Fanátikonan di Deporte Kòrsou Beisbòl bon dia. Serie Mundial a start djamars ku e promé wega entre di Los Angeles Dodgers i Tampa Bay Rays. Un seri fèrfelu ku por bai tur dos banda. Los Angeles a gana e promé wega i Tampa a gana e wega number 2. Los Angeles ku su payroll di 105.5 mion, number 2 tras di Yankees ku a paga 113.9 mion den 2020. Tampa ta na number 28 di e 30 timnan den MLB. Tampa su pay-roll ta di 28.3 mion. Pittsburgh Pirates ta na di 29 lugá ku 25.1 mion i por último Baltimore Orioles, 23.5 mion. Baltimore a sali riba Boston Red Sox den divishon di Liga Americana ku tabatin un pay-roll di 83.7 mion number 3 den MLB.
• * * * * *
Ku otro palabra no ta ku sèn ta kumpra kampionato. Mester tin bon hungadó di mes, pero hopi detaye mas mester bini aserka pa bo logra anto e parti di suerte tambe mester tei. No mester stèns riba suerte sí, mester traha duru, mester hunga beisbòl manera mester ta, mester tin un bon manager ku konosé su hungadónan bon i hasi e moveshonnan manera mester ta. Den play-off of World Series mester kambia bo manera di hunga. No ta e timnan di henter aña bo ta bai enfrentá, pero ta e mihónan den e kaso aki di World Series. Aki na Kòrsou ta masha hopi fanátiko di Los Angeles Dodgers tin, hopi mes di for di tempu di kouchi boulo di aña 50, 60, 70 i 80. Ultimo biahanan ku Dodgers a bira kampion ta 1981 i 1988. Di Tampa praktikamente nos no konosé niun fanátiko na Kòrsou.
• * * * * *
Vários Yankees ku ta anti Dodgers dimes lo bira Tampa. Debí ku nan no gusta Dodgers mes i tin di nan ta bisa ku Tampa ta representá divishon Ost di Liga Amerikana. Algun Yankee ta rabiá tambe ku Tampa a sali riba nan den divishon i despues dalnan tambe den e seri di divishon. Ban wak kiko ta bai pasa pero great ku Kenley ta den World Series atrobe. Kenley su sifranan den post season ta di 1-1 ku un ERA di 2.14, den 47 wega Kenley a salba 18 wega. Den 54.2 inning den play-off ela poncha 76 batiadó. E sifranan ta bon, pero tabatin algun mal relevo kontra Houston ku tabata hòrta seña i kontra Boston Red Sox na 2018 ku tabatin e manager ku a sali for di Houston di 2017. Ya. Kiko nos por bisa, eseinan ta historia.
• * * * * * *
Na 2017 Kenley Jansen su ERA den World Series tabata 3.12 ku 0 gana i 1 pèrdí. 2 wega salba, 6 hit den 8.2 inning picha. Ela tuma 2 homerun i 2 base por bola i 8 ponche tira esei tabata kontra Houston Astros. Kenley a tira 6 wega den World Series e aña ei ku por tabata nèt un tiki dimas??. Na 2018 tambe Kenley a tira den World Series kontra di Boston na e okashon ei, Kenley tabata un ERA di 4.50 den 3 wega picha i 0 wega salba. Ela tira 3 ponche i tuma dos homerun. Bregman tersera base di Houston un dje sospechosonan grandi di kue seña di Houston a daña dos wega di Kenley. Na 2018 a manda Kenley dos dia sigi pa saka 6 out i un ke otro no a resulta. E stail ku Kenley a picha e dos ultimo weganan e aña aki ta spera Kenley den gran forma bèk den World Series. Kenley no a tira den wega 1 tampoko wega 2 di World Series.
• * * * * *
Laga nos ban rápido pa Beisbòl lokal, seri promoshon entre Royal Magic i The Champs mester a sigi ayeranochi den Stadion Johnny Vrutaal. The Champs a gana Royal Magi ku skor di 13-7. Emile Haswell ta manager di The Champs. E erornan a baha I tabatin solamente 5 eror (3 pa The Champs i 2 pa Suffisant Royal Magic). Promé ku e wega di ayeranochi e seri tabata empatá na 1. E dos ekiponan mester hisa nan nivel mas lihé posibel rumbo pa Dòbel A. Naturalmente ta un di e dos ekiponan aki por bai Dòbel A temporada 2021. E promé dos weganan tabatin 24 eror total, 12 eror pa kada ekipo ku ta hopi leu for di bon. Korementu di base tambe a laga hopi di deseá. 23 base por bola den dos wega tambe ta un hopi pero remarkabel e erornan ku a deslusí e weganan.
• * * * * * *
Varios moveshon den Beisbòl Dòbel A hopi rumor i den dianan benidero nos lo kuminsá lòsnan. Santa Maria Pirates ta tirando bara di hak den un tim grandi. Royal Scorpions tambe ta tirando bara di hak den dos tim grandi. Mientras tantu Beisbòl Veterano ta halando masha hopi atenshon te ku mester manda weganan Stadion Johnny Vrutaal. Hepa den pitu aki nos a tende ku tur wega lo keda na Vi Jansen bou di reglanan estrikto. Djadumingu awor ta 10.30 Isla – Santa Maria, 13.00 Quality Stars – Bulldogs, 15.30 Santa Rosa – Jandoret.
