Fanátikonan di Deporte Kòrsou, bon tardi i felis wikènt. Wikènt ku moveshon den tur e liganan di Beisbòl i Sòftbòl. Beisbòl Dòbel ta bai drenta play-off semi-final. Beisbòl Klase A ta bai hunga weganan number 2 i si ta nesesario wega number 3 na Montab Ballpark. Ekipo Santa Rosa di Klase A ta dilanti den e seri 1-0. Nan a gana e promé wega ku skor di 5-4. Resientemente nos tabatin e lidernan pa loke ta trata bateo i picheo den Klase A. Play-off final di Hubenil a sigi ayera ku Wild Cats dilanti 1-0 riba Santa Rosa. Djaweps 23 di sèptèmber 2021, Santa Rosa a gana Wild Cats ku skor di 4 pa 2 pa empatá e seri.
Nos tin un promoshon fresku fresku di playoff di Beisbòl Dòbel A
* * * * *
Den e promé wega di final djadumingu último, e prospekto Mairoshendrik Martinus a bati di 5-4 ku dos doblete i un tripel pa Wild Cats gana di Santa Rosa 12 pa 9. Cleavon Lasten a gana den relevo pa Wild Cats. Lasten a relevá Arlyson Rodriguez ku tabata e picher habridó. Wild Cats a nota 5 kareda den nan último chèns pa bòltu e skor i gana e wega. Rodston Inecia a bati di 4-3 ku homerun pa Santa Rosa. Shane Quant ainda ta hunga den Hubenil i ela bati di 3-1. Allen Hollander a bati di 4-2 ku 3 RBI. Mairoshendrick Martinus ta un dje prospektonan grandi pa firma na komienso di otro aña i start un karera profeshonal. Djaweps anochi Nyzar Martinus-Pereira a tira tremendo (wega kompletu) pa Santa Rosa Indians empata e seri.
* * * * *
Liga Streanan di Ayera ta sigi tur djadumingu na Muizenberg Ballpark serka Marlene Obispo. Ta di 25 aña di e liga i nos tin algu speshal kasi tur siman di e liga. Nos ta bai bèk den tempu ku historianan di e famoso liga ku for di 2019 tin Liga 50 tambe. E aña aki tin liga 50 so, pero normalmente e liga tin su parti di Liga 35+ i e liga 50. Djadumingu tabatin dos wega den Liga Streanan di Ayera. Den e promé wega pa 3’or pm ekipo Unidos a sorprendé Treasure ganando ku skor di 2-1. Dulce Petronilia tabata e picher ganadó i Enid Hooi picher pèrdèdó pa Treasure. Ta Treasure ta e aktual kampion. Nan a bira kampion na 2019 i na 2020 no tabatin kampionato 50+ debí na Covid. Den e otro wega djadumingu pasá ekipo Tur Goso a gana di Golden Girls 5 pa 1. Myrthe Elizabeth a gana i Ismee Thielman a bati di 2-2 pa Tur Goso. Elvira Steenbaar i Olinda Laurenia a bati di 2-1 pa Golden Girls.
* * * * *
Ban un ratu pa Beisbòl Dòbel A ku a start play-off kayente djarason último. Santa Maria mester a lucha pa saka Kwartier afó i awor Santa Maria lo topa ku Wild Cats. Wild Cats tin Calten Daal ku ya a bini bèk for di Hulanda pa reforsá ekipo Wild Cats den play-off. Calten Daal a sali lider di homerun ku 5 i ta shortstop regular di ekipo Wild Cats. Calten Daal a bai reforsá Hulanda den e weganan bálido pa kampionato di Europa, kaminda Hulanda a bira kampion pa di 4 biaha sigí i pa di 22 biaha den historia di e kampionato Europeo. By the way, e kompetensia di Europa no ta fásil pa Hulanda i mester a lucha pa bira kampion. Nan a gana Israel ku skor di 9-4, despues ku ekipo Hulanda tabata atras den wega. Yunan di Kòrsou Roger Bernadina, Sharlon ‘Wecho’ Schoop su nòmber a zona den e wega final. Roger Bernadina tabatin un homerun krusial di 3 kareda i Sharlon Schoop a empuhá 3 kareda i saka e último out di e wega. Calten Daal a hunga lastu wega ku Wild Cats dia 1 di sèptèmber promé ku ela move pa Hulanda.
* * * * *
Wild Cats ku a terminá number 1 lo bai topa ku number 4 (Santa Maria). E diferensia entre number 1 i 4 ta solamente un wega. Wild Cats a terminá 13-5, Santa Rosa Indians 12-6, Royal Scorpions 12-6 i Santa Maria 11-7. Play-off kayente. Nos tin averagenan kolektivo di ekiponan di play-off. Wild Cats a bati .302 kolektivo, picheo 4.75 di ERA i fildeo .949. Santa Rosa Indians .292, picheo 5.61 i fildeo .941. Royal Scorpions su bateo kolektivo ta .317, picheo 4.61 i fildeo .948. Santa Maria Pirates .350, picheo 6.91 i defensa .947. Santa Maria su bateo ta leu riba tur otro. Den picheo Royal Scorpions ta number 1 den ERA i defensa ta Wild Cats, ánke mester bisa ku den e parti aki e otro ekiponan ta pareu. Nos ta keda te aki pa awe.
