Fanátikonan di Deporte Kòrsou, bondia. Selekshon Junior Pariba e bira kampion i selekshon Norht di Aruba a bira kampion den e kategoria Senior. By the way, djadumingu a klousurá Weganan Olímpiko na Tokio den gran forma. Hight lights pa nos tabata nos atletanan ku a kore pa Hulanda i gana plata den 4 biaha 400 meter. Nos koredónan Liemarvin Bonevacia, Terrence Agard, Ramsey Angela huntu ku e Hulandes Tony van Diepen. Un hazaña históriko pa Kòrsou apesar ku e koredónan menshoná a kore pa Hulanda.
* * * * *
Den Liga 50 djasabra ekipo Lions a gana Jaws ku skor di 2-0 i ta na kabes di e liga invikto ku rekòrt di 6-0. Un tremendo aña pa ekipo Lions ku tin pichernan manera Edison Sambo (3-0) i Gregory Martijn (2-0). Riba Game Changer a pone nòmber di Eugene de Palm komo picher ganadó, pero segun nos ta Nelly Jacoba ku a relevá kontra di ekipo Flamboyan a gana e wega ei. Ké mèn, Nelly Jacoba tin rekòrt di 1-0, pa Lions yega na e 6 weganan ganá i 0 pèrdí. Roy Philips ta batiendo 13-8 pa un averahe di .615. i Raichel Leito .536. Herbert Lucas ta manager di e ekipo Lions ku mester topa ku Ban Serio djasabra 14 di ougùstùs pa 4’or di atardi. Ban Serio tin rekòrt di 5-0. Ando Cijntje tambe a djoin e ekipo Lions den 2021 i ta batiendo .385.
* * * * *
Otro resultadonan di Liga 50 ta, Marlins 10, Mon Repos Sluggers 5; Flamboyan 13, Baranka 10. Standing despues di e weganan di djasabra último ta: Lions 6-0, Ban Serio 5-0, Baranka/Sharks 4-2, Marlins 3-2, Pitufos 3-2, Flamboyan 3-3, Mon Repos Sluggers 2-5, Artemisia 1-4, Jaws 1-5, Catpower 0-5. Albert Pieternella ta lider den bateo ku averahe di .800, sigí pa Rigobert Cijntje ku tin .714. Pieternella i Cijntje ta di ekipo Ban Serio. Gino Valeriaan di Baranka ta na di 3 lugá ku averahe .692. Clfiton Ostiana (Artemisia) i Wendell van het Kruys (Ban Serio) ta empatá den liderato di RBI ku 9. Lesley Martina (Artemisia) ta lider den ERA ku 1.24 sigi pa Michelangelo ‘Galbao’ Boekhoudt di Ban Serio 1.72, Gregory Martijn (Lions) 2.33 i Edison Sambe tambe di Lions ku .239. Lider den ponche tirá ta Edison Sambo, Fernando Rosario (Jaws) i Johan Cicilia (Pitufos) 5.
* * * * *
Djasabra 7 di ougùstùs 2021, despues di basta tempu un ekipo a pèrdè pa defolt den Beisbòl Veterano. Ekipo Marlins a pèrdè pa defolt debí ku nan no por a kompletá 9 hungadó pa start ku e wega. Parse ku mesun hungadónan a pèrdè pa defolt den un otro liga den un otro tim e aña aki. Den otro wega Isla Crackers a pasa fásil riba Marchena ganando nan 10-1, Santa Rosa a dal The Brothers 8 pa 3. Nos ta pendiente pa e resultadonan di djadumingu. Den Beisbòl Dòbel A Santa Rosa Indians ku tremendo picheo di Jordan Lucas a dal Marchena Braves 10-0. Djadumingu mester tabatin wega kandela entre Royal Scorpions i Wild Cats. Den Liga di Nos Tur tabatin kandela entre ekipo Un Kara i Sin Stress den wikènt. Un Kara a gana djabièrnè i djasabra wega a keda suspendé pa motibu di lus. Azucar a sorprendé Jandoret Raiders den Beisbòl Veterano kibrando invikto di e ekipo di Jandoret.
