Fanátikonan di Deporte Kòrsou, bondia. Nos tei atrobe den luna di desèmber, riba un djasabra 12 di desèmber. Na promé lugá nos ta anunsiá atrobe ku e wega òf e ininng(nan) finalísimo di final di Beisbòl Veterano a keda posponé ta otro aña.  Hopi no ke kere ku ta sigi otro aña. E wega no a keda posponé pa direktiva di BEVEKO, pero outoridatnan a papia ku presidente i konvensé pa para e aktividatnan di Beisbòl Veterano te otro aña. Muchu fanátiko, muchu hende na Vi Jansen Ballpark i no ta responsabel pa organisá e wega ei na Vi Jansen Ballpark tampoko na otro parkenan. Ta teme ku e fanátikonan entusiasmá di Beisbòl Veterano lo bin parke tòg, ku ta bai redundá den hopi trabou pa polis, VKC i demas outoridatnan. Esei no ta bale la pena i a suspendé e wega final. Ekiponan a keda poné na altura den kurso di e siman ku ta pasando aki.

* * * * *

Awor si práktikamente tur deporte a terminá pa loke ta trata 2020. Kampionato bola 8 di Federashon Biar a yega na su fin wikènt pasá i e ekipo Breaking Bad a bira kampion.  Bèk pa Beisbòl Veterano, ta despues di hopi aña e kampionato di Beisbòl Veterano no a terminá den mesun aña. Nos ta kòrda na 2010, e aña ku awaseru a kai for di komienso di novèmber te ku fin di desèmber bai kue yanüari 2011, varios liga no por a terminá nan kampionato. Beisbòl Veterano si a terminá su kampionato e aña ei dia 19 di desèmber 2010 kaminda The Bears a gana di Santa Rosa Memories ku skor di 3-2. Un públiko grandísimo tabata presente debí ku tur wikènt e wega final tabata keda suspendé pa motibu di awaseru òf mal estado di tereno.

* * * * *

En todo kaso pa loke ta trata Beisbòl Veterano 2020 tur kos a terminá i nos ta pendiente pa desishon di direktiva pa wak kiko ta bai pasa. Tin indikashon ku lo hunga e wega ei den 2021, kaminda lo start den kabes di e di 7 inning ku Emile Haswell na bate i dos out. Jandoret komo ekipo di kas lo bin bati despues.  Tur kos ta den man di direktiva ku probablemente lo bai reuní ku ekiponan den e dianan benidero. Un kampionato ku apesar di Covid-19 a move bon, pero lástimamente no por a terminá despues di basta aña.  Mester apuntá ku Beisbòl Dòbel A no a terminá kampionato 2019 pa promé biaha den historia, no pa motibu di Covid, pero debi ku direktiva di FEBEKO a hala kita na momentu ku un moshon di deskonfiansa tabata na kaminda.

* * * * *

Probablemente entrega di premio na ganadónan individual tambe lo tuma lugá otro aña. Pa otro aña si lo mester pone e kriterianan ken ta bini na remarke pa e premio individual.  Nos a komentá esei hopi ekstenso den e edishon di djaluna.  Saludo pa Ray Zoerka, e picher ku tin mas título di kampion picher riba su nòmber.  Laga nos bai wak kua batiadó a yega di kue mas ku un kampion bate den historia di Beisbòl Veterano. Renato Anasagasti, Roque Zimmerman, Tyron de Palm, Richel Angela, ets. Ramiro Balentina a sali lider di homerun pa di dos biaha.

‍

* * * * *

Miéntras tantu mester wak kiko ta bai pasa den 2021 den deporte i espeshalmente e deportenan ku nos ta skibi di dje, esta Slowpitch i Beisbòl Veterano.  Varios liga a start i no a terminá, entre otro Liga di Nos Tur, Liga 50 i Liga Amstel. Liganan Streanan di Ayera, Liga van Engelen i Liga 40 no a start mes. Liga 40 mes ta bayendo atras i mester bai bèk na 7 pa 8 tim. Beisbòl Veterano ta sigi krese formal i por spera ku hasta Beisbòl Liga 50 lo krese.  Beisbòl Veterano tabatin asina tantu fanátiko djadumingu último, ku Polis mester a para kos. Un kos serio Beisbòl Veterano ta pa loke ta trata presensia di fanátiko. Mester bisa si ku na 2019 no tabatin tantu fanátiko asina pa mira final. Mas o ménos 1/5 parti òf ménos di loke tabata djadumingu último.  Nos ta keda te aki pa awe. Te otro siman ku Poder di Dios.

‍