RBC a entregá unifòrm na selekshonnan Pabou i Pariba divishon Little League di Kòrsou
WILLEMSTAD- RBC Royal Bank, spònser di Curaçao Little League Baseball, djaluna dia 30 di mart 2026 a entregá unifòrm na selekshonnan di divishon Little League Pabou i Pariba di Kòrsou, ku lo hunga den e kampionato regional di Kòrsou. E kampionato regional di Kòrsou, e asina yamá ‘head to head’ seri mihó di 7 entre Pabou i Pariba lo tuma lugá dia 7 pa 13 di aprel den Post 6 Ballpark. E entrega simbóliko di unifòrm a tuma lugá na RBC Royal Bank den presensia di tur hungadó i dirigentenan di selekshonnan di Little League di Liga Pariba, Liga Pabou i medionan di prensa. Entrega di unifòrm na e selekshonnan di divishonnan di Minor, Intermediate, Junior i e dos nan di Senior lo ta den luna di mei.
Di parti di spònser RBC a hiba palabra señor Pierrot Hurtado, Managing Director i District Administrator señor Urny Floran. Pa promé biaha den historia lo tin un seri regional entre e ekiponan di Kòrsou. Esaki ta dor ku Kòrsou lo pasa dirèkt pa hunga den e kampionato Mundial di Little League na Williamsport den luna di ougùstùs próksimo. Na Williamsport Kòrsou lo presentá komo region i lo karga e nòmber di Kòrsou riba e unifòrmnan. Den e seri na Kòrsou den luna di aprel selekshonnan di Pariba lo hunga den unifòrm kolo blou Pabou den unifòrm kolo hel, esaki ta manera sa ta e kaso den weganan di kampionato di Karibe i latino den pasado ku a tuma lugá na Kòrsou.
Pierrot Hurtado a bolbe mustra riba e importansia di nos hubentut pa ku futuro di Kòrsou i ku RBC Royal Bank.
RBC su kompromiso di bintiseis aña ku nos hobennan, esta mas ku un kuart siglo di kompromiso ku desaroyo di hóben na Kòrsou.
“Nos ta kere den e poder di deporte pa transformá bidanan. Ora hóbennan partisipá den programanan manera Little League, nan no ta djis siña kon pa dal bala di beisbòl òf fangu un bala. Nan ta trahando riba nan disiplina. Nan ta desaroyando karakter. Nan ta siñando e balor di traha den tim, di perseveransia, i di dedikashon.
E abilidatnan aki no ta yuda nan solamente riba fèltnan ta yuda prepará nan pa éksito na skol, den nan karera, i den bida. E benefisionan pa bo salú mental i físiko di sigui ta aktivo, bini huntu ku amigunan, i traha duru riba metanan komun. Esei ta e fundeshi di komunidatnan próspero.
Nos idea di konstruí un komunidat mas fuerte ta sosodé aki, riba e fèltnan aki, ku e coachnan, boluntarionan, i atletanan hoben aki, ku ta bini i ta duna lo mehor di nan mes, kada dia.
Mi ta orguyoso di anunsiá ku RBC ta otorgando unifòrmnan nobo nobo na tur partisipante di Little League e temporada aki.
E unifòrmnan aki ta representá mas ku djis artíkulonan nobo. Nan ta representá orguyo, orguyo di ta parti di algu mas grandi ku bo mes. Nan ta representá union kada hungadó ku tin e kolónan aki bistí ta parti di e mesun tim, e mesun komunidat, e mesun soño. I nan ta representá nos kreensia firme den loke bo por logra ora bo subi e fèlt ei.
Nos ke pa kada hungadó sintié yen di konfiansa, sintié balorá, i sa ku nan komunidat ta respaldá nan 100%.
REKONOSIMENTU
Na tur e hungadónan di Little League ku t’ei aki awe: boso ta inspirá nos. Boso energia, boso pashon, boso dedikashon—esei ta loke ta hasi e programa aki spesial.
Na e coachnan i e boluntarionan: ta boso ta e MVPnan (hungadónan di mas balioso) berdadero. Boso ta duna boso tempu, boso ekspertisio, i boso kurasonnan pa forma e bidanan hóben aki. Boso ta dunando un ehèmpel ekselente na e hóbennan di Kòrsou i di henter Karibe. Danki.
Na e mayornan i e famianan, ta boso sosten ta hasi tur esaki posibel. Danki pa kere den e poder di deporte pa kambia bidanan.
Nos di RBC ta orguyoso di e herensia aki, i nos ta ainda mas eksitá tokante loke tin nos dilanti. Kada persona hóben riba e fèlt ta representá futuro di Kòrsou, i RBC ta komprometé pa kana kada paso huntu ku nan riba e kaminda.
Pabien ku tur loke boso a logra te ku awor. I nos no por warda pa mira kiko ta sigui tantu riba fèlt komo eifó.
Pierrot Hurtado a deseá nos selekshonnan éksito na Kòrsou i éksito tambe na esnan ku lo kompetí den eksterior.
Urny Floran a gradisí RBC atrobe pa e aporte na Little League, den e kaso aki unifòrm pa nos muchanan. Manera ta konosí RBC ta spònser biahe i unifòrm tambe di delegashonnan di Beisbòl Little League, ku lo biaha pa eksterior. Nos pelotero- i e coachnan ta bon prepará i naturalmente lo ta bon bistí pa representá Kòrsou dignamente aki na Kòrsou i e otro selekshonnan ku lo biaha pronto pa eksterior.
