Lesadónan di Deporte Kòrsou, bondia i felis siman. Djasabra último ekipo Quality Stars a pasa relativamente fásil riba e ekipo Bulldogs, ganando ku skor di 8 pa 1. Rydell Isabella a tira ruta kompletu tumando solamente 6 hit pa su ekipo Quality Stars gana. E ekipo Bulldogs a laga hopi koredó na base den komienso di e wega i a kore base malu. Quality a bai ariba for di den di 3 inning, pa despues dominá e wega kompletu. Mas despues den e wega Bulldogs a yena base na un okashon, pero a logra nota solamente un kareda pa keda kòrtiku 8 pa 1. Djasabra awor pa 2’or lo tin e promé wega di e final i djadumingu tin wega number 2 di e seri mihó di tres. Den kaso di empate e wega finalísimo lo ta djasabra 5 di desèmber.
* * * * *
Pa loke ta trata e final di Beisbòl Veterano, e ekiponan Jandoret i Quality a enfrentá otro na dos okashon i Jandort a gana tur dos wega. Den kampionato regular i den Round Robbin. Na 2019 ekipo Quality i Jandoret a enfrentá otro un biaha i Quality a bai ku e viktoria. Aworaki ta ‘Brand New Ballgame’. Nos ta laga na kada ken pa skohe nan faborito. Mester bisa ku e aña aki nos lo no por disponé di sifra i probablemente lo no por saka ganadónan di premio individual. Aki nos ké mèn kampion bate, lider di homerun, kampion picher ets. Pa loke ta trata lider di homerun parse ku Ramiro Balentina a gana fásil ku 6 homerun.
* * * * *
Pendiente pa e wikènt aki di final di Beisbòl Veterano i lo no tin nada mas pa loke ta trata deporte Beisbòl i Sòftbòl na Kòrsou. Nos a lesa algu di biyar ei resientemente. Aña pasá na mesun temporada tabatin final di Liga 60, kaminda Nos Tambe Por a gana wega number 2 ku skor di 2-0 i bira kampion. Nos Tambe Por na e okashon ei a nota e dos karedanan den promé inning i Bencho Imperator, e tempu ei 71 + i awor 72+ a duna kátedra di fildeo pa yuda su ekipo mantené e blankeo. Manolo Gomez tabata e hòmber grandi e aña ei i aworaki ta Wim Felicia ta komandá pichando pa Nos Tambe Por. Masha dushi mes mirando algun hungadó di 60+ moviendo ainda. Renato Anasagasti i Sor Moesquit ainda ta moviendo komo estelar den nan ekipo di 40+ den Beisbòl Veterano, respektivamente Jandoret Raiders i Bulldogs.
* * * * *
Aña pasá na e momentunan aki Crazy Tigers a bira kampion ganando Baranka 21-13. Baranka a protestá despues ku Crazy Tigers a bira kampion, pero despues direktiva a anunsiá ku Crazy Tigers ta kampion i a entregá premio despues. 2020 naturalmente no tabatin kampionato pa Crazy Tigers defendé su titulo. Varios hóben a djoin Beisbòl Veterano den 2020 i por spera un kresementu den Sòftbòl Liga 40. Apesar di COVID-19 e interes pa 40+ Sòftbòl no tabata masha grandi den 2020. Ekiponan sigur ta Crazy Tigers, Baranka, Swift i Navegantes. Ekiponan Crazy Tigers i Jaws tabata den duda pa 2020.
* * * * *
Beisbòl 50+ ta mustra den gran forma den 2021. Ekiponan Jandoret, Sigi Hunga, Yesterday, Vosama, Blue Hawks aña 80 i un ekipo di Dolfi Mercera. Chèns tei ku lo por move pa otro tereno, debí ku no tin masha hopi espasio. Ekiponan lo reuní i lo move pa sea Heintje Kool Ballpark, Stadion Johnny Vrutaal òf Tio Daou Ballpark. Den kurso di siman nos lo bini ku mas detaye di e seri Jandoret Raiders vs Quality Stars. Nos ta keda te aki pa awe.
