Fanátikonan di Deporte Kòrsou, bon dia. Awe nos tin algun informashon di Beisbòl, Beisbòl Veterano i Sòftbòl Slowpitch. Ekiponan a sigi move den Beisbòl Dòbel A. Ekipo Santa Rosa no a para ketu i nan ta firmando tur nan hungadónan. Santa Rosa a bira kampion i naturalmente hopi hungadó no ké bai laga ekipo kampion i ké keda pa defendé e titulo. Ofertanan lukrativo hungadónan di Santa Rosa ta laga bai pa keda ku nan ekipo. Santa Rosa a firma Hershelon Juliana i Riordan Windster wikènt pasá. Dos piesa klave di ekipo dirigí pa Quincy Martina. Quincy Martina hóben manager e demonstrá kon ta traha ku kuerpo tékniko. Varios hóben den e kuerpo tékniko di Santa Rosa sin muchu fama ku ta traha bon. Remarkabel ta ku varios di esnan den e kuerpo tékniko ta move den maneho di Little League tambe.
* * * * *
Den Beisbòl Veterano tambe tin masha hopi moveshon. Santa Rosa Memories lo bira fuerte i lo tin un otro manager den 2021. Un manager ku ya ta den Beisbòl Veterano sorprendentemente lo move pa un otro ekipo. Nos ta laga e kampionato kaba trankil pa nos lòs e bòmnan. Ekiponan den play-off na e momentunan aki lo haña i pèrdè varios hungadó. Tin informashon ku tin ekiponan ku lo kambia di doño tambe. No kualke ekipo chiki, pero ekipo grandi lo kambia di doño. E ekipo ku ta moviendo mas duru den temporada aki i despues di temporada sigur ta ekipo Santa Maria Pirates Veterano. E ekipo fundá pa Roy, Nelly Jakoba, Skippy Sambo i Frank Curiel tin dos piska grandi den nan boto kaba pa 2021. Dos hungadó ku lo yega hunga regular i unu di nan por picha tambe.
* * * * *
Picher di Santa Maria ta rumbo pa Santa Rosa den Beisbòl Veterano. Hopi interes mes pa hungadónan ku apesar ku nan ta riba 50 ta hopi buská. Pichernan 50+ ta dominá ketu bai den Beisbòl Veterano. Skèdjel di wega number 3 entre Bulldogs i Quality a sali. E wega ta 2’or na Vi Jansen Ballpark. Promé ku e wega aki lo tin un wega di strea entre ekiponan ku no ta den play-off. Ké mèn, hungadónan di Jandoret, Quality i Bulldogs lo no partisipá den e wega di strea di djasabra awor na Vi Jansen Ballpark. E wega finalísimo entre Bulldogs i Quality ta super super kandela. Durante kampionato regular Bulldogs a gana Quality i kibra nan invikto. Den e Round Robbin ekipo Quality a pasa fásil riba Bulldogs i den semi-final e seri ta empatá despues ku Quality a gana 9-0 djasabra i pèrdè 3-2 djadumingu.
* * * * *
Quality Stars ya a anunsiá Rydell ‘Bieu’ Isabella pa habri e wega finalísimo aki, miéntras Bulldogs ta pendiente pa wak si Emilio Velarde ta habri ku Lester Victoria den relevo òf Lester mes ta habri. Nos a mira Bryan Kook tambe hopi aktivo den Round Robbin despues ku e tabata inaktivo durante temporada regular. Bryan Kook a bin hunga primera djadumingu na lugá di Verney Jansen ku a bini di emergente den e wega di djadumingu. Verney Jansen a gusta e ambiente di Beisbòl Veterano i por spera un ora pa otro ku Kenley i Ardley Jansen lo djoin. Pa 2023 Archie Jansen lo ta klá pa drenta Beisbòl Veterano.
* * * * *
Nos ta wanta un ratu ku e kambionan kayente ku tin na kaminda den Beisbòl Veterano i laga e kampionato terminá. Liga 60+ ta terminá djadumingu awor pa 1’or, na momentu ku ekipo Jaws ku a gana di Lions djadumingu último topa ku Nos Tambe Por ku tin un ‘dream team’ di Santa Maria. Nos Tambe Por tin hungadónan ku a subi Beisbòl Dòbel A tempu di Stadion di Rif na final di añanan 70, manera entre otro Renato Anasagasti, Sor Moesquit, Son Sofia, ets. Aña pasá Ron Stewart tambe tabata presente. Nos Tambe Por tin Emile Haswell i Ellery Martina ku tabata den Blue Hawks na final di aña 70 den Stadion di Rif.
* * * * *
Nos lo tei pa kubri e wega kompletu i tin relato otro siman. Kuerponan di transmishon via facebook ta birando hopi aktivo. Wikènt pasá dos crew di transmishon riba facebook (Game On i Sports.cw) tabata presente pa kubri weganan di Beisbòl Veterano. Boost formal pa Beisbòl Veterano pa e parti final aki i pa otro aña naturalmente. Saludo pa sra. Marlene Obispo ku a splika na plaka chiki den un mensage dikon Liga Streanan di Ayera si a opta pa para tur aktividat for di tempran e aña aki en konekshon ku COVID 19. Nos ta keda te aki pa awe.
