Lesadónan di Deporte Kòrsou, bontardi. Beisbòl Veterano kayente den fin di siman na Vi Jansen Ballpark ku weganan di play-off semi-final. Den e promé weganan di e seri mihó di 3, ekiponan Quality Stars i Jandoret Raiders a pika dilanti ganando nan promé weganan. Quality a gana Bulldogs ku skor di 9-0 i despues Jandoret Raiders a derotá Isla Crackers ku skor di 2-1. Djadumingu Jandoret a klasifiká pa final i ganando pèrtá atrobe di Isla Crackers. E wega a kaba 4-3. Bulldogs a laga Quality Stars den tereno ganando 3-2. Wega number 3 entre Buldogs i Quality ta djasabra awor. Weganan di semi-final i final den Beisbòl Veterano no tin time limit.
* * * * *
Liga 60 tambe mester a sigi na Frank Curiel djasabra ku weganan semi-final entre Jaws i ekipo Lions. Ganadó di e wega aki lo pasa pa final kontra di Nos Tambe Por. Jaws a gana Lions 2-1 i pasa pa final. Den Liga 60 ta hunga un wega so den tur e serinan di play-off. Manera ta kustumber ta hunga play-off sistema page. Añanan anterior tabata hunga kasi tur e seri mihó di 1 i despues hunga final mihó di 3. E aña aki final ta solamente un wega, debí na Covid-19. Nos Tambe Por ta kampion di 2019, ekipo Jaws kampion di 2018, Los Amigos tabata kampion na 2017 i 2016. Promé ku esei tabata Jaws ku tabata komandá den 60+ ku entre 4 pa 5 título sigí. Keda pendiente pa mas detaye di e desaroyonan di 60+.
* * * * *
Nos ta bai un ratu asina den Beisbòl Dòbel A. Parse ku e hungadó Riordan Windster a firma ku e ekipo Santa Rosa Indians. Ekipo Royal Scorpions tabata duru tras di Riordan Windster, pero no a logra firma e shortstop aki ku tin bon wante, bon bate i bon spit. Royal Scorpions tin Urvin Juaquin ku tin bon wante, pero e bate no ta zona manera mester ta. Pa nos shortstop mester filea i hasi e trabou defensivo i bate ta na di dos lugá. Si bo tin un shortstop ku e kaliber defensivo di Urvin Juaquin, bo por ta trankil i laga e otronan bati.
* * * * *
Keda pendiente pa mas moveshon den Beisbòl Dòbel A. Selekshon lokal bou di direkshon di Hainley Statia ta moviendo sin fin ku training riba nivel hopi haltu. Selekshon ku kasi dòbel di hungadó di e kantidat ku lo bira e selekshon definitivo. Presidente di FEBEKO, Jedrek Magdalena ta na Hulanda pa motibunan personal familiar i ta pendiente pa yega Kòrsou den e dianan benidero. Jedrek Magdalena a bira presidente di FEBEKO e aña aki i a bini ku hopi inovashon. E kampionato a bira un éksito rotundo i lástima ku debí na e di dos ola di Covid-19 fanátikonan no por e drenta stadion. Tur seri di play-off a bai e wega finalísimo, algu ku no a pasa masha tempu den Beisbòl Dòbel A. Sòftbòl Maskulino Fastpitch tambe tabata kandela. By the way, einan tambe a bai e wega finalisimo.
* * * * *
Ekipo Swift tin un fundraising pa gana un outo. Ekipo òf personanan interesá por tuma kontakto ku Sergio Leon òf kualke miembro di ekipo Swift. Ekipo Swift super eksitoso último tempunan tantu riba nivel di Van Engelen komo Kopa ABC. Aña 2020 ta hopi kompetensia di Sòftbòl Slowpitch no por a sigi. Liga van Engelen, Liga 40, Liga Streanan di Ayera, Kopa ABC di hóbennan, di 40 i di 50 no por a sigi. No tin siguridat ku na 2021 e liganan menshoná lo sigi. Liga 50, Liga Amstel, Liga di Nos Tur ku a start, no por a kontinuá despues di e di dos ola di Covid-19. No ta konosi pa nos kua liga lo sigi na momentu ku tur kos bira normal òf ku lo hunga e kampionato di nobo. Liga 50 tabata leu for di play-off. Liga di Nos Tur tabata den play-off. Despues ku Jaws a gana Lions 2-1 djadumingu último, Fety Curie di Jaws a bisa ku e kos di Nos Tambe Por ei parse manera di Jong Holland den futbòl. Nos ta keda te aki pa awe.
