Fanátikonan di Deporte Kòrsou bon dia. Nos ta habri un siman kaminda nos tin hopi komentario di weganan di play-off, ku a tuma lugá den wikènt tantu riba nivel di Beisbòl Dòbel A komo Beisbòl Veterano. Tambe tabatin play-off kayente di Liga Di Nos Tur na Frank Curiel Ballpark. Djasabra den un wega kayente den Tie Break ekipo Un Kara a gana di Chilling den e play-off di number 1 kontra number 2. Den Beisbòl Veterano ekipo Santa Rosa a eliminá Quality Stars ganando ku skor di 12 pa 2. E viktoria di Santa Rosa kontra di Quality Stars tabata un sorpresa sigur mirando ku ta Quality Stars tabata kampion di 2020 i e ekipo mas hóben kargá ku streanan di Beisbòl Veterano.
* * * * *
Den Beisbòl Dòbel A ekipo Royal Scorpions a bini bon bèk den e wega pa gana Santa Rosa Indians 5 pa 4. Royal Scorpions ta dilanti den e seri 2 pa 1 i a bira faborito pa yega final. Temporada 2020 tabata mesun ekiponan ku a bai play-off semi-final, esta Royal Scorpions vs Santa Rosa i den e otro seri Wild Cats kontra Santa Maria. Djasabra anochi den e wega Santa Rosa vs Royal Scorpions e picher estelar di Santa Rosa Jordan Lucas a bolbe dominá Royal Scorpions durante 6 inning kompletu i tuma solamente 1 kareda limpi. Jordan Lucas a laga e wega ganá 4 pa 1 pa su ekipo Santa Rosa. Siamani Boekhoudt a habri di 7 inning i tuma un kareda. Despues Swindley Lint ku tabata eksitoso komo picher den play-off 2020 a bin picha i no por a bini kla ku e ofensiva di Royal Scorpions.
* * * * *
Mester apuntá si ku tabatin un eror klave di shortstop ku por a yuda tene e wega serka. Hershelon Juliana a drenta na lugá di Swindley Lint i tuma doblete krusial di Jadon Gosepa. Ruderly Manuel tabata tremendo pa Royal Scorpions djasabra último despues ku e no tabatin su mihó dia djadumingu 26 di sèptèmber. Ruderly Manuel a resultá e picher ganadó tirando 6 inning den relevo pa Ramses Jamanika. Play-off ta sigi kayente e siman benidero i ta bon pa nos rekordá ku mesun ekiponan den play-off aki a hunga wega finalísimo di semi-final den aña 2020.
* * * * *
Un ratu pa Liga 50. Djasabra tabatin dos wega kayente entre ekiponan den klasifikashon di Liga 50. Baranka a gana Pitufos ku skor di 6-3. E promé wega, e partido di 10’or ku mester a bai entre ekipo Artemisia i Flamboyan/Tigers a keda suspendé pa motibu di mal estado di tereno. Un palu di awa a kai djasabra den oranan di mainta tempran. Wega number 2, wega di 12’or entre Baranka i Pitufos a terminá den e viktoria meshoná pa Baranka. Pitufos tabata ganá 3 pa 2 den último chèns i riba un hugada ku mester a bira e último out, (outnan, un Double play) a resultá den eror. Den e otro wega ku a tuma lugá djasabra, ekipo Lions a laga Ban Serio den tereno ganando ku skor di 6 pa 5. Robert Trinidad a dal hit pa center den Tie Break p’asina e koredó na tersera nota e kareda di viktoria. Robert a
dal e hit ku base yen.
* * * * *
E wega di 4’or ku mester tabata entre Marlins i Jaws a keda suspendé debí ku a bira muchu lat i wega mester a sigi bou di lus. Marlins a opta pa purba bou di lus ora solo baha i Jaws a bisa ku nan no ta hunga bou di lus. Lo programá e wega aki despues i tambe partido di Flamboyan/Tigers. Lions ta sólido na promé lugá ku rekòrt di 9-1 i a klasifiká kaba faltando 3 wega pa e kampionato regular terminá. Otro siman tin Lions vs Marlins i Pitufos vs Flamboyan. Otro siman ta play-off semi-final di Beisbòl Veterano ta bai start i lo tin hopi kore kore entre e 50+nan di Sòftbòl ku ta hunga Beisbòl Veterano tambe.
* * * * *
Den Liga 40 djamars lo tin wega entre Swift vs Gamers atrobe i Baranka vs Crazy Tigers ta hunga djaweps. Swift ta dilanti den e seri 1 vs 2 i Crazy Tigers a gana e promé wega di e seri 3 vs 4 di e play-off Liga 40. Nos ta keda te aki pa awe.
