Fanátikonan di Deporte Korsou, bondia. Kampionato di Beisbòl Dòbel A a terminá djaweps 15 di òktober ku un viktoria di Santa Rosa Indians riba Wild Cats. Wega bon bringá pa Wild Cats, pero nan a keda kòrtiku i pèrdè e seri 4-3. E seri di Santa Rosa vs Wild Cats a bai meskos ku e seri di American League Championship Series entre Tampa Bay i Houston Astros. Santa Rosa a gana e promé 3 weganan i despues pèrdè 3, pa finalmente gana wega number 7. Tampa Bay meskos, gana 3 i pèrdè 3, pa despues gana wega number 7 i gana e seri. Tampa Bay ta bai World Series despues di 12 aña. Na 2008 Tampa a dal Boston den e play-off i pèrdè den World Series 4-1 kontra Philadelphia Phillies. Boston tabata kampion na 2007 i Phillies a gana Boston den 7 wega den e play-off.
* * * * *
Bèk na Kòrsou, hopi elogio pa e picher Jordan Lucas ku a demonstrá manera nos a relata djarason, ku e ta gana ekiponan grandi. E picher ku ta varia su lansamentunan masha bon mes i saka ekiponan grandi for di balansa. Un dje mihónan di Kòrsou ora ta trata di weganan importante kontra ekiponan grandi. Un ‘Big Game’ picher. Den e último wega Jordan Lucas a tira 5 inning kompletu, tuma net 5 hit, 3 kareda di kual 2 tabata limpi, duna 3 ponche i tuma dos homerun, 0 base por bola. Ela tuma dos homerun, pero dos homerun base bashi. By the way, Santa Rosa a dal un homerun i Wild Cats a dal 4 homerun. Santa Rosa a gana e wega. No ta batimentu di homerun ta gana wega. Naturalmente dalmentu homerun ta kareda mesora i hopi emoshon den e wega, pero swing grandi i buskamentu di homerun ta trese hopi flai fásil i rolling fasil den kuadro.
* * * * *
Hershelon Juliana tabata hermétiko den relevo pa Santa Rosa i a tuma dos hit i dos ponche tirá. E tabata pasa e batiadónan di Wild Cats rekta riba un rust. E último bala di wega tabata un rekta mei mei riba Terrence Josephina pa un strike kantá pa terminá e partido. Santa Rosa a selebrá en grande riba tereno. Basta fanátiko na Tio Dao Ballpark, segun nos banda di 100 fanátiko. Hopi ta bisa ku lástimamente fanátikonan no por a bini wak. Ya.. si no tabatin e COVID-19, nos lo no por a haña kantidat grandi di profeshonal i hóbennan di College na tereno di wega. En todo kaso un kampionato eksitoso i tremendo trabou di e direktiva nobo enkabesá pa Jedrek Magdalena. Trabounan a sigi mesora despues di e final di Dòbel A ku weganan di promoshon.
* * * * *
Manera ta konosí pa esnan ku ta sigi Beisbòl lokal djaserka, for di komienso di aña a vota pa hasi ekiponan di Beisbòl Dòbel A, 8 ekipo. Ta despues di basta aña ta bai bèk na 8 ekipo. Ekiponan Royal Magic i The Champs lo kompetí den un seri mihó di 7. The Champs a gana e faborito ku ta Royal Magic ku skor di 8-7. E wega tabata empatá 5-5 den e di 8 inning, e último inning. The Champs komo ekipo di bishita ta logra nota 3 kareda den kabes di e di 8 inning pa bai ariba 8-5. Royal Magic ku ta faborito pa gana e seri i subi pa Dòbel A a nota solamente 2 kareda i keda kòrtiku 8-7.
* * * * *
Royal Magic durante e kampionato regular kòrtiku a terminá ku rekòrt di 4-4 i un empatá i sali na di 3 lugá. The Champs a terminá ku 3-4 na di 7 lugá. Durante e temporada regular e ekiponan aki no a topa otro debí ku a parti e ekiponan di Klase A den pul i e ekiponan a hunga seri. The Champs a nota 8 kareda di kual 6 tabata shushi. Tur dos ekipo a kometé 5 eror den e wega menshoná. Royal Magic a nota 7 kareda i 4 tabata shushi. Di e 15 karedanan notá entre e dos ekiponan ta solamente 6 tabata limpi. Na momentu ku un di e dos ekiponan aki subi Dòbel A, mester drecha defensa, picheo i hopi parti mas di e wega di Beisbòl. Nos a terminá e kolumna aki pendiente di e wgea number 2 di e seri di promoshon.
