Fanátikonan di Deporte Kòrsou, bon dia. Nos tei mei mei di siman aki ku informashon di Beisbòl lokal. Ekiponan di Little League a kuminsá move e siman aki. Un palu di awa di djamars a stroba vários ekipo di train. Ta for di aña 2010 pa bai 2011 awaseru a kai na e nivel aki. FEBEKO a anunsiá i presentá via di un video kòrtiku di 48 sekònde logo di e selekshon. Esei a tuma lugá dia promé di yanüari via medionan soshal. Jedrek Magdalena presidente di FEBEKO ta bezig e dianan aki na medionan di komunikashon pa papia di e plannanan di FEBEKO den 2021. Extra Deporte a saka Jedrek Magdalena komo dirigente di aña.
* * * * *
Pa loke ta trata Beisbòl Dòbel, tin tur indikashon ku práktikamente mesun ekiponan lo sali den e promé 4-nan. Wild Cats, Santa Maria, Royal Scorpions i Santa Rosa. Ekipo Santa Rosa lo pèrdè dos pilá ku ta e resio batiadónan Shakir Albert i Christopher Pietersz. E dos hungadónan a karga e ekipo kampion di Beisbòl 2020 ku nan bate. E segunda base Yevganni Reinita lo firma profeshonal, otro piesa klave di e ekipo den 2020. Santa Rosa Indians a keda ku nan picheo sólido enkabesá pa Jordan Lucas ku lo keda gana di ekiponan grandi ora tin mester. Jordan Lucas ta e ‘Gregg Maddux’ di Beisbòl lokal. Un picher ku ta pone su lansamentunan kaminda e ké ku tin un tremendo ‘change up’. E change up ei ta keda dominá batiadónan di Kòrsou, debí ku e ta bini stret i kai abou den e zona nèt bou di straik.
* * * * *
Jerrison Beaumont tambe tin e bala ei (change up), pero Jerrison no ta tira masha inning, un te ku dos inning pa wega i ta tira den relevo medio. Marvin Ludowika tambe a tira tremendo den 2020 i tambe ta den plan di relevo i habri ora mester. By the way, tin rumor ku Michael Angel Vilchez tambe ta otro hungadó di Santa Rosa Indians ku lo firma profeshonal ku e organisashon di Dodgers. Santa Rosa tin Siamani Boekhoudt, slengu ku por tira tremendo ora e presentá den forma. Ekiponan Wild Cats, Santa Maria i Royal Scorpions di mes ta hinka hopi energia pa añanan tras di otro i lo klasifiká. Ekiponan Marchena , Groot Kwartier i Firebirds lo keda na puestonan 7,6 i 5 respektivamente. Firebirds a firma basta hungadó potensial i tin chèns di sali riba Groot Kwariter i Marchena den 2021. Ban wak kiko ta bai pasa ku ekipo The Champs ku lo ta den Dòbel A pa 2021 aki.
* * * * *
Ban spera ku e tempunan fèrfelu di Covid-19 lo pasa, pa nos Little League por kuminsá move. Promé ku fin di luna ta pendiente pa start ku Torneo Kenley Jansen di Junior i Senior. Torneo FABB a keda kanselá segun fuentenan ofishal di e organisashon. Ekipo i organisashonnan di Little League si ta na altura ku e lo no sigi. Ya … tur kos ta dependé desishon di Gobièrnu. FABB por disidí na pone un torneo mas kòrtiku, stail di dal saka, eliminashon mesora. Hóbennan di Little League ké move naturalmente pa ta den forma foi tempran. Kòrda ku e show grandi ta Little League World Series na ougùstùs 2021 aya na Williamsport i te ainda e evento aki ta riba programa pa 2021.
* * * * *
Skibiendo di Little League World Series na 2019 nos selekshon a bira supkampion di Mundu. Esei ta pa di dos biaha ku nos ta bira supkampion. E selekshon di 2019 a bai wak wega di World Series na BB&T Ballpark na Williamsport, Pennsylvania. E promé biaha ku a hunga wega na Williamsport pa hóbennan di e selekshonnan di Little League por a wak un wega di MLB tabata na 2017, na e parke ariba menshoná BB&t Ballpark. E parke a keda habrí na 1926. Na 2019 selekshon di Little League di Liga Pabou a wak e wega Chicago Cubs vs Pittsburgh Pirates. Na 2017 tabata Pittsburgh Pirates vs Sint Louis Cardinals.
* * * * *
E selekshonnan ku a bishitá Williamsport for di 2001 te ku 2009 a bai wak algún wega di Big League durante nan estadia aya. Esun kampion mes tabata na 2016 na momentu ku selekshon di Liga Pariba a wak Baltimore Orioles vs New York Yankees na Yankee Stadium dia 27 di ougùstùs. Tabata un wega kaminda Jonathan Schoop (Orioles) a topa Didi Gregorius. Yankees a gana e wega ei ku skor di 13-5 pa Yankees. Despues di wega tur hungadó a saka pòtrèt ku e dos grandinan ei. Den dianan benidero nos lo kompartí e eksperensia ei ku Little Leaguernan den Yankees Stadium .
