di hunga weganan di konsolashon i lo hunga Round Robbin kaminda ekiponan lo hunga dos wega den wikènt. Ekiponan lo mester vota djamars kon ta bai sigi despues ku a terminá e buelta regular. Ekiponan ku a kaba number 7, 8, 9, 10, 11 i 12 no ta interesá pa hunga weganan di konsolashon i a partisipá esaki na direktiva di BEVEKO.
* * * * *
Ekiponan ku a klasifiká den Beisbòl Veterano ta Isla Crackers, Jandoret Raiders, Quality Stars, Santa Maria Pirates, Bulldogs i Santa Rosa. Despues di e Round Robbin e mihó kuaternan lo sigi pa semi-final. Tin indikashon ku Beisbòl Veterano lo terminá promé ku fin di Novèmber. Tin chèns ku por kaba medio Novèmber, dependé kon bai ku e serinan semi-final. Den wikènt ekiponan Santa Rosa Memories, Jandoret, Bulldogs i Santa Maria a gana. Santa Rosa a gana Vosama 4-3 den un wega krusial i importante pa Santa Rosa pa asina sigurá nan klasifikashon. E wega a bai tie break i Santa Rosa a laga Vosama den tereno riba hit by pitch. Jandoret a laga Quality Stars den tereno ku skor di 4-3. Awe nos tin e resultadonan i den kurso di siman mas detaye di Beisbòl Veterano. By the way Santa Rosa ta bai dilanti 2-0 den e seri ku viktoria di 6-4 riba Wild Cats.
