Fanؘátikonan di Deporte Kòrsou, bon dia. Nos tei atrobe ku informashon di Beisbòl i di Sòftbòl. Liganan a kuminsá drei den gran forma i ta hopi deporte mes tin na kaminda. Nos ta konsentrá riba e Beisbòl i e Sòftbòl. Beisbòl Dòbel A ta bai start despues di e eksitoso Kopa di Karibe organisá pa FEBEKO bou di ouspisio di Copabe. Naturalmente ku nos ganando di Cuba den un final yená ku fanátiko e ora ei por bisa super eksitoso e Kopa di Karibe a bai. Ta di 3 kampionato di Karibe ku ta algu nobo ku a start na 2018. En todo kaso kampionato ta start djasabra 10 di yüli pa 7.30 pm ku wega entre Santa Rosa Indians i Wild Cats. Final di Copa America entre Brasil i Argentina lo kita poko fanátiko for di e wega di apertura.
* * * * *
Miéntras tantu resultadonan di Beisbòl Veterano a drenta i nos tin kandela wikènt awor kaminda weganan duru ta bai start. Durante e dos simannan ku a pasa ekiponan grandi a topa ku ekiponan chiki i awor tin kos. Djasabra pa 1’or Jandoret Raiders ku tin 2 ganá i 0 pèrdí lo topa ku Bulldogs ku tambe tin 2 ganá i 0 pèrdí. Djadumingu tin dos wega kandela, Santa Rosa Memories lo topa ku Isla Crackers pa 10.30’or i despues 1’or ta Santa Maria Pirates kontra di Quality Stars. Djadumingu tin apertura ofishal, e apertura ku tabata planiá na Tio Daou Ballpark, pero e stadion ta sigur ku Beisbòl Little League debí na play-off ku ta start.
* * * * *
Tur e ekiponan menshoná ta invikto den temporada 2021 di Beisbòl Veterano. Liga 50 tambe ta sigi move djasabra mainta tempran ku wega entre Marlins i Ban Serio. Ban Serio ta super kampion, miéntras Marlins a gana Ban Serio den nan último wega den e kampionato ku a keda suspendé na 2020. Despues ta sigi Lions vs Artemisia. Lions a sali brabu ku dos viktoria impreshonante, entre otro wega ganá kontra Flamboyan ku skor di 6-5 djasabra último. Resultaodnan di siman pasa ta Lions 6, Flamboyan 5. Despues tabata Pitufos 14, Catpower 0. Janchi Cicilia a tira 3 hitter ku 4 ponche. Baranka ku varios kara nobo a dal Mon Repos Sluggers 14-4 i finalmente Marlins ku Vriedjens Cicilia i Skippy Sambo a dal Jaws 21-11.
* * * * *
Liga di Nos Tur a start djabièrnè na Frank Curiel Ballpark. Tabatin apertura ofishal. Ekipo Sweetheart di Felip Guanipa lo debutá den e liga kontra di e kampionnan di 2020 ekipo Un Kara. Den dianan benidero nos lo tin mas detaye di Liga di Nos Tur 2021. Nos ta bai chèk ku na apertura lo parti e premionan di temporada pasá. Manera nos a informá, ekipo Un Kara a bira kampion invikto despues ku nan a pasa pa final i no a logra terminá e kampionato.
* * * * *
Ekipo Jaws a bira kampion di Torneo Internashonal di Dia di Bandera organisá pa ekipo Curacao Super Stars. Jaws a gana Nos Tambe Por ku skor di 6-3 ku picheo di Hubert ‘Manolo’ Gomez. Picher pèrdèdó tabata Richenel Raphaela. Ta spera kandela e aña aki den 60+, debí ku Jaws a manda un mensahe klá pa Nos Tambe Por ku e aña aki ta un otro gai ta kanta. Ekipo Nos Tambe Por, un tempu ekipo di Chan Schoop, tin dos titulo sigí den Liga di Nos Tur. Na 2019 nan a gana Lions den final i na 2020 ekipo Jaws.
* * * * *
Play-off Little League ku a start djaweps na Tio Daou Ballpark. Djabièrnè tin apertura ofishal. E aña aki tin Torneo di Karibe i Latino Amerikano fin di yüli den Stadion Post 6. Pronto tin mas detaye di e torneonan aki. Naturalmente no tin hopi ekipo ku lo partisipá manera kustumber, dor ku algun ekipo no por yega, debí na Covid-19. Kòrsou, Aruba i Puerto Rico sigur ta den i ta pendiente di mas ekipo. Nos ta keda te aki pa awe.
