Fanátikonan di Deporte Kòrsou. Nos tei atrobe ku hopi informashon di Sòftbòl i Beisbòl. Hopi aktividat di Sòftbòl Slowpitch den fin di siman i nos tin detaye den nos kolumna. Sòftbòl Fastpitch Femenino organisá pa CSB a start ayera na Sam Bunting Ballpark na Brievengat. Nos lo kubri i komentá e parti maskulino kaminda hopi hungadó di Slowpitch ta partisipá. Tin algun hungadó di Beisbòl Veterano ku ainda ta move den e hóbennan di Fastpitch, entre otro Emilio Velarde ku ta un dje mihó pichernan di Sòftbòl Fastpitch. Julius Veeris tambe ta den Beisbòl Veterano i ta un estrea den Sòftbòl Fastpitch Maskulino komo picher i hungadó.
* * * * *
Djaweps tabatin wega entre Gamers i Swift den Liga 40, kaminda rumannan Leon, Sergei i Dimitri mester a enfrentá otro komo manager. Swift a gana fásik 6 pa 1. Nos tin mas detaye den e dianan benidero. Baranka super kampion di Liga 40 a sali ku 3 pèrdí sigí. Crazy Tigers kampion di 2019 a sali pèrdè kontra Swift pa despues gana 3 wega sigí. Crazy Tigers ta faborito pa ripití, pero mester tene kuenta ku Swift i Baranka. Gamers lo keda entre 3 i 4 lugá i Jaws lo keda na puesto number 5 te final. 5 ekipo tin den Liga 40 e temporada aki despues ku ekiponan Navegantes i Happy Stars a kai afo. Navegantes tin chèns di bini bèk, debí ku nan tin un ekipo hóben den Liga van Engelen, pero kos ta pinta hopi skur pa ekipo Happy Stars, ku definitivamente a pasa pa historia despues di algun temporada den gran forma den Liga 40.
* * * * *
Kenny Hellement a regresa den Sòftbòl den Liga 50 i ta kla pa yuda Baranka bèk den 40+. Kenny pa mas ku 10 aña ta karta prinsipal den Baranka den 40+ i ku Bombers. Diferensia grandi ora Kenny bin bèk, espeshalmente den 40+ i 50+. Kenny hungando pa Bòmbers den 2020 den Liga Amstel tabata lider den varios kategoría di picheo i tabatin un rekòrt di 4-0 den liga di e hóbennan. 2020 no tabatin Liga 40 i Liga 50 a keda suspendé promé ku Kenny a haña un chèns di debutá ku nèt 50 aña. By the way, djasabra tabatin All Stars Game di Liga Amstel. Nos ta pendiente pa e resultado. Masha tempu no tabatin asuntu di All Star Game den Slowpitch i nos a haña e idea tremendo.
* * * * *
Pa loke ta Liga di ekipo Un Kara a gana Sint Stress 17 pa 13 dos siman pasá.
+Chilling a dal Shining Stars 14 pa 2 djabièrnè i djasabra tabata Shining Stars ku a dal Chilling 10 pa 1. Poko straño si, pero t’asina mes. Djabièrnè Liga di Nos Tur mester a sigi ku dos wega. 8’or Chilling mester a topa ku Join Me i despues pa 9.45’or Sin Stress mester a hunga kontra Curacao Sweethearts. Djabièrnè dia 13 di ougùstùs tabatin un wega so entre Chilling i Join Me. Chilling a gana 7 pa 6. A para e otro weganan di wikènt debí na Covid-19 i toke de Keda. Ta pendiente pa hunga un wega so pa dia den w wikèntnan benidero. Standing di Liga di Nos Tur ta lo sigiente. Un Kara 6-1, Chilling 4-2, Join Me 4-3, Sin Stress 3-2, Shining Stars 2-6 i Curacao Sweethearts 0-5.
* * * * *
Lider den bateo di Liga di Nos Tur ta Nathaly Lourens (Un Kara) .833 sigí pa Isonette Polonius ku tin .692. Isonette Polonius tambe ta di Un Kara. Nathaly Lourens ta lider den RBI ku 16 kareda empuhá den 7 wega. Carlientje Cleopa ta lider den ERA ku 1.15 sigí pa Mairis Obispo di ku tin 1.80. Cleopa i Obispo ta di ekipo Un Kara, ekipo kampion invikto di temporada 2020. Jeanderica Martina di Curacao Sweethearts ta lider den ponche ku 4 ponche empatá ku Minerva Maduro (Shining Stars), Candida Gregorius -Wawoe (Chilling), Emily Jonis (Sin Stress) i Carlientje Cleopa (Un kara). Tur e pichernan aki tin 4 ponche tirá. Nos ta keda te aki.
