Fanátikonan di Deporte Kòrsou bondia. Finalistanan di Beisbòl Dòbel A ta konosi i nos ta kargá ku informashon di kon a bai ku play-off semi-final i mas detaye di e play-off final. Nos a risibí informashon di presidente di FEBEKO ku no ta sigur ku ta start e play-off final djaluna. Probablemente lo start djaweps 1 di òktober òf djasabra 3 di òktober. FEBEKO lo bai papia ku outoridatnan di Salubridat i Mantenshon di Orden Públiko pa wak ku por laga fanátikonan drenta stadion teniendo kuenta ku distansia soshal. Nos ta keda pendiente pa mas informashon.
* * * * *
Defensa a laga ekiponan ku a pèrdè den e weganan desisivo di play-off semi-final na kaya. Ekipo Royal Scorpions djaweps tabatin eror òf hugadanan ku no ta eror, pero ku mester tabata out ku a resultá desisivo. Den e wega Royal Scorpions vs Santa Rosa, e promé batiadó di Santa Rosa a embasá riba hit i e sigiente batiadó a dal un rolling pa segunda ku mester a bira un double play fásil, pero shortstop ta tira pikonaso pa primera. A keda un koredó na base i no base bashi, debí ku no a saka e double play. E aspekto di e wega ta kambia kompletu i e siguiente batiadó ta embasá pa base por bola sigí pa dos homerun tras di otro. Santa Rosa a bai ariba 4-0 i duna nan picher estelar Jordan Lucas espasio pa por tira muchu mas trankil. Finalmente Santa Rosa a bini gana ku skor di 9-5. Santa Rosa a kometé un eror den e wega ei ku no a kosta kareda. Santa Rosa a nota solamente un kareda shushi despues riba eror di right den di 9 inning, kareda ku a pisa hopi den último inning, debí ku enbes di wega mester ta 8-5, e wega a habri di 9 inning 9-5.
* * * * *
Den e wega number 5 entre Santa Maria vs Wild Cats, tabata mesun kos. Ekipo Santa Maria a sali kometé dos eror di picher habridó ku a kosta kareda, ku despues a resultá nèt e dos karedanan ku tabata e diferensia. Wild Cats a gana Santa Maria ku skor di 8 pa 6. Santa Maria a kometé 3 eror mas despues pa bira 5 eror total. E eror di e rightfielder di Santa Maria den promé inning tambe a yuda den e dos karedanan sushi di Wild Cats den promé inning. Defensa malu tabata funesto pa ekiponan durante e weganan desisivo i tambe durante henter e seri. Ta bon pa ekiponan manda pichernan relevo kalentá for di promé inning, mirando ku pichernan a kuminsá kansa di tantu wega tras di otro. Usa mas tantu picher posibel tambe pa logra viktoria.
* * * * *
Promé ku play-off semi-final, Wild Cats tabatin e sigiente averagenan kolektivo: .308 den bateo, .964 den fildeo i 6.01 den picheo. Despues di e 5 weganan e bateo di Wild Cats a subi bira .312, picheo si no a bai dilanti i a bira 6.44 i fildeo tabata .956. Bateo di Wild Cats a subi i picheo a kai debí ku nan a topa ekipo Santa Maria ku tabata lider den bateo durante kampionato regular .317. Un bateo inkreibel, pero manera semper nos a bisa defensa ta number 1. Defensa a laga e ekipo di Santa Maria na kaya den e wega desisivo. Den e dos último weganan ku Santa Maria a pèrdè, nan a kometé 4 i 5 eror.
* * * * *
Santa Rosa su sifranan promé ku play-off semi-final tabata: bateo .282, picheo 5.23 i fildeo .947. Despues di e weganan kontra e number 1 di kampionato regular ku tabata Royal Scorpions, e sifranan a bira .293, picheo 4.97 i fildeo .947. Santa Rosa a mehorá den tur e 3 departamentunan ariba menshoná. Mester hasi menshon di e picher Swindley Lint ku tabata tremendo den play-off komo picher. Swindley Lint ku no a picha den e kampionato regular i ku hopi no konosé komo picher a tira den 3 wega sin permití kareda limpi na e ofensiva bárbaro di Royal Scorpions. Lint a tira 6.2 i tersio, tuma 1 kareda, 0 kareda limpi, 5 ponche i 3 base por bola.
* * * * *
Mas sifra di play-off semi-final. Santa Rosa i Wild Cats a gana 3 wega i pèrdè 2. Royal Scorpions i Santa Maria a gana 2 wega i pèrdè 3. Nan tabata ekiponan number 1 i 2 den buelta regular i Wild Cats i Santa Rosa number 3 i 4 respektivamente. Edinho Myer tabata lider den bateo .611, Edinho mes lider den kareda empuhá ku 9. Lint, lider ERA ku 0.00 i Jair Jurrjens lider den ponche ku 14. Sifranan kolektivo den ekiponan durante semi-final. Laga nos start ku bateo; Wild Cats .320,Santa Rosa .308, Santa Maria .291, Royal Scorpions .284. Picheo; Wild Cats ERA 7.33, Santa Rosa 6.64, Santa Maria 8.37, Royal Scorpions 5.57. Royal Scorpions tabatin e mihó picheo kolektivo pero a pèrdè e serie tog. Nan tabata den gran forma den e promé wega so.Den defesnsa Wild Cats .942, Santa Rosa .954, Santa maria .940, Royal Scorpions .966. Nos ta keda te aki pa awe.
