Liga 50 a sigi ku homenahe na 3 baluarte i nan famia
WILLEMSTAD - Djasabra 30 di mei Liga 50 di Sòftbòl a kontinuá na Van Engelen Ballpark. Tabatin e apertura ofisial ku un seremonia kaminda a honra 3 baluarte ku den pasado a nifiká hopi pa Liga 50 Sòftbòl. E baluartenan eligí pa e aña aki, Eithel "Chapipi" Brunken, Ronald "Ronnie" Jardinier i Edsel Celestina, tabata presente huntu ku nan famia. E MC, Jeffrey Martina, a presentá e baluartenan aki i a pasa riba nan CV naturalmente den presensia di nan famia.
A sigi spich di presidente di Liga 50, kende ta Rensley Martis, pa despues hasi entrega di plakat na e baluartenan ariba menshoná. Despues, e baluartenan, den kompania di nan famia, a subí tereno pa tira e promé bala pa duna inisio ofisialmente na e kampionato 2026. E baluartenan a risibí felisitashon di e representantenan di e ekiponan presente i naturalmente di esnan ku tabata kla pa hunga e weganan ku a sigi.
RESULTADONAN
Djasabra 30 di mei
Marlins 9, Pitufos 5
Baby Alcantara tabata e picher ganadó; Amarildo Coffie a bati di 4-2.
Ban Serio 11, Sluggers 1 Miro Daal tabata e picher ganadó; Kelvin Winklaar a bati di 2-2.
Jaws 7, Lions 4 Fernando Rosario tabata e picher ganadó; Bienvenido Martinez a bati di 2-2.
Baranka 17, Flamboyan 7 Kenny Hellement tabata e picher ganadó; Julius Veeris a konektá 3 hit den 3 turno.
Teksto pa pòtrèt:
Eithel Brunken ta tuma su plakat den kompania di su famia for di man di e presidente di Liga 50, Rensley Martis.
Ronald Jardinier i famia ta risibí homenahe i plakat serka e presidente di Liga 50, Rensley Martis.
Edsel Celestina i famia ta risibí su plakat for di man di e presidente di Liga 50.
E baluartenan Eithel Brunken, Edsel Celestina i Ronald Jardinier ta tira e promé bala den presensia di nan famia i direktiva di Liga 50.
Rensley Martis, presidente di e Liga, na palabra.
Hungadó, direktiva i miembronan di Liga 50 ta felisitá e baluartenan.
Fanátikonan di Deporte Kòrsou bon dia. Nos ta siguí awe ku informashon di Liga 50 i informashonnan di Beisbòl. Nos tin e reportahe di e homenahe ku tabatin pa 3 baluarte di Liga 50. Ta trata aki di Ronald Jardinier, Aithel Brunken i Edsel Celestina. Djadumingu tabatin e homenahe di Liga 60, di kual nos lo duna mas detaye den e edishon di djabièrnè awor. Nos tin e resultadonan di Liga 50 ku a tuma lugá dia 30 di mei na Van Engelen Ballpark, Marlins a gana Pitufos ku skòr di 9-5, Ban Serio a gana Sluggers 11-1, Jaws a derotá Lions 7-4 i Baranka a nòkout Flamboyan 17-7. Djasabra awor e weganan lo ta Lions kontra Flamboyan i Baranka kontra Jaws ku mester bira e wega di dia. Despues ta siguí Ban Serio kontra di Artemisia i e último wega lo ta entre Sluggers i Jandoret Raiders.
