Fanátikonan di Deporte Kòrsou bon dia i felis siman. Nos tei atrobe ku informashon di Beisbòl i Sòftbòl. Tremendo apertura ofishal di e parke renobá di Sam Bunting na Brievengat djabièrnè último. Gobièrnu a renobá e parke, pone muraya den outfield, yerba i lus p’asina ekiponan di bario i bisendario por trein i organisá weganan di Sòftbòl i Beisbòl riba e parke. E parke ta okupá práktikamente tur dia i timnan ku ántes tabata train riba e parke tin e promé opshon pa sigi train. Den 50+ ta ekiponan Marlins i Pitufos tabata train riba e parke promé ku sera e parke pa e rekonstrukshon.
· * * * * *
Djasabra atardi na Tio Daou Ballpark tabatin apertura di Torneo Kenley Jansen. Promé ku e wega entre ekiponan Sint Michiel i Brievengat den kategoria Junior tabatin e parti ofishal. MC Jeffrey Martina a yama e hungadónan di e dos ekiponan unu pa unu ku aplouso di e públiko presente. Ekipo Sint Michiel a alineá banda di primera i Brievengat parti di tersera. Despues a yama e invitadonan speshal entre otro District Adminstrator, sr. Urny Floran, representante di spònser RBC Royal Bank, branch manager. Sharier Dorand, direktor di FDDK sr. Virgilly Winklaar, i representante di liganan sigi pa himno di Kòrsou.
· * * * * *
Liga Pariba a keda representá pa sra. Emmylou Jakoba i Liga Pabou sr. Kursley Kuwas. Sharier Dorand, Virgilly Winklaar i Sharier Dorand a hiba palabra. Despues tabatin promé lansamentu ku a keda tirá pa Virgilly Winklaar direktor di FDDK, batiadó tabata Sharier Dorand RBC Royal Bank i umpire Urny Floran, District Administrator. Sint Michiel Junior a gana Brievengat den e wega ku a sigi despues di e seremonia. Den Senior Sint Michiel a gana di Santa Maria pèrtá ku skor di 2-1. Ta permití hungadónan di Junior hunga den e kategoria Senior tambe i nos a mira vários hungadó di Junior Sint Michiel move den Senior tambe.
· * * * * * *
E asosashon di umpire i skorernan di Kòrsou (USAC) ta bai start ku un kurso di umpire. Nos a risibí un komunikado ku ta splika ku nos peloteronan lokal i internashonal ta destaká ku nan aktuashon. E base di e fundeshi di nan konosementu i talento kompaña pa un bon disiplina, yuda pa un bon kuadro arbitrahe ta yuda forma nos peloteronan. Den kuadro pa insentivá i krea mas árbitro pa akapará beisbòl lokal, e organisashon di USAC ta hasi yamada na tur eks- pelotero, o personanan ku tin e talento i e kurashi pa nan manda sea un mail òf hasi un yamada na sea sekretario òf kualkier miembro di direktiva di USAC i reservá un posishon pa sigui e kursonan di árbitro ku USAC pronto lo anunsiá e fecha.
· * * * * * * *
Esnan interesa por sigurá nan partisipashon òf hasi inskripshon i tuma kontakto ku Sandley ‘Karate Kid’ Martina na number 561-3770, Carol de Palm Sr. na 685-0104 i Hensly Benito, 516-2648. Tene kuenta ku sin umpire Beisbòl no por sigi. Tremendo trabou di Karate Kid i su crew último añanan. Karate Kid segun nos tin dos aña na kabes di e kuerpo di umpire USAC. By the way Jair Quant tin un ‘full ‘Joe West’ umpire outfit na benta. Ta un outfit na midi L pa XL. Pa mas informashon por tuma kontakto ku Jair Quant na 511-0763.
· * * * * *
Nos ta bai un ratu pa Beisbòl Veterano. Djadumingu awor pa 1’or lo tin e gran final di Beisbòl Veterano 50+ entre Jandoret Raiders i ekipo Sigi Hunga. E wega lo tuma lugá na Vi Jansen Ballpark. Pa 2021 Liga 50 di Beisbòl lo bira algu serio. Otrabanda Veterano ya a konfirmá nan partisipashon. Nos a topa kasi henter e ekipo di Otrabanda 50+ djabièrnè último den Breedestraat Otrabanda na Netto Bar. Ke men ku otro palabra tin 5 ekipo sigur den 50+ ku ta Jandoret Raiders, Sigi Hunga, Yesterday, Vosama i Otrabanda. Ta pendiente di un ekipo mas ku ta Blue Hawks di añanan 80 òf un kombinashon di Azucar/Santa Maria.
· * * * * * *
Kambionan ta sigi den Beisbòl Veterano i plaka ta lorando formal. E dos ekiponan ku a hasi mas kambio ta Quality Stars i Santa Maria Pirates ku ta kampionnan di 2020 i 2019. A firma kontrakt hasta ku kuerpo tékniko nobo ku lo tuma over den 2021. Den dianan benidero nos tin mas detaye. Nos ta keda te aki pa awe.
