Fanátikonan di Deporte Kòrsou bondia i felis wikènt. Djasabra, 5 di desèmber pa 2’or pm tin wega number 2 di e seri final di Beisbòl Veterano entre Jandoret Raiders i Quality Stars. Si ta nesesario lo hunga wega number 3 di e seri final djadumingu 2’or. Esnan ku a sali lider den bateo i den picheo mester ta presente pa risibí nan premio djasabra awor na Vi Jansen Ballpark. Si awaseru permiti lo ta e último wikènt di Beisbòl Veterano 40+. 50+ mester terminá ainda kaminda Jandoret Raiders ta pendiente di ganadó entre ekiponan Sigi Hunga i Yesterday.
• * * * * *
Sifranan di Beisbòl Veterano ta riba e wepsait kustumbra www.allprosoftware.net/ligabeveko. Tur ekipo por wak nan sifranan i analisá pa otro aña. Ta spera un aña grandi pa Beisbòl Veterano den 2021 debí ku ta masha hopi hungadó nase 1980 i 1981 ta subiendo. Esnan nase 1982 ta loko pa kumpli 40 pa kaba. Beisbòl Veterano a bira hopi kompetitivo. Plannan tei pa esnan 50+ por move normal riba djadumingu, sea na Vi Jansen Ballpark mes òf na un otro parke na Kòrsou, Tio Daou, Heintje Kool of Stadion Johnny Vrutaal. E preis di Stadion Johnny Vrutaal a spanta e komishon enkargá ku 50 un tiki. Pa otro aña tin 4 tim sigurá, Jandoret, Sigi Hunga, Yesterday i Vosama. Ta pendiente pa dos tim mas. Blue Hawks di añanan 80 i un ekipo di Dolfi Mercera.
• * * * * *
Dimitri Leon, hungadó di Swift den Liga van Engelen ta sigi destaká den tenis di mesa tambe. Resientemente ela logra su di 8 título di Kòrsou. Dimitri falta dos título mas pa empatá e marka di e legendario èks hungado di ping pòn, Robert Hose. Dimitri tabata prospekto grandi den Beisbòl tambe pero a skohe pa hunga Slowpitch den ekipo Swift i ratu ratu den Pin Pòn. Dimitri yu di Sergio Leon i ruman di Sergei Leon ta pendiente pa djòin Beisbòl Veterano na momentu ku e kumpli 40 aña. Segun nos Dimitri falta mas o menos 4 aña mas pa drenta. Den komienso di aña Dimitri a hunga den Swift kontra di Quality den un wega amistoso. Sergei Leon tambe falta algun aña pa yega Beisbòl veterano.
• * * * * * *
Varios hungadó ku a hunga den selekshon di Senior League na 1999 ta yegando 40 aña. Hopi di nan ku no a hunga den e selekshon ei tambe ta na kaminda pa 40. Evenon Martis, Dayron Matrona, Carlton Daal, Andley Simmons, Farley Kip, Joey Balentina, Ryency Imperator, Gideon Sambo, Ardley Jansen ets. Nos lo sigi esnan ku ta kumpiendo 40 aña djaserka. Esnan nase 1981 tin entre otro Vernon Isabella i Dave Kirindongo. Tin rumor ku Bulldogs ta duru riba Dave Kirindongo i otro vershon ta ku famia Jansen (Verney, Kenley i Ardley) lo tuma Bulldogs for di Denley Marten.
• * * * * * *
Trahando riba e kolumna aki nos a risibí lista di esnan ku a gana premio individual den Beisbòl Veterano. Ekipo Marlins di nos amigu Cox Marlin a gana e premio di ekipo mas disiplina. Orsendo Clemencia di Jandoret a bira kampion picher, Michelangelo Celestina di Isla kampion bate i Ramiro Balentina di Santa Maria Pirates lider di homerun. Ta pendiente naturalmente pa premionan Kampion, Sup kampion, MVP play-off final i Premio All Star Game.
• * * * * *
Pa loke ta trata Beisbòl Dòbel A, presidente di FEBEKO, Jedrek Magdalena ta pendiente pa reakshoná riba e deklarashonnan di general manager di ekipo The Champs, Glenn Pieternella. Jedrek ta sigur di loke FEBEKO ta para i ta akuerdonan ku a keda aseptá durante reuniun general di FEBEKO. Nos ta referí na e asuntu ku The Champs mester reforsá ku hungadónan di Dòbel A na momentu ku nan subi den 2021. Interesante pa sa kon beisbòl lo move den 2021 despues ku profeshonalnan i hungadónan di nivel haltu di College na USA tabata por a kompetí den e kampionato di Beisbòl Dòbel A I Klase A.
• * * * * *
Masha tempu nos no a bai den historia i menshoná nòmber di grandinan of hungadónan hopi konosí tempu di nan tempu den beisbòl Dòbel A. Renato Anasagasti a haña rekonosementu atrobe djasabra último promé ku wega final di Beisbòl Veterano. Ata algun nòmber aki Cedric ‘Papa’ Martina, Spencer Mills, Erwin Curial, Eithel de Caster, Elroy Ersilia, Weni Jakoba, Raffy Josega, Johnny Alberto (QEPD), Alfred Borgschot (QEPD), Andre Jones (QEPD), Tonka Cicilia (QEPD), Ramsey i Perry Sprock (tur dos ruman QEPD), Elvin, Elio i Rudy Anastasia, Nelson Guitierrez, Ushley Kirindongo, Floyd Garnette, Kenneth Mongen. Nos lo sigi menshoná nòmber e dianan benidero i mas detaye di e hungadónan konserni.
