Fanátikonan di Deporte Kòrsou, bon dia i felis wikènt. Skor feros a kai den Beisbòl Dòbel A na momentu ku Santa Maria Pirates a zona Marchena Braves ku skor di 28 pa 6 siman pasa .  Santa Maria a bati 14 hit i risibi 13 base por bola. Einan e wega ta kaba di daña pa e ekipo kontrali. E batiadónan ku a risibí 2 pa 3 base por bola  a nota mayoria di e karedanan di ekipo Santa Maria.  Santa Maria a dal un paso firme pa kaba na di 3 lugá. Santa Maria despues di e wega di djasabra anochi tabatin rekòrt di 8-7, miéntras Santa Rosa ku ta na di 3 lugá tin rekòrt di 10-6. Esei ta te ku wikent pasa. Pero Santa Rosa a gana 2 wega e siman aki i ta mei wega riba Santa Maria. Santa Rosa a terminá kampioanto regular ku rekòrt di 12-6.   Ultimo wega di e buelta regular ta programá pa tuma lugá dia 19 di sèptèmber.

Notisia freksu di awe 180921. Bulldogs a dal Quality ku skor di 14-2 den e promé wega di djasabra mainta na Tio Daou Ballpark den Beisbòl Veterano.
Otro resultado fresku. Ekipo Baranka a derotá Ban Serio ku skor di 6-5 awe 180921 den Liga 50 na Van Engelen Ballpark. Tabata e wega di 12’or.  Pa 2’or ta Pitufos vs Jaws i 4’or Artemisia/Marlins.

‍

Santa Maria luchando pa yega di 3 luga.

* * * * *

Den Beisbòl Veterano ekipo Isla Crackers a laga Bulldogs den tereno den un tremendo partido djasabra atardi na Vi Jansen Ballpark. Isla Crackers komo ekipo di kas a nota 4 kareda den nan último chèns riba walkoff grandslam di Kevin Boekhoudt.  Riba konteo di 1-1 Kevin Boekhoudt batiadó derecho kontra e picher Lester Victoria a dal un grandslam pa terminá e wega. Bulldogs a saka un out grandi ku rolling pa primera di e peligroso batiadó Quincy Kook. Despues ku a bolia Dave Janga , Kevin Boekhoudt a dal e grandslam. Ku e viktoria Isla aki Crackers tin rekòrt di 11-0 ku chèns di terminá kampionato regular invikto. E sigiente wega i último wega di buelta regular di Isla Crackers ta kontra Jandoret Raiders djadumingu 1’or na Vi Jansen Ballpark.

Isla Crackers invikto den Beisbòl Veterano 2021.

‍

* * * * *

Nos a risibí resultado di Beisbol Liga 50 di djasumingu. Ekipo Vosama a gana Yesterday ku skor di 9 pa 7. Yesterday no tabatin tur su streanan di Pitufos ku a keda selebrá e viktoria kontra Marlins den 50+ te den oranan lat di anochi djasabra.  Vosama ku picheo kombiná di Cedric Antonia, Gladwin Lacrus i Xavier Avastia a gana 9-7. Remick Bernadina a bati di 3-2 pa Vosama i Alexander Martina di 3-2 pa Yesterday 50+. Omar Valies tabata e picher pèrdèdó pa Yesterday. Francis Petronilia a relevá.  Djadumingu den e wega klèsh Santa Maria a gana Jandoret Raiders ku skor di 2-1. Quality a gana Santa Rosa 9-5. Keda pendiente pa e numeritonan di nos artikulo.

Jandoret Raiders a kai vensi kontra santa Maria ku skor di 2-1. Jandoret lo topa ku Isla Crackers djadumingu 190921 pa 1'or.

* * * * *

Djadumingu tabatin kandela entre Nos Tambe Por i Jaws den Liga 60 na Frank Curiel Ballpark. Den di dos inning ya Nos Tambe Por tabata ganá ku skor di 9-1.  Wim Felicia tabata pichando pa Nos Tambe Por, miéntras nos no a mira nòmber di Hubert ‘Manolo’ Gomez pa Jaws. Ekipo Jaws a gana Nos Tambe Por na 3 okashon den 2021. Nos Tambe Por ta kargá ku strea manera Norwin Moesquit, Rignald Hooi, Percy Schoop, Edson Sophia, Richard Coffie, Elleroy Martina ets. Tur e hungadónan aki tempu di nan tempu a hunga den Beisbòl Dòbel A. Tin tambe Jero Wiliam, rumannan Leopold, Richenel Rafaela i Wochi Balentina ets.  Promé ku e wega aki Jaws tabata na promé lugá invikto ku rekòrt di 6-0, miéntras Nos Tambe Por tabatin 5-1. Den e promé buelta Jaws a gana Nos Tambe Por 5 pa 4.

Nos Tambe Por rumbo pa otro titulo den Liga 60 di Sòftbòl

* * * * *

Den Liga 50 ekiponan Pitufos, Flamboyan, Jaws i Ban Serio a gana. Pitufos a gana Marlins 7 pa 3, Flamboyan a dal Catpower 18 pa 2, Jaws a dal Artemisia 15-10 i Ban Serio a dal Mon Repos Sluggers 26 pa 9.  Awe òf den kurso di siman nos tin e numeritonan. Albert ‘Yuyu Computer’ Pieternella di Ban Serio a keda lider den bateo ku un averahe haltísimo di .786 ku ta 11 hit den 14 turno. Den e wega di djasabra kontra di Mon Repos, Yuyu a bati di 2-2 i hisa su averahe di .750 pa .786.  Clifton Ostiana a pasa Amarildo Coffie pa loke ta trata kareda empuhá. Clifton Ostiana tin 12 RBI i Amarildo Coffie tin 11 RBI. Wendell van het Kruys di ekipo Marlins tambe tin 12 empatá na promé lugá ku Clifton Ostiana.

Flamboyan ku otro viktoria den wikènt. Nan a manda un karta pa Liga 50 i no ta di akuerdo ku e desishon di e wega kontra Pitufos ku nan a gana riba tereno pa despues pèrdè via protesta. Durante wega nan (Flamboyan) mes a manda e koredo bèk, pa despues direktiva bisa ku e koredó a nota. Durante reunion di protesta a bòltu e kos bek. Flamboyan ke tur ekipo na reunion pa tuma un desishon.

* * * * *

Djabièrnè Curacao Sweethearts a dal Sin Stress duru ku skor di 10 pa 1 den Liga di Nos Tur.  Den play-off Hubenil djasabra Wild Cats a gana wega number 1 di semi-final 4-2. Santa Rosa a gana Royal Scorpions ku skor di 11-5. Djadumingu mainta e seri entre Santa Rosa i Royal Scorpions a empatá. Royal Scorpions a gana Santa Rosa 3-2. Jadon Gosepa a picha 7 inning i poncha 15 batiadó di Santa Rosa den e wega menshoná.

Vosama ku viktoria wikent pasa riba Azucar
Stanley Palm komo picher pa Vosama wikènt pasá.