Fanátikonan di Deporte Kòrsou, kon kos ta bisa. Nos tei atrobe ku informashon di Beisbòl i Sòftbòl Slowpitch. Nos tin resultado di Liga Van Engelen i Liga Amstel. Den Liga van Engelen Jaws a gana Quisqueya fásil 15 pa 5 i a keda invikto den e liga. Den otro wega Kings a dal Clase Aparte duru 20 pa 6. Kings den komienso di kampionato a sorprendé ku un defolt den nan promé wega di kampionato. E ekipo ta konta ku vários hungadó di Marlins den Beisbòl Veterano i na momentu ku play-off di e liga veterano start nan lo ta kompletu atrobe den Liga van Engelen.
* * * * *
Navegantes a dal Bucaneros 2 pa 1 den Liga van Engelen den e último wega di djadumingu 19 di sèptèmber. Wega di 2 pa 1 ta kos serio, speshalmente ora ta trata di Slowpitch. Picher ganadó pa Navegantes tabata Ryan van Heydoorn i pèrdèdó pa ekipo Bucaneros tabata Alexander Guanipa. No tabatin homerun den e wega menshoná. Despues ku mayoria ekipo a hunga 8 pa 9 wega nos tin e standing di Liga van Engelen. Jaws 9-0, Swift 7-1, Navegantes 5-4, Quisqueya 3-5, Bucaneros, 2-7, Clase Aparte, 2-6, Kings 2-7. Den e sigiente alinea nos tin e lidernan den bateo i picheo di Liga van Engelen.
* * * * *
Luigino Domacasse di Swift ta lider den bateo ku .733, sigí pa Jonaikel Castro Arias (Quisqueya) ku tin .632. Ericson Senior di ekipo Jaws tin average di .600. Den kareda empuhá, Argenis Daal di ekipo Jaws ta lider ku 14, ta sigi Dicson Acosta di Swift ku 13, empatá ku Darwin Blanquicett di Swift ku tambe tin 13 RBI. Erick Lopez di Bucaneros tin 13 i finalmente nos tin Luigino Domacasse ku tin 12 RBI. Den picheo pa loke ta trata ERA (average di kareda limpi pa picher), Glendomar Davelaar (Navegantes) 1.25, Rolando Castro Arias (Quisqueya) 1.92, Alexander Rodriquez (Jaws) 2.14, Emilio Velarde Lugo (Swift) 2.27 i Roel Matrona (Jaws) 2.31. Ponche tirá pa picher. Emilio Velarde Lugo tin 17 ponche tirá, Stanley Girigorie (Clase Aparte) 7, Ryan van Heydoorn (Navegantes) 5, Jermaine Esprit (Jaws) 3, Rolando Castro Arias 3.
* * * * *
E wega entre Lions i Catpower di Liga 50 no ta aperesé riba Game Changer. Lions a gana fásil ku skor di 13-2. Lions a terminá promé buelta ku rekòrt di 8-1 na promé lugá di Liga 50. Falta dos wega hopi importante pa definí e gruponan. Gino Valeriaan ku tabata number 2 den bateo a bolbe pasa pa bira lider den Liga 50. Curtly ‘Gino’Valeriaan di Baranka tin averahe di .700 ku ta 14 hit den 20 turno ku 9 èkstra base den e 14 hitnan ku Gino a konektá. Efraim ‘Junny’ Marselia di ekipo Mon Repos Sluggers tin average di .650, sigí pa Albert ‘Yuyu’ Pieternella ku ta batiendo .647. Den e wega di Baranka kontra Ban Serio, Yuyu Pieternella a bai di 3-0, miéntras Gino Valeriaan a bai di 1-0. E lucha pa título di bateo ta sigi den Liga 50.
* * * * *
Clifton Ostiana di Artemisia a keda lider den RBI ku 12, Edison Sambo di ekipo Lions lider den ERA ku .333. Johan Cicilia di ekipo PItufos ta number 1 den ponche tirá ku 10. Ekiponan ta riba un trankil pendiente e weganan ku falta pa sigi di dos buelta kaminda ekiponan lo hunga den dos pul di 5. Ekiponan Catpower i Artemisia falta un wega i desishon riba e wega di Pitufos vs Flamboyan. Liga 50 interesante tur djasabra na Van Engelen Ballpark huntu ku Liga Amstel ku tambe ta kabando ku buelta regular pa start ku play-off.
* * * * *
Nos a risibí sifranan final di kampionato di Beisbòl Dòbel A. Ekipo Groot Kwartier a klasifiká na di 5 lugá i lo bai topa ku Santa Maria Pirates. Firebirds a risibí dos derota feros kontra di Santa Maria riba e dos fechanan final di kampionato ku skor di 11-3 i 17 pa 2 respektivamente. Pa loke ta trata lidernan individual. Shurendell Mujica di Wild Cats a sali kampion bate ku un average di .444, sigí pa Riordan Windster di Santa Rosa ku .434. Alexander Rodriguez di Wild Cats a sali lider den kareda empuhá ku 22 sigí pa Yurendell de Caster ku tin 20 RBI. Den picheo Siamani Boekhoudt (Santa Rosa ) a terminá lider ku 1.17. Shurensley Daantji di Wild Cats tabata na di dos lugá ku 1.93. Temesh Lourens tabata lider den ponche ku 38.
