Fanátikonan di Deporte Kòrsou, bondia i felis wikènt. Nos ta drentando den fin di siman trankil kaminda deportenan te ainda ta wantá. Pa otro fin di siman por verwagt ku moveshonan ta start tantu training, komo wega di training pendiente e wikènt di 23 i 24 di yanüari. Selekshon di Beisbòl ta moviendo den gran forma ku partisipashon di nos Big Leaguernan ku ta train na serio brasa brasa ku nos peloteronan lokal. Djamars último tabata presente Big Leaguernan manera Jonathan Schoop, Ozhaino Albies, Didi Gregorius i Jurickson Profar. Tambe tabata presente Andruw Jones ku ta na Kòrsou for di desèmber i djamars a firma un MOU pa start ku rekonstrukshon òf konstrukshon di e parke di Beisbòl.
* * * * *
E selekshon di Kòrsou tin 16 picher i mester yega na un total di 9 picher. Esnan ku ainda ta den selekshon ta Ruderly Manuel, Nelmerson Angela, Shurendy Valeriano, Denverick Martines, Jordan Lucas, Siamani Boekhoudt, Cerilio Soleana, Shair Lacrus, Arjun Huerta, Risando Pastor, Arlison Rodriguez, Ruendi Carolina, Jerrison Beaumont i Ruwensley Bonifacio. Den infield tin entre otro Raywendley van Gurp, Johannes Gregorius i Swindley Lint na tersera, Jordi Windster i Sherivien Newton den short. Na segunda tin entre otro Jordi Windster mes, Roderick Bernadina i Darren Seferina ku ta shortstop i segunda base. Na primera bo ta haña entre otro Roderick Bernadina, Alexander Rodriguez i Shakir Albert. Tras di plato ta Terrence Goeloe, Stephand Vidal, Eldion Martina i Urlich Snijders. Den outfield tin Daytan Biegel den left, Sherman Lacrus i Rayshandeal Michel den center i Shakir Albert den right. Falta algún hungadó i lo bin algún kambio naturalmente. Talbes tin hungadó ku miéntrastantu a kai afó.
* * * * *
Tene kuenta ku no ta sigur ku hungadónan profeshonal por ta den e selekshonnan, debí ku mester di permit di nan ekipo profeshonal. Na e momentunan aki ku temporada profeshonal no a start ainda tur hungadó naturalmente ta disponibel. Ké mèn, keda konta ku hungadónan lokal ku si lo por hasi e biahenan. E asuntu di stòp di hunga pa Hulanda i bin hunga pa selekshon di Kòrsou tambe no ta fásil. Nos lo purba si, pero naturalmente pa hungadónan kasi 2400 euro pa luna, outo di lease (si ta nesesario), masha hopi gastu kubrí, seguro médiko pa leshon, produkto i vitaminanan speshal, algu manera un penshun, kubri parti di estudio debí ku e karera profeshonal lo por a stroba den sierto parti. ‘A Status’ den deporte na Hulanda ta algu serio ruman.
* * * * *
Un ratu pa Slowpitch: Aña pasá na komienso di aña tabata den gran forma. Tabata 9 ekipo di Liga 50 ku a inskribí rápido pa Torneo The Greatest i tabata konosí ku e torneo lo a terminá na Buena Vista Ballpark. E gran ekipo Ban Serio no a partisipá den e torneo, miéntras Pitufos a dal Baranka den final pa bira kampion di e Torneo. MCB a bini ku un ekipo di 40+ i kompetí normal den e hóbennan. Tabatin e intenshon pa bini ku un sekshon 40+ den Torneo Hope, pero esei no a tuma lugá i Torneo Hope tampoko no a tuma lugá. Den futuro si lo tin un sekshon di 40+ den e torneo, kaminda esnan ku 40+ por hunga den e otro ekiponan tambe tantu COED komo Soshal Maskulino.
* * * * *
Den Beisbòl Veterano, ta pendiente pa hunga e wega entre Jandoret Raiders i Quality Stars fin di luna, pero ta dependé desishon di Gobièrnu djaluna awor. Despues di e desishon, direktiva di BEVEKO lo anunsiá e wega ofishalmente. Nos ta kòrda ku den 2020 kambio grandi tabata Jair Josepha di Quality Stars pa Marchena Stars. Moises Zimmerman a sali for di Quality i tabata rumbo pa Azucar, pero despues nos no a tende nada mas. Moises Zimmerman a resultá den final ku su ekipo Sigi Hunga den Liga 50+. By the way, den 50+ Beisbòl tambe ta pendiente pa e gran final entre Jandoret Raiders i Sigi Hunga. Pa 2021 ta verwagt 6 ekipo den Liga 50 di Beisbòl i ta pendiente pa buska un otro tereno pa Liga 50 move mas trankil.
* * * * *
Ban pa Little League, kaminda ei tambe ta pendiente di dia 11 di yanüari. Torneo Kenley Jansen lo start dia 23 di yanüari i e tereno no ta konosí ainda. Tin rumor ku doñonan di Shon Ki Nicasia Ballpark lo bai bende e tereno. Promé ku mester sali i kumpra e tereno ta Gobièrnu i entregá esaki bèk na e fundashon ku ta drei Shon Ki Nicasia Ballpark.
