Fanátikonan di Deporte Kòrsou, bondia. Beisbòl ta sigi kayente i awe tin wega number 4 di e seri entre Wild Cats i Santa Maria ku Wild Cats dilanti den e seri 2-1. Na komienso di e serinan aki ekiponan Royal Scorpions komo number 1 (10-2) di kampionato regular i Santa Maria komo (9-3) 2 di kampionato regular. Wild Cats a sali number 3 (7-5) i Santa Rosa (6-6). Royal Scorpions a nòkout Santa Rosa den promé wega i Santa Maria a gana relativamente fásil den wega number 1 i kontra nada ménos ku Jair Jurrjens.
* * * * *
Di dos i di tres wega a resultá nèt kontrali na loke hopi sigido di Beisbòl a pensa. Nos no a tende niun sigidó i analista di Beisbòl bisa òf papia den direkshon ku ekiponan Santa Rosa i Wild Cats lo bini bèk den e serinan aki. Hopi interesante mes i lástima ku no por tin fanátiko. Lo tabata yen di fanátikonan ku lo no tabatin kaminda di pone hende, tantu den Stadion Johnny Vrutaal komo Tio Daou Ballpark. Djamars Royal Scorpions a gana Santa Rosa 11-7 i fòrsa un wega desisivo. Djaweps ta kandela tin atrobe den Tio Daou Ballpark i Santa Rosa lo manda su estelar Jordan Lucas kontra di Shurandy Valeriano . Shurandy tabata tremendo den kampionato i den e wega kontra Santa Rosa djabièrnè último ela sali picher pèrdèdó pero e la tira basta bon ku 4 kareda den 5 inning. Jordan Lucas tabata magnifiko djadumingu último i a blankiá Royal Scorpions.
* * * * *
Joharvi Martinus, picher hóben di 16 aña, tabata den gran forma pa Wild Cats den relevo kontra di ekipo Santa Maria Pirates djaluna. Joharvi ku tabata pendiente pa firma profeshonal a tira 2 inning i dos tersio i a tuma solamente un hit. Ta trata di un hungadó di Hubenil ku a hunga den Little League den organisashon di Sint Michiel. Un skout a bisa nos ku Joharvi ta tira alrededór di 87 mia. Santa Maria ku no a topa Joharvi durante kampionato regular no por a bini kla ku e lansamentunan p’asina nan bini bèk den e wega.
* * * * *
Nos tin e lidernan pa loke ta trata bateo i picheo den e weganan di semi-final. Te ku djaluna tur ekipo a hunga 3 wega, Wild Cats i Santa Rosa tin 2 ganá i 1 pèrdí i e faboritonan Royal Scorpions i Santa Maria tin 1 ganá i 2 pèrdí. Rochendrick Alexander poderoso outfielder di Santa Rosa Indians ta lider den bateo den play-off ku 7 hit den 11 turno pa un average di .636. E tin 6 kareda empuhá den e promé 3 weganan i tin un homerun konektá. Di dos den bateo den play-off ta Edinho Meyer (Royal Scorpions) ku tin .556, Randy Kirindongo (Wild Cats) tambe tin .556 i Raywendley van Gurp (Royal Scorpions) tin un averahe di .538. Alexander Rodriguez (Santa Maria) ku a bai di 5-2 tin un average di .500.
* * * * *
Den kareda empuhá nos tin Alexander Rodriguez i Rochendrik Alexander empatá ku 6 kareda den 3 wega di play-off. Alexander Rodriguez tin dos homerun den tres wega di play-off i remarkable ta ku durante kampionato regular Alexander Rodriguez no tabatin homerun. Den RBI ta sigi Edinho Meyer ku 5, Hendrik Clementina di Wild Cats tin 5 i Rojean Cleofa di Wild Cats tin 4 kareda empuhá. Tur 4 kareda a keda empuhá den e wega number 3 entre Wild Cats i Santa Maria djaluna 21 di sèptèmber.
* * * * *
Den picheo tin varios picher ku ERA di 0.00. Orsen Josephina (Royal Scorpions), Lousandry Henriette (Santa Maria) i Jordan Lucas (Santa Rosa). Ruderly Manuel tin un ERA di 1.80, miéntras e sorpresa di play-off Marc Hennep di Santa Rosa tin ERA di 2.08. E picher ku mas ponche tirá ta Jair Jurrjens (Wild Cats) 10 ponche tira, Cerilio Soleano (Royal Scorpions) 8, Ruderly Manuel (Royal Scorpions) 6 ponche, Shurandy Valeriano (5 ponche) i Marverich Lourens (Santa Maria) 5 ponche.
* * * * *
Nos tin algu di Beisbòl Veterano tambe ku a sigi den wikènt na Vi Jansen Ballpark, kaminda fanátikonan por wak wega den nan outo manteniendo distansia soshal. Den e stationnan tambe fanátikonan a sa di tene kuenta ku reglanan stipulá pa direktiva di BEVEKO. E wikènt benidero ta kayente kaminda Jandoret (9-1) lo topa ku Bulldogs (6-4) djadumingu 3.30’or atardi. Otro wega kandela djadumingu ta Santa Rosa Memories (5-5) vs Marchena (5-4) pa 10.30’or. Pa 1’or ta Santa Maria (7-3) vs The Brothers (5-6). Santa Maria tin 7 wega ganá sigi, despues ku nan a pèrdè e promé 3 weganan di kampionato.
