Fanátikonan di Deporte Kòrsou Beisbòl, felis atardi. Nos tei atrobe ku informashon di Beisbòl lokal. Nos lo sigi riba komentarionan di play-off final di Beisbòl Dòbel A. Nos tin algun sifra mas ku a drenta tambe. Deporte Kòrsou lo tin averahe di e mihónan di e dos ekiponan pa loke ta trata nan aktuashon den play-off semi-final. Ta trata aki di ekiponan Wild Cats i Santa Rosa naturalmente. Play-off final ta start djaweps segun un informashon ku nos a risibí serka fuentenan ofishal. Santa Rosa a anunsiá ku e slengu Siamani Boekhoudt lo habri wega number 1. Di parti di Wild Cats, e derecho èks MLB Jair Jurrjens lo habri wega number 1 pa Wild Cats. Deporte Kòrsou a risibí e skedjel ofishal.
* * * * *
Nos tin sifranan kolektivo den ekiponan durante semi-final. Laga nos start ku bateo. Wild Cats .320, Santa Rosa .308, Santa Maria .291, Royal Scorpions .284. Picheo: Wild Cats ERA 7.33, Santa Rosa 6.64, Santa Maria 8.37, Royal Scorpions 5.57. Royal Scorpions tabatin e mihó picheo kolektivo, pero a pèrdè e seri tòg. Nan tabata den gran forma den e promé wega só. Den defensa: Wild Cats .942, Santa Rosa .954, Santa Maria .940, Royal Scorpions .966. Ekipo Royal Scorpions a sali dal Santa Rosa duru 13-1 den e promé wega di play-off ku tremendo picheo (tuma 5 hit so i un kareda) i filea sin eror. Di einan nan averahe di picheo i defensa a keda basta bon pa loke ta trata e sifranan final di e semi-final.
* * * * *
Nos ta bai start ku sifranan di e ekiponan den final, esta Wild Cats i Santa Rosa. Wild Cats a bati pa un average kolektivo di .320 den play-off semi-final, e averahe mas haltu entre e 4 ekiponan ku a bai semi-final. Wild Cats a dal 8 homerun. Daytan Biegel, Hendrik Clementina i Randolph Kirindongo a dal dos homerun. Reangaelo Beaumont i Yurendell de Caster a dal un homerun. Randoph Kirindongo a bati .471, Shurendell Mujica a bati .467, Yurendell De Caster .350, Rojean Cleofa .350, Hendrik Clementina .316. Calten Daal i Daytan Biegel a bati .250. Ta dos hungadó ku por bati pa un averahe muchu mas haltu. Calten Daal tin 6 RBI i e lider den semi-final pa Wild Cats ta Hendrik Clementina ku tin 7 RBI. Si Calten Daal i Daytan Biegel lòs, lo ta doló di kabes pa pichernan di Santa Rosa den final. Wild Cats a risibí 33 base por bola ku ta hopi mas tantu kompará ku tur otro ekipo den e play-off semi-final. Wild Cats su ‘On Base percentage’ tabata .448.
* * * * *
Santa Rosa, e ekipo ku tabata mustra ku tin ménos chèns di yega final, a gana e mihó ekipo durante kampionato regular ku ta Royal Scorpions 3-2 den e seri final. E historia ya ta konosí. Santa Rosa a bati pa average kolektivo di .306 den semi-final. Rochendrik Alexander a bati .526 den e play-off. Christopher Pietersz a bati .421, Yevganni Reinita .400, Jurgen Statie .333, Shane Quant .333, Aldair Daal .273. Swindley Lint a bati .214, pero tabata tremendísimo den picheo. Santa Rosa Indians a bati 5 homerun den semi-final, 2 di Shakir Albert, 2 di Christopher Pietersz i 1 di Rochendrik Alexander. Santa Rosa a risibí 20 base por bola den semi-final i nan ‘On base percentage’ tabata .393.
* * * * *
Pa loke ta picheo Wild Cats tabatin un ERA di 7.33 den play-off semi-final i Santa Rosa tabatin 6.64 . Wild Cats a gana 3 wega naturalmente i Risandro Pastor a habri dos wega i gana tur dos. E otro wega ganá tabata di Sidney Antonia. Pastor su ERA tabata 5.23, di Jair Jurrjens 7.07 i Sidney Antonia 5.68. E hóbennan di hubenil Jediah Kwidama i Joharvy Martines tin ERA di 0.00, pero den tiki inning pichá. Ta trata di dos prospekto picher ku ta tira riba 86 mia. Santa Rosa tin bon picheo di algún picher klave di nan ku ta Jordan Lucas ERA 2.25, Marc Hennep 2.08, Marvin Ludowika 2.46. Hershelon Juliana, e ‘closer’ di e ekipo no tabata den gran forma i tabatin un ERA di 5.40. E estrea den picheo i sorpresa a resultá Swindley Lint ku un ERA di 0.00 den 6.2 inning pichá. Jerrison Beaumont a tira solamente dos tersio, poncha tur dos batiadó ku ela enfrentá i kaba ku un ERA di 0.00 i gana e wega krusial i wega number 2 di e seri final kontra di Royal Scorpions.
