Fanátikonan di Deporte Kòrsou bon dia i felis siman. Final di Beisbòl Dòbel A kayente ruman. Wild Cats a gana djadumingu anochi i e seri a empatá sensashonalmente na 3. Djaweps dia 15 di òktober lo tin wega finalísimo. Djasabra anochi e wega tabata kandela mes mes. Na varios okashon ekipo Santa Rosa tabata ariba i tambe ekipo Wild Cats. Finalmente Wild Cats a gana ku skor di 6-5 djasabra riba base por bola ku base yen ku dos out den di nuebe inning. Tene kuenta ku mester wak pa e wega bai 9 inning i tene kuenta ku e Toke de Keda ku pa 11’or tur hende mester ta na kas.
* * * * *
Bèk pa e wega di djasabra, e picher slengu di Wild Cats Kennimar Leocadia tabata klave den relevo pa Wild Cats tirando 4 inning i 1 tersio tumando solamente un kareda (un kareda shushi) pa bira e picher ganadó. Jordan Lucas ku a tira 8.2 inning balente a resultá e picher pèrdèdó. Kennimar tabata leshoná i no a tira masha pa Wild Cats durante 2020. E picher slengu aki a tira dos wega durante kampionato regular dia 19 di ougùstùs kontra Groot Kwartier i despues dia 2 di sèptèmber kontra di Firebirds. Kontra Santa Rosa Kennimar a tira 3 wega den play-off, tur tres wega den relevo. E tabatin solamente un kareda limpi permití den e play-off final aki den 5 inning i dos tersio tirá te ku e wega di djasabra. Djadumingu ela tuma dos kareda limpi den un inning di trabou. A resultá ku Kennimar no tabata kla pa tira djadumingu despues di 51 lansamentu djasabra.
* * * * *
Wild Cats tabatin e picher Richard Moesker Jr tambe den komienso di temporada, pero ku for di komienso di sèptèmber no a presentá mas i naturalmente nos a hunga play-off. E ekipo Wild Cats tin basta hóben ku por hasi e trabou, hóbennan bou di 18 aña ku a hunga den Hubenil ku a firma profeshonal òf ta pendiente pa firma. Entre otro Jeadiah Kwidama, Joharvy Martinez i Klevert Martina. Ta trata di pichernan ku por yega 90 mia pa ora. Djasabra Klevert Martina a tira 3 inning i Joharvy Martinez a tira 1.2 inning. Dos picher ku a yuda den e viktoria di Wild Cats di djasabra. Klevert a tira 91 mia ku ta e bala ku mas velosidat ku naradó i komentaristanan a midi e aña aki den Beisbòl Dòbel A. A kuminsá midi velosidat di pichernan den play-off.
* * * * *
Wild Cats a kambia nan stail di hunga kompletamente den wega number 4 i wega number 5. Batimentu kontrali ku koredó na segunda, hopi toke di sakrifisio, bai den konteo ets a duna resultado. Yurendell de Caster di dos bate i Daytan Biegel, tersera bate a sakrifiká (toke) den e wega di djasabra. Santa Rosa a keda ku nan wega chiki i nan ta keda peligroso. No deskartá Santa Rosa den niun wega, nan ta keda hasi kontakto i keda pone preshon riba Wild Cats ku tabata faborito na komienso di e seri. Despues kosnan a bòltu formal i Santa Rosa a bira faborito i ta faborito te ku promé ku wega number 6. Si tin wega number 7 siiiiiii... kosnan lo bòltu pa loke ta trata e faboritismo.
* * * * *
Nos tin e numeritonan pa loke ta trata e seri final aki. Pa loke ta e seri final Santa Rosa despues di 5 wega a nota 31 kareda, Wild Cats 24 kareda. Santa Rosa a konektá 55 hit, Wild Cats 44 hit. Santa Rosa a kometé 6 eror (3 den wega number 4). Wild Cats a kometé solamente 1 eror den e promé 4 weganan ku tabata un parti hopi fuerte. Djasabra Wild Cats a kometé 4 eror pa yega 5 eror kometé den e promé 5 weganan. Despues di 6 wega Santa Rosa 36 kareda, Wild Cats 33 kareda. Santa Rosa 67 hit, Wild Cats 57 hit. Eror tur dos ekipo tin 8 eror kometé den 6 wega.
* * * * *
Despues di 5 wega Terrence Josephina di Wild Cats a bira lider den bateo pa loke ta trata e play-off final ku avg. di .467. Terence a bati 5 hit den su último 7 turnonan. Ta e dos weganan ku Wild Cats a logra gana di Santa Rosa, esta weganan di djaweps i djasabra último. Jurgen Statie di Santa Rosa tabata lider promé ku e wega di djasabra ku average di .625. Ela baha den averahe pero bati di 4-4 djadumingu i ta ldier atrobe. Den RBI Shakir Albert ta lider ku 6 RBI. Pa loke ta trata averahe di kareda limpi, Jordan Lucas tabata lider, pero despues di e wega di djasabra Marvin Ludwika ta lider den ERA ku 1.50. Jair Jurrjens ta keda lider den ponche tirá i number 2 a bira Klevert Martina ku 1 ponche djasabra último. Djamars Klevert a drenta di relevo i tira 7 ponche. E tin 8 ponche total. Risandro Pastro tin 9 ponche tira.
