Fanátikonan di Deporte Kòrsou Beisbòl, felis siman. Beisbòl Dòbel A kayente despues ku tantu ekiponan Santa Rosa Indians i Wild Cats a empatá e serinan semi-final di Beisbòl Dòbel A. Djabièrnè Santa Rosa a zona un kampanaso riba ekipo Royal Scorpions ganando 6 pa 2. Djasabra Wild Cats a gana Santa Maria 11 pa 8 den un wega basta aksidentá kaminda dugoutnan a bira bashi algun biaha. Djadumingu Santa Rosa a dal Royal Scorpions duru ku skor di 9 pa 1 i hasi e seri 2-1 na fabor di Santa Rosa.
* * * * *
Santa Rosa Indians a usa 4 picher pa gana e ekipo di Royal Scorpions ku skor di 6-2 djabièrnè anochi den Stadion Johnny Vrutaal i nos tabatin detayenan di e wega i awe nos tin algun komentario den Deporte Kòrsou. Royal Scorpions a gana e promé wega ku skor di 13-1. E di dos wega Santa Rosa a nota 1 kareda den di 4 inning, 3 den di 5 inning i 2 den di 6 inning pa yega na 6 kareda, miéntras Royal Scorpions a nota 1 den promé inning i 1 den di 8 inning. Santa Rosa a habri ku e slengu Marc Hennep ku a varia su lansamentunan i yega 4.2 inning. E relevista Jerrison Beaumont ku a tira solamente 0.2 inning a bira e picher ganadó. Marvin Ludowika a tira 1.2 inning i Hershelon Juliana 2.1 inning. Shurandy Valeriano a habri e wega pa Royal Scorpions i resultá e picher pèrdèdó. Ela tira 5 inning kompletu. Otro pichernan di Royal Scorpions tabata, Orsen Josephina (2.0 inning), Geriyon Jakob (0.1 inning) i Cerilio Soleana (0.2 inning).
* * * * *
Marc Hennep tabata tira lansamentunan bastante slow i dominá e resio batiadónan di Royal Scorpions fásilmente. Royal Scorpions tin bon picheo i bon poder na bate. Nos a mira tantu Marc Hennep djabièrnè komo e picher Jordan Lucas djadumingu pa Santa Rosa tabata tira e kambio stret gewon riba un rust riba e batiadónan di Royal Scorpions. E kambio stret ei, no e kambio di drai, (esta no e kurva i slider) ta resultando hopi efektivo. Bateo di Royal Scorpions ta .304 entre e lidernan, defensa i picheo tambe ta bon. Promé ku play-off ta Royal Scorpions tabatin e mihó picheo pa loke ta trata efektividat di 3.01.
* * * * *
Pa loke ta trata e seri semi-final mester bisa ku ya e weganan di djamars dia 22 i djarason dia 23 ta nesesario. Si e serinan lo a bai 3 wega for di dia 21 di djaluna sèptèmber, esta awe, serinan lo por a kaba. Si tur dos seri bai 5 wega, e semi-finalnan lo terminá dia 25 di sèptèmber. Awe djaluna tin wega number 3 di e seri entre Santa Maria i Wild Cats. Den e promé wega ekipo Santa Maria a gana di Jair Jurrjens i Wild Cats ku skor di 5-3. Djasabra Wild Cats ku bon picheo di e picher i hungadó di utilidat Risandro Pastor a gana 11-8.
* * * * *
Pastor a tira 5 inning, tuma 5 kareda pa bai ku e viktoria. 3 di e 5 karedanan ku Pastor a tuma tabata limpi. Sidney Antonia, Klevert Martina, Jediah Kwidama i Ruwensley Bonifacio tambe a picha pa Wild Cats. Wild Cats a konektá 4 homerun. Reangelo Beaumont, Daytan Biegel, Hendrik Clementina i Randolph Kirindongo a dal homerun pa Wild Cats. Pa Santa Maria a habri Arlison Rodriguez, ku a tira 1 inning i tuma 5 kareda limpi. Claycandy Hariquez, Evenon Martis i Lousandry Henriette tambe a picha pa Santa Maria. Henriette a tira tremendo, 4 inning, 2 hit i 0 kareda permití.
* * * * *
Klevert Martina a tuma 3 kareda den 0.2 inning pa Wild Cats. Pichernan di Wild Cats Ruwensley Bonifacio i Jediah Kwidama ta tira bastante duru. Mester bisa si ku ta e pichernan ku por dominá i pone e bala slow kaminda nan ke ta dominá den e play-off. Pichernan habridó ni esnan relevista di Santa Maria no tabata skèrpi den e wega di djasabra. Lousandry Henriette manera nos a skibi den e alinea anterior tabata tremendo i ta trata di un picher di Hubenil di Santa Maria. Hungadó/picher ku semper a hunga den Liga Pariba i den kasi tur selekshon. Ela start ku Santa Rosa i despues bai Van Engelen.
