Fanátikonan di Deporte Kòrsou, bontardi i felis wikènt. Wild Cats di un manera sorprendente a gana Santa Rosa ku skor di 9-7 djaweps. Sorprendente debí ku Wild Cats tabata atras 7-5 den serada di e di 7 inning. Wild Cats tabata lomba kontra muraya pèrdí den e seri 0-3. Ekipo Wild Cats tabata kómodo dilanti 5-0, pero Santa Rosa ta nota 7 kareda den bòm di e di 7 inning riba entre otro homerunnan di Shakir Albert i Christopher Pietersz. E homerun di Shakir Albert tabata di 3 kareda i di Christopher Pietersz ku base bashi den di 7 inning. Jair Jurrjens a habri i picha 6.1 inning tirando 116 bala. Na e momentunan aki Santa Rosa ta faborito ketu bai pa e manera ku nan ta hunga e bala. Nan tin picheo, spit, poder, nan ta hunga e wega chiki, toke, robo, hit and run ets. Nan ta hustle i ta uni. Wild Cats ta keda e ekipo ku poder ku por bòltu e wega un ora pa otro.
* * * * *
Wild Cats ta stèns hopi riba e dos pichernan Jair Jurrjens i Risandro Pastor pa sigi gana den e seri. Santa Rosa Indians ta hunga riba nan tereno i ta hunga e Beisbòl di ‘Old School’, e Beisbòl di hinka e bala den wega, hunga wega chiki, ets. E wega ta resultando den gran forma pa e ekipo Santa Rosa Indians apesar ku nan a pèrdè djaweps. Risandro Pastor a tira 43 lansamentu djaweps último i no ta sigur ku e por habri e wega di awenochi. En todo kaso e seri a bira kayente, debi ku Wild Cats a kuminsá na gana un wega.
* * * * *
Santa Rosa tin 6 título i ta rumbo pa título number 7 na di 4 lugá tras di ekiponan Royal Scorpions (18 titulo), Wild Cats (15 título) i Santa Maria (11 título). Despues di basta aña Santa Maria Pirates ta keda for di un final. E ekipo Santa Maria segun nos ta den final for di 2005 te ku 2018, kaminda nan a kue basta título. Despues ku Wild Cats a kue 8 titulo sigí di 1994 te ku 2001, niun ekipo no a logra mas ku 3 título sigí. Wild Cats den añanan 80 a logra 4 título sigí. Royal Scorpions den añanan 60 a yega di logra 4 biaha sigí. Ekiponan Santa Maria, Alpha Zelbo i Santa Rosa Indians a yega di gana 3 titulo sigi.
* * * * *
Siman pasá nos tabatin hopi detaye di kampionnan di Beisbòl Dòbel A. Ban bèk pa e seri final aki. Tur kaminda ta papia di e union ku tin den Santa Rosa i kontrali Wild Cats no tin e union ku e ekipo tabatin e último añanan. Mester atmití ku Wild Cats tabata mustra super uní djaweps ultimo. A keda probá, hasta den Beisbòl profeshonal òf den deporte profeshonal, ku Union ta hasi forsa den oranan di bèrdat. Boso ta kòrda e ekipo Pittsburg Pirates na 1979, tempu di We Are Family ku hopi hungadó di koló manera entre otro Willei Stargell, Dave Parker, Manny Sanguillen, Bild Madlock, Mike Ealse, Omar Moreno ets. Eseinan tabata esnan di kolo, tabatin Dale Berra, e Hulandes picher miembro di Salon di Fama Bert Blyleven, ets.
* * * * *
Nos tabata sigi e wega di Beisbòl Dòbel A na Kòrsou i na mes momentu wega di Yankees vs Rays di Tampa. Awèl, Yankees a gana djaweps i kos tabata interesante djabièrnè Atlanta ku tin un kantidat di fanátiko na Kòrsou a klasifiká kitando ekipo Miami Marlins for di kaminda 1,2,3. Dodgers a kita San Diego Padres for di kaminda stail di 1,2,3 I lo bai topa Atlana Braves. Nos tin un Big Leaguer sigur den World Series e aña aki, sea Kenley Jansen of Ozaino Albies. Aya na Hulanda, Holland Series ta start djasabra dia 10 di òktober. Varios Yu di Kòrsou den e Holland Series atrobe entre Amsterdam Pirates i Neptunus. Weganan lo ta djasabra, djadumingu, sigi pa djaweps, djasabra i djadumingu, djasabra 24 di òktober i despues djadumingu 25 di òktober. Awe, djasabra 10 di òktober tin wega number 5 di e seri ku Santa Rosa dilanti 3-1 den e seri. By the way Yankees a kai afo dramatiko ayera na momentu ku e hungadó Mike Brosseau a dal Aroldis Chapman un homerun pa manda Tampa ariba 2-1 den bom di di 8 inning. Nos ta keda te aki pa awe. E wega a terminá 2-1 i Yankees ta eliminá.Te djaluna ku Poder di Dios.
