Fanátikonan di Extra Inning, bon dia. Play-off di Beisbòl Dòbel A ta kandela kandela. Wild Cats mester a lucha pa gana Santa Maria djasabra 25 di sèptèmber ku skor di 12 pa 9. Práktikamente niun hende no a spera ku Santa Rosa Indians lo dal Royal Scorpions duru ku skor di 12-2 den e promé wega di semi-final entre ekiponan 2 i 3. Santa Maria a sali basta kómodo riba Wild Cats den e wega di djasabra último i tabata ganá hasta 8 pa 2 den komienso di e wega ei. Ta e èks picher di Santa Maria, Shurensley Daantji tabata klave i a dominá Santa Maria durante 7 inning largu pa bira e picher ganadó. Mientras tantu Wild Cats a gana dos wega sigi i Santa Maria a gana un wega i e seri ta 2-1 pa Wild Cats pendiente e wega di djasabra 2 di oktober anochi depende awaseru naturalmente. Seri entre Royal Scorpions i Santa Rosa ta empata na unu. Kòrda ku nos a drenta luna di òktober, luna di awaseru.
* * * * *
* * * * *
Den play-off bo mester di pichernan ku kurason i pichernan ku por wanta relevo largu pa tene bo tim den wega i bibu den e play-off. E ekipo den play-off mester tin picher ku por tira 2 pa 3 biaha durante un siman i mei pa por yega final. Un tim mester tin hopi picher tambe i den e kaso aki hungadónan di posishon tambe mester por kue un pa dos inning pa yuda e otro pichernan. Santa Rosa ku a bira kampion na 2020, na e okashon ei a hasi uso di nan tersera base Swindley Lint na algún okashon ku a tira efektivo pa yuda su ekipo gana i alabes sosegá e pichernan su brasa.
* * * * *
Skedjel di play-off Dòbel A.
* * * * *
Nos ta kòrda un tempu den Santa Maria Pirates. Johannes Gregorius Jr, Alexander Rodriguez i Sherwenne Antersijn den play-off tabata subi montíkulo pa Santa Maria i kue algún inning efektivo. Sherwenne Antersijn tabatin un tremendo aktuashon durante kampionato regular, apesar ku ela tira apénas 6 inning i tin un ERA di 0.00 ku 1 wega ganá i 0 pèrdí. Picheo i defensa lo ta klave den e play-offnan aki. Bayendo bèk den play-offnan di 2020, defensa a laga Santa Maria na kaya den partido number 5 ku despues a resultá den un viktoria pa Wild Cats ku a pasa pa final.
* * * * *
* * * * *
Ban pa algún hungadó ku ya a destaká den e play-off nan. Aldair Daal tremendo na bate pa Santa Rosa Indians bayendo di 1-1 ku 3 base por bola i 3 kareda anotá, Swindley Lint di 2-2 ku dos kareda anotá bon den defensa na tersera. Rojean Cleofa, Ildion Martina i Aldair Adamus ku 4 kareda empuhá. Yurendell de Caster 3 empuhá i Risandro Pastor 2 RBI. Esnan ku a destaká den picheo ta e relevistanan mas bien ku a drenta i hasi e trabou. Alexander Rodriguez, Hershelon Juliana, Clarence Martina (Santa Maria), Ramses Jamanika no a tuma kareda limpi. E picher ku mas inning tirá den play-off ta Shurensley Daantji ku a tira 7 inning i un tersio pa Wild Cats kontra di Santa Maria i tuma solamente dos kareda den un wega ku tabatin masha hopi kareda mes tur dos banda.
* * * * *
* * * * *
Loke nos a skibi aki ta kosnan grandi. Den play-off e kosnan chiki tambe ta hasi e diferensia. Den e wega di Santa Rosa vs Santa Maria ku e wega 0-0 ya for di promé inning e di 3 batiadó di Santa Rosa, Swindley Lint a kuminsá krusa pa toka i e picher habridó di Royal Scorpions Ruderly Manuel a tira 3 bola sigí pa despues bai 3-2 i finalmente embasá e batiadó number 3. E sigiente batiadó, e kuarto bate Ildion Martina si a bula riba e promé bala pa dal doblete pa right i manda dos kareda adén. Esei tabata djadumingu siman pasá.
* * * * *
Un ratu den Slowpitch. Den Liga 40 Crazy Tigers a gana Baranka 12-4 i djaweps Swift a laga Gamers den tereno ku skor di 8-7. Ta un wega so ta tuma lugá pa dia i e weganan ta start 8’or. Ayera play-off di Liga di Nos Tur mester a start na Frank Curiel Ballpark entre ekipo Join Me kontra Sin Stress djabièrnè i djasabra Chilling kontra di Un Kara. Beisbòl Veterano ta start ku play-off. Number 5 kontra 6 ku ta Quality Stars vs Santa Rosa. Ganadó di e wega aki lo topa ku Bulldogs. Liga 50 ta start ku buelta number dos ku 4 wega na Van Engelen Ballpark.
