Lesadónan di Deporte Kòrsou, bondia. Nos tei kayente aki rumbo pa play-off semi-final di Beisbòl Veterano. Play-off semi-final ta start e wikènt aki na Vi Jansen Ballpark. Ekipo Quality Stars a klasifiká number 1 ku rekòrt di 4 ganá i 1 pèrdí, sigí pa Jandoret Raiders ku 3 ganá i 2 pèrdí. Segidamente despues di hopi studiamentu di regla i konteo di kareda ets, direktiva a partisipá ku ekiponan ku Isla Crackers a sali number 3 i ekipo Bulldogs a terminá number 4. Ekiponan Isla, Bulldogs i Santa Rosa tabatin rekòrt di 2 ganá i 3 pèrdí.
* * * * *
BEVEKO a manda un splikashon ekstenso pa ekiponan djaluna 9 di novèmber den oranan di atardi. Nos tin e splikashon kompletu a base di kiko e direktiva di BEVEKO a skohe e mihó 4 ekiponan. Di mes Quality i Jandoret ta fásil debí ku no tabatin empate na promé lugá, tampoko na puesto number 2. E batata kayente a presentá na momentu ku 4 ekipo a empatá ku rekòrt di 2-3 na di 3 lugá por bisa. Ekiponan 3, 4, 5 i 6 ku mesun rekòrt. Te asina leu ku nos ta sigi Round Robbin ta pa promé esaki a presentá. Nos tin e splikashon i e karta di e direktiva.
* * * * *
E karta pa ekiponan ta splika asina aki: “Apresiabel miembro/dirigente. Pa medio di e boletín aki bestür ta notifiká boso e resultado i splikashon klasifikashon ekiponan pa semifinal. Bestür ta duna e resultado aki, basá riba un interpretashon di e regla nan na un manera inparsial i ku tur honestidat. Bestür ta konsiente ku kada ken for di nan punto di bista lo mira e desishon diferente. Konforme nos forma di traha ta unu honesto.
* * * * *
Klasifikashon pa yega final den Liga BEVEKO ta basá riba e ekipo nan ku mihó rekòrt. Esaki ta regla prinsipal #1. Despues di promé buélta a klasifiká e 6 ekiponan ku mihó rekòrt. Konforme regla prinsipal #1. Puesto nan: 1. Isla Crackers, 2.Jandoret Raiders. 3 Quality Stars, 4. Sta Maria, 5. Bulldogs, 6. Sta Rosa Memories. Den reunion ku e 6 ekipo nan ku a bai Round Robbin, a bolbe palabrá regla nan di klasifikashon di e 4 ekipo nan, kual nan ta lo siguiente:
* * * * *
Regla prinsipal # 1: Ta klasifiká e 4 team nan ku e mihó rekòrt. Si tin empate entre e ekipo nan ta apliká e siguiente regla nan di desempate.1. Ken a gana ken ( seri partikular entre ekipo nan ku a empatá) mihó rekòrt. 1. Kareda kontra. 2 Kareda pro. 3. Lòt ta disidi.
Resultado di Round Robbin tin 2 ekipo ku a pasa, esta number 1. Quality Stars i number 2 Jandoret Raiders. 4 ekipo a keda empatá ku mesun rekòrt di 2-3. Tin espasio pa dos ekipo number 3 i number 4.
* * * * *
Aki ta wak entre e ekiponan ku a empatá, e ekipo ku mihó rekòrt: Tabla di resultado entre 4 ekipo nan. Isla Crackers a gana Santa Rosa Memories i Bulldogs (2-1). Bulldogs a gana Santa Rosa Memories i Santa Maria (2-1). Santa Rosa Memories a gana Santa Maria (1-2), Santa Maria a gana Isla (1-2). E dos ekiponan ku mihó rekòrt ta Isla Crackers i Bulldogs. Aki tin empate, ta sigi reglanan di desempate. Regla number #1. Entre e ekiponan ta wak ken a gana ken. Isla Crackers a gana Bulldogs. Esei ta nifika ku Isla Crackers ta number # 3 i Bulldogs ta number # 4. Sta Rosa i Sta Maria tin e rekòrt di 1-2. Sta Rosa a gana Sta Maria pues, Sta Rosa number # 5 i Sta Maria number # 6.
* * * * *
Ekiponan ku a klasifiká pa semi final, 1. Quality Stars, 2. Jandoret Raiders, 3. Isla Crackers i 4 Bulldogs. Ekiponan ku nó a klasifiká pa semi final Sta Rosa Memories i Sta Maria. Esaki ta desishon final riba resultado i aplikashon di regla di desempate.
Spera di a notifiká un i tur sufisiente”. Final di e karta (info boletin number 15) ku BEVEKO a manda pa ekiponan.
* * * * *
Play-off di Liga 60 a start na Frank Curiel Ballpark djadumingu último. Ekipo Nos Tambe Por a gana di Lions 6 pa 1 i pasa pa final di e liga. Den e otro wega ekipo Jaws a gana Amigos 5-4. Djadumingu awor tin wega entre Lions i Amigos. E ganadó lo topa ku Nos Tambe Por den final. Nos ta keda te aki pa awe.