* * * * *
E standing di Liga 50 ta, Marlins 3-0, Ban Serio 3-0, Jandoret 2-0, Lions 1-1, Jaws 1-1, Baranka 1-2, Artemisia 0-1, Pitufos 0-2 i Sluggers 0-3. E promé 7 ekiponan lo klasifiká den Liga 50 manera tabata e kaso e último dos añanan. E ekiponan ku kaba na number 1, 2 i 3 ta bai direktamente pa e playoff semifinal, miéntras ku lo tin un 'wild card' entre e ekiponan ku terminá na number 4, 5, 6 i 7. Esaki ta un tremendo idea debí ku e kampionato ta keda bibu te na e último fechanan di e buelta regular. Pa loke ta Liga 60, tabatin 3 wega djadumingu 31 di mei na Frank Curiel Ballpark: Pitufos a gana Los Amigos 5-4; e wega aki a keda disidí pa medio di lòt despues ku e partido a keda empatá na 4 kareda i a bai dos 'tie-break'. E siguiente wega Jaws a gana Curaçao Super Stars ku skòr di 13-0. Den e último wega di djadumingu, ekipo Nos Tambe Por a dal Nos Power ku skòr di 9-0.
* * * * *
Nos a mira un publikashon kaminda FEBEKO ta hasi anunsio di un inskripshon pa Beisbòl 40+. Nos lo bai drenta den kontakto ku tantu e dirigentenan di BEVEKO komo di FEBEKO pa wak si ta un 'joint venture’ tin . Beisbòl Veterano a keda di start den luna di yüni; awe djamars tin reunion general i dia 5 di yüni ta e último fecha pa traspaso. Dia 12 di yüni ta e último fecha pa entregá lista di hungadó, dia 17 di yüni e listanan lo keda publiká, pa asina dia 20 di yüni e kampionato start ofisial. Pa loke ta trata Liga 40, e kantidat di ekipo a keda na 8, miéntras ku den Liga 50, Jandoret Raiders a stòp di hunga 50+ i un ekipo nobo lo drenta, loke ta lagá e kantidat di ekipo na 5 den e kategoria ei.
* * * * *
Un saludo pa Gai Lihé, kende a reklamá nos ku nos no a pone ku ekipo Nos Goso a salí e ekipo mas disipliná den Diamond Stars League. Ekipo Nos Goso a salí ekipo mas disipliná bèrdat, pero nos no a risibí e dato ei for di e komishon organisadó na promé instansia. Nos Goso ta di spònser pa Gai Lihé. En todo kaso, Nos Goso a salí na di 3 lugá i alabes e ekipo Mas Disipliná. Esaki ta un tempu despues ku nan a dominá e kampionato dos aña siguí, ku ta añanan 2022 i 2023. Masha hopi hende a duna akto di presensia djabièrnè na Sam Bunting Ballpark pa wak e wega finalísimo di Diamond Stars League. Miéntras tantu, nos Beisbòl riba nivel Dòbel A, Klase A i Hubenil no ta risibí masha fanátiko. Liga 50 ta drei bon i Liga 60 tambe ta drei den gran forma aya na Frank Curiel Ballpark tur djadumingu. E Liga Streanan di Ayera tambe ta kargá ku fanátiko tur djadumingu na Jaguar Ballpark.
* * * * *
Nos a bai bèk den algun resultado di Beisbòl Veterano di 2018 i a mira ku hopi ekipo a stòp, manera entre otro Jandoret Raiders, Isla, The Brothers, Mi Kos i Bulldogs. Ta hopi tim a hala atras den e último añanan. Jandoret a stòp ku 50+ tambe den e aña 2026 aki i nan ta dediká awor na Sòftbòl 50+ na Van Engelen Ballpark. No ta konosí kon ta pará ku ekipo Yesterday e aña aki, despues ku vários bon hungadó a move pa otro ekiponan òf a stòp. Pa loke ta Beisbòl Dòbel A, ayera djaluna mester tabatin wega kandela entre Santa Maria Pirates i Royal Scorpions, miéntras ku awe djamars tin wega entre Santa Rosa Indians i Wild Cats. Dos wega kandela tras di otro. Awor tur wega ta kandela debí ku promé ku e weganan di e siman aki, e standing tabata: Santa Maria Pirates 6-0, Groot Kwartier Stars 3-3, Wild Cats 3-3, Royal Scorpions 1-4 i Santa Rosa Indians 1-4. Nos ta keda te aki pa awe i te mayan ku Poder di Dios.
